Luka 20 - I CILAGANE CIPYA 1991

Muli zo Wulajilize wa Yesu

¹ Kukawa izuwa linji, lono yawejizaga wanhu mu Nyumba yo Mulungu, no kuganula Luganuzi Luswanu, Wakohani wawaha ne wejizi wo Wulajilize ne wanyamhala wakamuziza,

² wakatya, “Ucilonjele ta! Ukunoza zizi ko wulajilizeci?”

³ Yesu yakawatya, “Nane nomuwuzenyi nghani monga,

⁴ uwulajilize wa Yohana wo kubaputiza, walawa kuli Mulungu hamba kuli wanhu?”

⁵ Wakanza kulongana weneco wose wakatya: “Hono citye walawa ku wulanga, mwene kotya; ‘Alo so cici si mwamwihuwila?’

⁶ Na hono citye, walawa kuli wanhu, wanhu wose wocitowanga ne mabwe, hambi wose nha wehuwiye vyono Yohana yali muwizi.”

⁷ Hodu, wakamutya, “Sicimanyile Wulajilize wuwo kono walawa.”

⁸ Nayo Yesu yakawatya, “Hamba na nene si nomulonjelenyi, ko wulajilizeci wono wukuleka nghunoza zizi”

I cihwanicizo co mugunda we Mizabibu ne walimi

⁹ Yesu yakajendelela kuwalonjela wanhu cihwanicizo cici. “Munhu yunji yalima mugunda wa mizabibu, yakawika walimi, mwene yakabita ku yisi yinji ya kutali, yakekala kuko kwa vilo vinji.

¹⁰ Mwipango lyo wupilo we mizabibu, yuyo munhu yakatuma mwitumami wakwe kuli wawalya walimi, wamupele mikalo ya mu mugunda we mizabibu, ninga walimi wakamutowa, wakamuwinga yali bwete.

¹¹ Yuyo munhu yakatuma mwitumami yunji kanyhi; nayo wakamutowa nha vivilya no kumutendela vibi, wakamuwinga yali bwete.

¹² Yakatuma sunga na we kadatu; nayo wakamutamisa no kumutaga kunze.”

¹³ Ayulya munya mugunda yakehwesa; “Alu notenda wule? Nomutuma mwanangu mwendece, lunji yuyo womogopa.”

¹⁴ Ninga walimi waza muwona, wakalongana weneco wose, wakutya, “Ayu yo muhazi, alenyi nye cimuwulaje, wuhazi wuwe wetu.”

¹⁵ Wakamulavyaniza mu mugunda we mizabibu wakamuwulaga. Yesu yakawawuza, “Alu u munya mugunda konoza nhawule kuli wawo walimi?

¹⁶ Kolokuza yawawulaje walimi wawo, no mugunda we mizabibu, kopela walimi wanji.” I wanhu waza kuzihulika i zinghani zizo, wakabeza wakatya, “Siyosumika hamba hadodo.”

¹⁷ Ninga Yesu yakawalanga, yakawatya, “Mandiko gaga gono Gelile alu gena nhunizo ci? ‘Ilibwe lyono walilema Wazenji, Alu lyonozwa kuwa iwaha lyo musinji!’

¹⁸ Munhu wo wose mono kogwila mucanyha ye libwe lilyo, kobenanjika benanjika, na hono limugwile munhu wo wose, lyomutijinha ticitici.”

I Nghani yo kulipa kodi

¹⁹ I wejizi wo Wulajilize ne Wakohani wawaha, wakatanga vyono cihwanicizo cici, cali ciwadomile weneco, na ku soko yiyo, wahilaga wamwibate baho baho, ninga wakogopa wanhu.

²⁰ Holeka wakawa wakulondola londola cilejeho cono cikwiliye. Wakawafupa wanhu wanji, wenoze nha wanhu waswanu, waawa kuwatuma wabite wamugwizize Yesu mu wulonje wakwe, ho wasume kumwibata no kumutegula ku wawaha we Selekali.

²¹ Wawo wapelelezi, wakamuwuza wakutya, “Ati Mwijizi, cimanyile vyono ukulonga kanyhi ukwijiza nghani ze mbeka; cimanyile vyono si kulangaga lilumbo lya munhu, langa kwijizaga mu mbeka nzila yo Mulungu.

²² Ale cilonjelaje ta, hono viswanu kuli ase kumulipa kodi Kayisali, hamba ngʼo?”

²³ Ninga Yesu yakatanga wusugu wawo, yakawatya,

²⁴ “Ndajilenyi pesa, wulenyi, yina hwani ya nani no lwandiko lwa nani?”

²⁵ Nawo wakatya, “Vya Kayisali.” Yesu yakawatya, “Ale mumulavizye Kayisali vyakwe Kayisali, no Mulungu vyakwe Mulungu.”

²⁶ Hamba si wasuma kumugwiziza nghani yiyi baho hali wanhu, holeka wakanyamala twii, wakwizina lipitulo lyakwe.

I nghani yo wuzuce

²⁷ Hanyuma, Wasadukayo, wawo wono watezaga, wafu si wazukaga; wakamuziza Yesu wakamuwuza wakutya.

²⁸ “Ati Mwijizi, Musa yacandicila, vyono munhu hono yafwilwe no muwahawe mono yali yatolile mugolece, no kumuleka mugolece yuyo yasina wana, u mwanakwawe yamutole yuyo mugolece ho yamutujile muwahawe wana.

²⁹ Ale, kwali na wanhu mupunghati walume, wana wa munhu yumonga, u mulongozi yakatola mucekulu, hanyuma yakafwa si yaleka mwana.

³⁰ Nayo wekejete yakamutola mucekulu yuyo, nayo yakafwa,

³¹ na we kadatu nha vivilya. Zikawa nha vivyo sunga kuli wose vyono wali mupunghati, na wose wakafwa hamba kuleka wana.

³² Hanyuma u mucekulu yuyo nayo yakafwa.

³³ Alu mwizuwa lyono wafu wolozuka, mucekulu yuyu kolowa mugolece wa wahayi muli wawa? Hambi wose mupunghati nha wali wamutolile.”

³⁴ Yesu yakawatya, “I wanhu wa kononze yiyi, watolaga, watolagwa,

³⁵ ninga awalya wono Mulungu kowapela kulificila lizuwa lyo wuzuce we wafu, si wolotola hamba kutolwa.

³⁶ Na mbeka hamba si wolofwa kanyhi yaye, hambi nha wokwihwana ne wamalayika; nawo wo wana wo Mulungu, vyono wazukulwa kulawa mu wafu.

³⁷ Ninga wafu vyono wazukaga, sunga na Musa yayilajila nghani yiyo mu Mandiko gono Gelile, za ha cititika cono cakaga moto, lono yakumucema Muwaha, yakumutya, u Mulungu wa Abulahamu, Isaka na Yakobo.

³⁸ Holeka mwene si Mulungu we wafu, langa Mulungu wa awalya iwomi. Hambi wose nha wakuwumipila muli mweneco.”

³⁹ Wanji wa mu Wejizi wo Wulajilize wakatya, “Mwijizi kulonga viswanu muno muno.”

⁴⁰ Hamba si wejelela kumuwuza nghani yinji kanyhi.

I nghani ya Kilisito

⁴¹ Yesu yakawawuza, “Nhawule yikutegwa vyono Kilisito yo mwana wa Dawudi?

⁴² Hambi Dawudi mweneco nha yakulonga mu citabu ce Zabuli, ‘U Muwaha yamutya Muwaha wangu Wikale ha muwoko wangu wo kulume,

⁴³ Sunga kolo nghuwanoza iwalugu wako wawe nha igoda lyo kuwicila migulu yako.’

⁴⁴ Dawudi vyo yakumucema mwene ‘Muwaha,’ alu ho kawa mwanagwe nhawule kanyhi?”

Yesu yakuwakaga wejizi wo Wulajilize

⁴⁵ Ne wanhu wose lono wali wamuhulicize, Yesu yakawalonjela wejizwa, wakwe ha mwande ye wanhu wose,

⁴⁶ “Musuguce kuli wejizi wo Wulajilize wono wendile kujenda ako na ako wavwalile kanzo. Na kanyhi wendile kulamuswa kwa cogopo ne wanhu mu zisokoni, kanyhi wendile kwikala hanhu hatambule, mu matangʼanilo go wuhembelo, no kwikala hanhu hatambule ha zindigwa ze zisikukuu.

⁴⁷ Wene wakuwewonela iwacekulu wafwile, no kuwasolela ivinhu vyawo, akuno wakwinoza nha waswanu, so wulomba wulombe wutali muno ko wukoci. Wawo wotuga wulipicizwe wuwaha muno muno mwizuwa lye ningʼaniza.”