Luka 22 - I CILAGANE CIPYA 1991

U wihehe wo kumuwulaga Yesu

¹ Ale vikusejelela vilo vyo kulila mikate yono siyisasize, vyono yitezagwa vye Pasaka.

² Ne Wakohani wawaha ne wejizi wo Wulajilize walondolaga nzila ho wamuwulaje Yesu: ninga wogopaga wanhu.

Yuda yakuvumila kumugaluka Yesu

³ Hodu, Setani yakamwinjila Yuda mono yacemagwa Musikaliyota, mono yali muyagwe na walya i watumwa we likumi na wejete.

⁴ Yuda yakabita, vikalongana ne wakohani wawaha ne walindilizi we Nyumba yo Mulungu, inzila yono wokwitumamila yo kumugaluka Yesu no kumulavya kuli wene.

⁵ Nawo wakasecelela, no kulagana nayo vyono womupela mapesa.

⁶ Nayo Yuda yakavumila, yakatondola cilejeho ciswanu co kumukombolela Yesu kuli wene, ne lipuga lye wanhu walece kumanya.

U Wuwikanize we ndigwa ye Pasaka

⁷ Lizuwa lye mikate yono siyisasize likafika. Nalyo lye zuwa lyono nyana ye ngholo so Pasaka si yoleka kuwulagwa.

⁸ Holeka Yesu yakawatuma Petelo na Yohana, yakutya “Bitenyi mukaciwikanizize Pasaka, cilye.”

⁹ Nawo wakamuwuza, “Ukusaka cikakuwikanizize hayi?”

¹⁰ Yakawatya, “Hulicizenyi ta, kolo mukufika ku mujini mokwitangʼanila na munhu wa cilume, yadinghuye njilo ye malenga, mumutyatyaje yuyo sunga ko ku nyumba yono kokwinjila.

¹¹ Nanye mumulonjele munya nyumba mutye, ‘U Mwijizi yakuwuza, yakutya, Ati nyumba ya hayi, mono nolila Pasaka ne Wejizwa wangu?’

¹² Nayo komulajilenyi cumba ciwaha ca ku golofa ciwikanizize lukulu, kuko ko mukatenje.”

¹³ Wakabita, wakawona nha vyono Yesu yawalonjeye, wakayitenga i ndigwa ye Pasaka.

I ndigwa yo Muwaha

¹⁴ I cipango caza fika, Yesu yakekala kulya zindigwa hamonga ne watumwa wakwe.

¹⁵ Yakawatya, “Nali kuhila muno cihanje nanye Pasaka yiyi, lono nghali natamiswa,

¹⁶ hambi nha nghumulonjelenyi, si nololya kanyhi, sunga yifisilizwe mu wutemi wo Mulungu.”

¹⁷ Yakasola cikombe, yakalumba, yakatya, “Mubocele aci, mungʼwe wose,

¹⁸ hambi nha nghumutyenyi, si nolongʼwa kanyhi divayi ya Zabibu sunga wutemi wo Mulungu wuze.”

¹⁹ Hanyuma, yakasola mukate yakalumba yakawubegula, yakawapela, yakutya, “Awu wo muwili wangu [wono weza kulavywa ku soko yenyu, Mweze noza nha vivi so wukumbucila nene.”

²⁰ Yakanoza nha vivyo ne cikombe, waza kondya kulya, yakatya, “I cikombe cici, co cilagane cipya co Mulungu, cono cikukangazizwa mu sakami yangu, yono yeza kwitika ku soko yenyu.]”

²¹ “Ninga mulanje, yuyo mono kongaluka yali hamonga nane baha ha zindigwa hono meza.

²² Heya mbeka, u Mwana wo Munhu yakubita kuwulagwa nha vyono yatemezezwa, ninga woyi he kuli munhu yuyo mono komugaluka.”

²³ Baho wakanza kwiwuza weneco wose, wakutya, “Alo kowa wa hayi muli wene mono koyinoza nghani yiyi.”

Wiwanganile ku soko yo wuwaha

²⁴ Kwali na wiwanganile muli wawo watumwa, muli za wahayi mono yakwihweswa vyono yo kowa muwaha muli wene.

²⁵ Yesu yakawatya, “Iwatemi we Makungugo wawatemile wanhu wawo kwe vilungo. Ne watemi wawa, watezagwa watazi wa wanhu.

²⁶ Ninga yilece kuwa nha vivyo muli nyenye, langa u muwaha muli nyenye yaweze nha mudodo, nayo mono kowa mulongozi, yaweze nha mono yakwituma.

²⁷ Hambi wa hayi muwaha, mono yekaye ha ndigwa, hamba mono yakwitumama? Ane nghuwona, yuyu mono yekaye ha ndigwa yo muwaha. Ninga hamba yiwe nhavivyo, ane hali nyenye ninha mono yakwitumama.”

²⁸ “Ninga anye yo nyenye mono mwali muli hamonga nane mu mapango gose mu majelo gangu,

²⁹ nane nomupelenyi wutemi, nha vyono Baba yamhela.

³⁰ Musume kulya no kungʼwa ha wulilo wangu mu wutemi wangu. Nanye molokwikala mu magoda go wutemi mukugalingʼaniza makungugo ikumi na mejete ga Isilayeli.”

Yesu yakuwila vyono Petelo komukana

³¹ “Simoni, Simoni wuhulicize, Setani yakomboywe ho yamupelenyi anye nha vyono munhu kapetaga wuhemba,

³² ninga ane nghukulombela agwe Simoni, wihuwilo wako ho wulece kucepuka; nagwe kolo wukumbuyila kanyhi, ho uwasikamye wanduguzo.”

³³ Nayo Petelo yakatya, “Muwaha, ane niwikanize cibitane nagwe sunga ko ku jela, hamba no kufwa du hamonga nagwe.”

³⁴ Yesu yakamupitula yakatya, “Nghukulonjela Petelo, zuwali lono nzogolo yowa yikali sinalila, kowa wakondya kunghana kali kadatu ukutya, si wumanyile ane.”

I cipango ce zimbali

³⁵ Yesu yakawawuza wejizwa wakwe yakutya “Lululya lono nghamutumenyi mwali musina mufuko wa mapesa, hamba mukoba, hamba malatu, wulenyi, mwanjila cinji?” Wakatya, “Ngʼo.”

³⁶ Nayo yakawatya, “Ninga alu, mono yena mufuko wa pesa, yawusolaje, na mono yena mukoba nhavivyo. Nayo mono yasina mumaje yaguze musweko wakwe, yagule mumaje.

³⁷ Hambi nha nghumutyenyi, vyono yiyi yono yandikwa mu Mandiko Gono Gelile, ‘Yawalilizanwa hamonga ne wahodanji.’ Siyoleka kufisilizwa. Hambi yono yatemezezwa, nha yeza kuficila ku mudumo wayo.”

³⁸ Nawo wakatya, “Muwaha, ulanje, ayi mimaje myejete,” nayo yakawatya, “Hodu yakwila.”

Yesu yakulomba

³⁹ Yesu yakalawila, yakabita kwitunda lye Mizeyituni nha vyono yali yazoweye, ne wejizwa wakwe wakamutyatya.

⁴⁰ Nayo yaza fika hanhu baho, yakawatya, “Lombenyi ho mulece kwinjila mu Wujelwe.”

⁴¹ Yakatemanuka kuli wene yakabita wutali wa nghanzo yeʼbwe lyono ligumiywe, yakafugama yakalomba, yakutya,

⁴² “Baba, hono wende, umbusize cikombe cici co Wusungu, ninga si wuhile wangu, langa wuhile wako witumwe.” [

⁴³ Malayika kulawa ku wulanga, yakamulawila, yakamupela vilungo.

⁴⁴ Nayo vyono yali mu wusungu wuwaha, yakehinda kulomba, ne lituguti lyakwe likawa nha mabanhi ga Sakami gakasulula ho hasi.]

⁴⁵ Nayo yaza kondya kulomba, yakawaziza wejizwa wakwe, yakawagana wagonile so wuzinguce,

⁴⁶ yakawatya, “Alo nye, nhawule mugonile? Inucenyi ta mulombe, ho mulece kwinjila mu wujelwe.”

Yesu yakwibatwa

⁴⁷ Lono yali yakali kulonga, walanje nhavi, ipuga lye wanhu likaza, lina na mono yacemagwa Yuda, muyagwe na walya, iwatumwa we likumi na wejete, yawalongoleye. Nayo Yuda yakamusejelela Yesu ho yamunonele.

⁴⁸ Ninga Yesu yakamutya, “Yuda, alo ukumugaluko Mwana wo Munhu ko wunonele hongo?”

⁴⁹ Nawo wejizwa wakwe waza kuwona zono zikwitumwa baho, wakatya, “Muwaha citowe ne mimaje?”

⁵⁰ Muyawo yunji yakamutowa no mumaje u mwitumami wo Mukohani muwaha, yakamubuha likutu lyo kulume.

⁵¹ Baho Yesu yakatya, “Lecenyi ta hadodo.” Yakamupamiza likutu munhu yuyo, yakamuponya.

⁵² Yesu yakawatya wakohani wawaha, ne wawaha we walindilizi we Nyumba yo Mulungu ne wanyamhala wono waza kumwibata. “Alu muza kunyibata mwina ne mimaje ne zinhumbi, kotya nha nili muhizi?

⁵³ Lono caswezanaga nanye nhondo zose mu Nyumba yo Mulungu, nha si mwasuma kunyibata, ninga aci co cipango cenyu, co cipango co wutemi we citi.”

Petelo yakumukana Yesu

⁵⁴ Wakamwibata Yesu, wakamulongoza, wakamutegula ku kaya yo Mukohani muwaha. Na Petelo yakamutyatya yakujendela kutali.

⁵⁵ No moto wali mupembwe haciligati ye likumbo lya kunze, nawo wakekala hamonga, na Petelo yakekala mu ciligati yawo.

⁵⁶ Mwitumami yumonga wa cihinza yaza kumuwona Petelo yekaye behi no moto, yakamulanga muno, yakatya, “Munhu ayu nayo yali hamonga na Yesu.”

⁵⁷ Ninga Petelo yakakana yakutya, “Gwe go muhinza! Ane sinimumanyile.”

⁵⁸ Na hanyuma hadodo munhu yunji yakamuwona Petelo, yakatya, “Na gwegwe uli muyawo.” Ninga Petelo yakatya, “Go munhu gwe, ane yo si nene.”

⁵⁹ Hanyuma kanyhi yaza kupuluta kotya saa monga, yunji nayo yakajendelela kulonga yakutya, “Mbeka yuyu nayo yali hamonga nayo, hambi nayo nha kalawa ku Galilaya.”

⁶⁰ Ninga Petelo yakatya, “Go munhu gwe, si manyile zono ukulonga.” Na lulo baho du lono yah yakali kulonga zizo, nzogolo yikalila.

⁶¹ U Muwaha Yesu yakapituka yakamulanga Petelo. Nayo Petelo yakayikumbucila nghani yono yalonjelwa no Muwaha yono yamutya, “Zuwali lono nzogolo yowa yikali si nalila, kowa wakondya kunghana kali kadatu.”

⁶² Baho Petelo yakalawila kunze, yakalila muno muno.

Yesu yakuzwajizwa no kutowa

⁶³ I wanhu wawalya wono wamwibata Yesu, wakamutowa no kumuzwajiza.

⁶⁴ Wakamuwopa na citambala ku meso, wakamuwuza, wakutya, “Ta ucitambulilaje, mono yakutowile nani?

⁶⁵ Wakamutovulanga no kumulonganga makani menji ga maligo.”

Yesu hamwande ye libalaza

⁶⁶ Waza kwela, mukungʼano we walongola we wanhu wakekongholela hamonga ne Wakohani wawaha hamonga ne wejizi wo Wulajilize, wakamutegula Yesu hamwande ye libalaza lyawo.

⁶⁷ Nawo wakamutya, “Cilonjelaje ta, hono yo gwegwe Kilisito.” Ninga mwene yakawatya, “Hamba nimulonjelenyi, si mokwihuwila ngʼo,

⁶⁸ na hamba hono nimuwuzenyi, si momhitula.

⁶⁹ Ninga kuwulawa lulu momuwona u Mwana wo Munhu yekaye ku muwoko wo kulume wo Mulungu.”

⁷⁰ Baho wose wakatya, “Alu wo wutya agwe wuli Mwana wo Mulungu hongo?” Nayo yakawatya, “Nyenye mukulonga vyono, he yo nene.”

⁷¹ Nawo wakatya, “Alu kanyhi cosaka wuhomelezi wa cici? Hambi sese weneco nha cimuhulika yakulonga ko mulomo wakwe mweneco.”