ዮሃኒሳ ቆንጬ 14 - ኦራ ጫቁዋ ጎፋዶርሳኔ 144፥000 ኣሳ 1 ሄሳፌ ጉዬ፥ ዶርሳይ ፂዮኔ ዴሪያ ቦላ ኤቂዳይሳ ቤዓስ። ኢያራ ኢያ ሱንይኔ ኢያ ኣዋ ሱንይ ኤንታ ሶምዖን ፃፌቲዳ፥ 144፥000 ኣሳይ ዴዔስ። 2 ሳሎፔ ጊታ ሃ ጉንኔ ዳዳ ጉን ዳኒያ ዎልቃማ ጊርሲ ሲዓስ። ቃሲ ታ ሲዒዳ ጊርሳይ ዲ ዲፂሺን ሲዔቲያ ጊርሳ ሜላ። 3 144፥000 ኣሳይ ኣራታ ሲንን፥ ኦይዱ ዴዖን ዴዒያ ሜቴታ ሲንኒኔ ጪማታ ሲንን ኤቂዲ ኤንታፌ ሃራ ኦኒካ ታማራናው ዳንዳዖና ኦራ ማዝሙሬ ዬፂዶሶና። 4 ሃይሳቲ ማጫሳራ ባንታና ቱኒሶና ናጊዳ ጌሻታ። ኤንቲ ዶርሳይ ቢያሶ ኡባ ካሎሶና። ኤንቲ ፆሳሲኔ ዶርሳስ ባይራ ጊዲዲ፥ ሺቃናው ሳዓ ኣሳ ጊዶፌ ዎዜቲዶሶና። 5 ኤንቲ ዎርዶይኔ ቦሬይ ባይና ኣሳታ። ሄ ኪታንቾታ 6 ሄሳፌ ጉዬ፥ ሜሪና ዎንጌላ ሳዓ ቦላ ዴዒያ ካዎቴ ኡባስ፥ ዜሬ ኡባስ፥ ያራ ኡባሲኔ ዱማ ዱማ ዶና ኡባስ ማርካታናው ሳሎራ ፒራያ ሃራ ኪታንቾ ቤዓስ። 7 ሄ ኪታንቾይ ባ ቃላ ቁ ኦዲ፥ «ፆሳይ ኣላሚያ ፒርዲያ ሳቴይ ጋኪዳ ጊሾ ፆሳስ ያዪቴ፤ ኢያ ቦንቺቴ። ሳሎ፥ ሳዓ፥ ኣባኔ ፑልቶ ሃ ሜዳ ፆሳ ጎይኒቴ» ያጊስ። 8 ኮይሮይሳ ካሊዲ ሃራ ናምዓን ኪታንቾይ፥ «ዴሬ ኡባ ቱናኔ ማያ ዎይኔ ኡሺዳ፥ ጊታ ባቢሎኔይ ኩንዳሱ! ኩንዳሱ!» ያጊዲ ዋሲስ። 9 ሄን ኪታንቾይ ኤንታ ካሊዲ፥ ባ ቃላ ቁ ኦዲ፥ «ዶዓኔ ኢያ ሚሲሊያ ጎይኒያ ቃሲ ኢያ ማላ ባ ሶምዖን ዎይኮ ባ ኩሼን ዎያ ኦኒካ ዴዒኮ፥ 10 ኢ ሃንቆ ፁዓን ኩሚዳ ፆሳ ሃንቆ ዎይኒያ ኡያና። ኤንቲ ጌሻ ኪታንቾታ ሲንኒኔ ዶርሳ ሲንን ኤፂያ ዲኔ ታማን ዋዬታና። 11 ኤንታ ዋያ ጩያይ ሜሪ ሜሪናው ጩዪሼ ዳና። ዶዓኔ ኢያ ሚሲሊያ ጎይኔይ ቃሲ ሄ ዶዓ ሱን ማላይ ዴዒያ ኦኒካ ቃማኔ ጋላስ ሼምፖይ ባይና ካዔታና» ያጊስ። 12 ፆሳ ኪታ ናጌይሳቲኔ ዬሱሳ ኣማኔቴይሳቲ ጌንጪያ ሚኖቴይ ቆንጪያ ዎዴይ ሄሳ። 13 ሄሳፌ ጉዬ፥ «ሂዛፔ ጎዳን ሃይቄይሳቲ ኣንጄቲዳይሳታ» ያጊያ ቃላ ሳሎፔ ሲዓስ። ኣያናይ፥ «ኤ ቱማ፥ ኤንታ ኦሶይ ኤንታ ካሊያ ጊሾ ኤንቲ ባንታ ዳቡራፔ ሼምፓና» ያጌስ። ካ ሺሾ ዎዴ 14 ሄሳፌ ጉዬ፥ ቦ ሻራ ቦላ ኡቲዳ ኣሳ ናዓ ዳኔይሳ ቤዓስ። ኢ ባ ሁዔን ዎርቃ ካላቻ ዎስ፤ ቃሲ ባ ኩሼን ባጫ ኦይኪስ። 15 ሃራ ኪታንቾይ ፆሳ ኬፌ ኬዪዲ፥ ሻራ ቦላ ኡቲዳይሳኮ ባ ቃላ ቁ ኦዲ፥ «ካ ሺሾ ዎዴይ ጋኪዳ ጊሾ ኔ ባጫ ዬዳዳ ካ ጫካ፤ ሳዓን ዴዒያ ካይ ጋኪስ» ያጊስ። 16 ያቲን ሻራ ቦላ ኡቲዳይሲ ባ ባጫ ሳዓ ዬዲዲ፥ ሳዓን ዴዒያ ካ ጫኪስ። 17 ቃሲካ ሳሎን ዴዒያ ፆሳ ኬፌ ሃራ ኪታንቾይ ኬዪስ፤ ኢያዉካ ኦጮ ባጪ ዴዔስ። 18 ታማ ቦላ ማቲ ዴዒያ ሃራ ኪታንቾይ ያርሾ ቤሳፌ ኬዪስ። ኢ ባ ቃላ ቁ ኦዲ ኦጮ ባጫ ኦይኪዳ ኪታንቹዋኮ፥ «ዎይኔ ኣይፌይ ቴሪዳ ጊሾ ኔ ኦጮ ባጫ ዬዳዳ፥ ሳዓን ዴዒያ ዎይኒያፔ ቃንፃ» ያጊስ። 19 ሄ ኪታንቾይ ባ ባጫ ዬዲዲ፥ ሳዓን ዴዒያ ዎይኒያፔ ቃንፂዲ፥ ፆሳ ጊታ ሃንቁዋ ጉምዒያ ቤሳን ዬጊስ። 20 ኤንቲ ካታማፔ ጋፃን ዴዒያ ዎይኔ ኣይፌ ጉምዒያ ቤሳን ዬቲዶሶና። ሱ ዎይኒያ ጉምዒያ ቤሳፌ ኬዪዲ ኢሲ ሙኩሉኔ ኡስፑን ፄቱ ኪሎ ሚቲሬ ሜላ ሃኪዲ፥ ፓራ ፑሎ ጋኪያ ሜላ ኤሊዲ ቁ ጊስ። |