Luka 13 - I CILAGANE CIPYA 1991

Hono mulece kuleka wubi wenyu, mofwa

¹ Madaha gago, kwali kowali wanhu wanji wono wamulonjela Yesu ze wanhu wa ku Galilaya, wono Pilato yawawulaga mu cipango cono wawulagaga mitugo yawo yo kukumbicila.

² Nayo Yesu yakawatya, “Alu mukuwona Wagalilaya wawo wali wabi muno kuciza Wagalilaya wose, vyono watamiswa nha vivyo?

³ Nghumutyenyi, ngʼo ye; ninga na nyenye hono mulece kunena, molofwa wose nhavivyo.

⁴ Hamba wanhu walya we likumi na munana wono wagwilwa no munala ku Silowami, wakawulagwa, mukuwona mbi wawo wali wabi, wacizize wose wono wekaye ku Yelusalemi?

⁵ Nghumutyenyi, ngʼo ye, ninga nanye hono mulece kunena, molofwa wose nhavivyo.”

I Cihwanicizo co Mukuyu wono siwulelaga

⁶ Hanyuma Yesu yakawalonjela cihwanicizo cici. “Munhu yunji yali yena mukuyu muhadikwe mu mugunda wakwe; u munhu yuyo yakabita yakusaka kuhepa mikalo mu mukuyu wuwo, ninga yakawagana wukali si nalela hamba hadodo.

⁷ Yakamutya u mulindiliza mugunda, langa ta, myaka yiyi midatu, nizaga ho hepe mikalo mu mukuyu wuwu, hamba kuyiwona ngʼo, ale wutemangaje; so cici lo wukwidawalila muhangha bwete?”

⁸ Nayo yakapitula yakamutya, “Muwaha, uwulekaje kanyhi mwaka wu, niwuzuwile, niwutajile ne mboleya;

⁹ nawo hono wulele mikalo hanyuma, viswanu; ninga hono wulece kulela, langa ho kowutemanga.”

Yesu yakumuponya mucekulu yunji mwizuwa lye Sabato

¹⁰ Yesu yakawa yakwijiza mu nhangʼanilo yinji yo wuhembelo, mwizuwa lye Sabato.

¹¹ Baho hah na mucekulu mono yali mutamwa myaka ikumi na munana, yali na icisi lyavu lyono lyali limwinjiye, na ku soko yiyo, u muwili wakwe yali yekunyile, hamba siyasumaga kugoloka hamba nhavi.

¹² Yesu yaza kumuwona yakamucema, yakamutya, “Yaya, waponywa wutamwa wako.”

¹³ Yakamuwicila miwoko yakwe; lo lulo lulo muwili wakwe wukagoloka yakamulumbo Mulungu.

¹⁴ Ninga u muwaha we nhangʼanilo yo wuhembelo yakasimba vyono Yesu yamuponya u mucekulu yuyo mwizuwa lye Sabato, na ho baho yakawa kuwalonjela wanhu wono wali wekonghoye baho, yakutya, “Ko vili vilo mutandatu vyo kwitumila mulimo, holeka mu vilo vivyo, mweze kuza kulagulwa, langa mwizuwa lye Sabato ngʼo.”

¹⁵ Ninga Muwaha yakamupitula, yakatya, “Nye mo wakoci, ma, muli nyenye moyuli yunji mono si katulusaga ngʼombe yakwe hamba ndogowe yakwe, no kuzingʼwesa mwizuwa lye Sabato?

¹⁶ Alu yuyu, nayo mwana wa Abulahamu, mono Setani yali yamulemaze mu myaka yiyi ikumi na munana, wulenyi, si vyali viswanu kumuponya mu wutamwa wakwe wuwo mwizuwa lye Sabato?”

¹⁷ Yaza kukondya kulonga zizi, walugu wakwe wakapuwa wose; ne wanhu wose wakasecelela, ku so zinghani ze lilumbo zose, zono zetumwa no mwene.

I Cihwanicizo ce mbeyu ndodo ya Haladali

¹⁸ Yesu yakawuza; Uwutemi wo Mulungu winha wule? Nowihwananiza na cici?

¹⁹ Wihwanile ne mhece ya Haladali, yono munhu yunji yakayisola, yakayihadika mu mugunda wakwe, yikacindika, yikawiluka, wukawa mubici, ne zindeje za mucanyha zikazenga i manhuli gazo mu manhambi gayo.

I Cihwanicizo ce cisase

²⁰ Kanyhi yakawawuza, “Nowulingʼaniza na cici U wutemi wo Mulungu?

²¹ Wihwanile ne cisase cono yasola mucekulu yunji, yakacihanza hanza mu wusaje we idebe limonga sunga wose wukatumba.”

U Mulango mufinyu

²² Yesu yakajendelela no muhinzo wakwe yakubita ku Yelusalemi kuno yakukolela mu makaya na mu vitumbi, yakuganula.

²³ Munhu yunji yakamuwuza; “Ati Mwijizi, alu wono wakupona wacefu?”

²⁴ Yesu yakawatya, Muhidimbale kwinjila mu mulango mufinyu, hambi nha nghumulonjelenyi mbeka, vyono wenji wojela kwinjila, ninga si wosuma.

²⁵ Cipango cokuza, cono munya kaya kokwinuka, no kudinda mulango, nanye molokwanza kwima kunze, no kukongʼonha ha mulango, mukutya, “Muwaha, ucidigulile mulango.” Nayo kolopitula yawe kumutyenyi, “Si nghumumanyenyi kono mulawile!”

²⁶ Nanye mokwanza kumulonjela, mukutya, “Ase yo sese mono calizaga no kungʼwa hamonga nagwe, nagwe wejizaga mu vitumbi vyetu.”

²⁷ Nayo kolotya, “Nghumutyenyi, simanyile kono mulawile; muwuce hono mwande yangu, anye wose mono mwitumaga zo wubi.”

²⁸ Kuko kolowa cililo no kugwezula meno, baho mulaza wawona Abulahamu, Isaka na Yakobo ne wawizi wose, wali mu wutemi wo Mulungu, ninga anye mukutagwa kunze!

²⁹ Wanhu wolokuza wakulawa kucilima na kumwezi, kusumuka na kutakama, wokuza no kwikala ha zindigwa mu wutemi wo Mulungu.

³⁰ Na lanjenyi ta, kowali wa munyuma wono wolowa walongozi, na kowali walongozi wono wolowa wa munyuma.

U Wendo wa Yesu kuli Yelusalemi

³¹ Mu cipango cico Wafalisayo na wanhu wanji wakamuziza Yesu, wakumutya, “Uwuce baha ubite hanhu hanji: hambi Helode nha yakuhila kukuwulaga.”

³² Yesu yakawatya “Bitenyi nye mukalilonjele licewe lilyo. Langa ta, izuwali ne mitondo, nghulavya macisi no kuponya watamwa, ne lizuwa lye kadatu nowa nayikondeleza i milimo yangu.”

³³ Hamba nhavivyo izuwali, mitondo ne cilawu, yinojeye njendelele no muhinzo; hambi nha si yinojeye muwizi yawulajilwe kunze ya Yelusalemi.

³⁴ “Yelusalemi! Gwe Yelusalemi! Kuwawulagaga wawizi, no kuwatowa na mabwe wono wakutumwa kuliʼgwe! Kalinga nali kuhila kuwakongholela wanago hamonga, nha vyono nghuku yikunyanjilaga viziyoziyo vyayo mu mabawa gayo, ninga walemaga?

³⁵ Lanje ta i Nyumba yo Mulungu wako yolekwa. Heya, mbeka, nghumutyenyi, Si molombona ngʼo sunga kolo mukutya, ‘Yo mumoti mono yakuziza mwitagwa lyo Muwaha.’ ”