1 Wakolinto 6 - I CILAGANE CIPYA 1991

I masitaka kuli wandugu we Cikilisito

¹ Alu nhawule muyenyu wa muli nyenye, yadahile kwijelela kumusitaka u mukilisito muyagwe kuli mahakama ge wanhu wono si wamumanyile u Mulungu, hamba si yakusuma kumusitaka kuli wanhu wo Mulungu?

² Hamba si mumanyile lo, vyono i wanhu wo Mulungu wo woloyilingʼaniza i yinze? Alu hono kumbe yinze yololingʼanizwa na nyenye, alu kusoko ci muwe si munojeye kwiyilingʼaniza hamba muli izinghani zi ndodo ndodo?

³ Alo si mumanyile vyono colowalingʼaniza wamalayika? Wulenyi, ho sicosuma kuzilingʼaniza zinghani ze mikalile ye nhondo zose!

⁴ Alu anye lono mwatuga mazozo nyenye wose, muli ze mikalile ye nhondo zose, hanyuma kanyhi mukuwacema i wahakimu, i wanhu wono si wakulikumya hamba likanisa wo wawe wahakimu wenyu?

⁵ Mbeka yo nghani ya cevu kulinye! Alu hongo wo wutya, hasina munhu hamba monga muli nyenye, mono kowa ne mahala go kusuma kulingʼaniza muli wawo Wakilisito?

⁶ Alu du mbeka weza nha wuzowele wenyu kuli we ndugu, yakumutegula u nduguye kuli mahakama, kanyhi hamba nha vivyo, kuli wanhu wono si wehuwiye.

⁷ I mbeka du, wuwo u wisitace wenyu wono mukwisitaka nyenye wose, wukulajila vyono anye mwasumilwa lukulu! Alu wulenyi, si yali yiwe yili ciba kulinye hono mutendelwe yono si yili lingʼani? Kanyhi si yali yiwe viswanu muno kulinye, hono wamubocenyi i zisawo zenyu.

⁸ Alu kanyhi yo nyenye mono mukuwatendela vibi wandugu zenyu nyenye wose, kanyhi no kwihiziza nyenye wose munhu na munhu muyagwe!

⁹ Hamba si mumanyile lo, vyono i wanhu wabi, si wosuma kuwuhala u Wutemi wo Mulungu? Ale, mulece kwikonga! Iwanhu wono wekalilaga mu mikalile yo wusenyha, na wono wahembaga vihwani, na wono wakwisulumila walume wose, hamba wono wakwitendya,

¹⁰ hambe wahizi, hamba i wabuguci, hamba i wagaloʼjimbi, na wono wendile kuwaheha i wayawo, ne walambilambi wose, wawo wose si wosuma kwinjila mu Wutemi wo Mulungu.

¹¹ Nanye wanji muli nyenye vyo mwali, ninga aluno mwahovugwa mu wubi, mukanozwa muwe mwelile, no kusiwanulwa so Mulungu, mukalamulwa no Mulungu, mwitagwa lyo Muwaha Yesu Kilisito na ko Muhe wo Mulungu wetu.

Muyitumamilaje i miwili yenyu mu lukumyo lo Mulungu

¹² Lunji munhu kosuma kutya, “Kuliʼne vyose viswanu.” Heya, ninga si vyono vyose vyowa vikwiliye, aa, ngʼo. Ninga nghuvumila vyono kuliʼne hasina cinhu cinji co mwiko, ninga hamba yiwe yili nhavivyo, ane si nendile kutemwa na cinhu co cose.

¹³ Kosuma kutya, “Indigwa yili so yinda, nayo yinda yili so ndigwa.” Heya, ninga u Mulungu, kolovihodanga vyose vyono vyejete. Ninga u muwili wo munhu si wawumbwa ho witumamilwe mu wusenyha, aa, ngʼo, langa wawumbwa ho wumwitumamile u Muwaha, nayo u Muwaha so muwili.

¹⁴ Ale u Mulungu mono yamuzukula u Muwaha muli wafu, kocizukula na sese nha vivyo kwe vilungo vyakwe.

¹⁵ Hamba si mumanyile lu, vyono i miwili yenyu vyo vilunzwa vyo muwili wa Kilisito? Hamba mukwihwesa vyono nosuma kucisola i cilunzwa cimonga co muwili wa Kilisito, no kucinoza cilunze no muwili wo musenyha? Hamba hadodo bwete!

¹⁶ Hambi nha mumanyile vyono, mono vikwilunza no musenyha, yakuwa muwili monga nayo, nha vyono yandicigwe, “Nawo wawo wejete, wowa muwili mumonga.”

¹⁷ Ninga kuli mono vikwilunza no Muwaha yuyo vikuwa muhe monga nayo.

¹⁸ Holeka muwulecelaje lukulu u wusenyha. U wubi wunji wose wunozezagwa kunze yo muwili, ninga u musenyha, kawunozezaga u wubi wuwo mu muwili wakwe mweneco.

¹⁹ Wulenyi si mumanyile vyono i miwili yenyu yo Nyumba yo Muhe Mono Yelile mono yali mugati mwenyu, mono mwamubocela kulawa kuli Mulungu? Holeka alu nanye, si muli wenyu mo weneco.

²⁰ Mwagulwa ko wuguzi wukamu. Holeka ku sokoyiyo, muyitumamilaje i miwili yenyu ko lukumyo lo Mulungu.