Ibraawe 1 - ኦራ ጫቁዋ ጎፋ

ናዓይ ኪታንቾታፔ ቦላ

¹ ካሴ ፆሳይ፥ ኑ ኣዋታስ ናቤታ ባጋራ ዱማ ዱማ ኦጌን ዳሮ ዎዴ ኦዲስ።

² ሺን ሃ ዉርሴ ዎዲያን ኡባ ኢያ ላቲሲዳ ቃሲ ኣላሚያ ኢያ ባጋራ ሜዳ ባ ናዓ ባጋራ ኑስ ኦዲስ።

³ ናዓይ ፆሳ ቦንቹዋ ጶሌኔ ኩሜ ፆሳ ፆሳቴ ኤኪዲ፥ ባ ዎልቃማ ቃላን ሃ ኣላሚያ ካቲሲዲ ኦይኪስ። ኣሳ ኤንታ ናጋራፔ ጌሺዳፔ ጉዬ ኡባፌ ቦላ ፆሳ ኡሻቻ ባጋን ሳሉዋን ኡቲስ።

⁴ ኢያው ኢሜቲዳ ሱንይ ኪታንቾታ ሱንፌ ቦላ ጊዴይሳዳ ኢ ኤንታፌ ቦላ።

⁵ ሂዛ፥ ፆሳይ ኪታንቾታፔ ኦዴኮ፥ «ኔኒ ታ ናዓ፤ ታ ሃቺ ኔው ኣዋ ጊዳስ» ጊዴ? ዎይኮ ቃሲ ኦዴኮ፥ «ታኒ ኢያው ኣዋ ጊዳና፤ ኢካ ታው ናዓ ጊዳና» ጊዴ?

⁶ ቃሲ ፆሳይ ባ ባይራ ናዓ ሃ ኣላሚያ ኪቲሼ፥ «ፆሳ ኪታንቾቲ ኡባይ ኢያው ጎይኖ» ያጊስ።

⁷ ፆሳይ ኪታንቾታባ ኦዲሼ፥ «ፆሳይ ባ ኪታንቾታ ጫርኮ፥ ባ ኣይሌታ ታማ ላጮ ኦስ» ያጌስ።

⁸ ሺን ባ ናዓባ ኦዲሼ፥ «ፆሳው፥ ኔ ካዎቴይ ሜሪናው ዴዔስ። ኔ ካዎቴ ኔ ፂሎቴን ኣይሳሳ።

⁹ ኔኒ ፂሎቴ ዶሳዳሳ፤ ኢታ ኢፃዳሳ። ፆሳይ፥ ኔ ጎዳይ፥ ኔና ኔ ላጌታፔ ኣዲ ዶሪስ፥ ኡፋይሳ ዛይቴ ኔና ቲዪስ» ያጌስ።

¹⁰ ፆሳይ ዛሪዲ፥ «ጎዳው፥ ኮይሮ ኔኒ ሳዓ ሜዳሳ፤ ሳሎቲ ኔ ኩሼ ኦሶ።

¹¹ ሄሳቲ ኡባይ ያና፤ ሺን ኔኒ ዳና። ኤንቲ ኡባይ ኣፊላዳ ዉራና።

¹² ኔኒ ኤንታ ሳሌናዳ ፃፃና፤ ቃሲ ኤንቲ ኣፊላዳ ላሜታና። ሺን ኔኒ ኡባ ዎዴ ኔና፤ ኔ ላይይካ ዉሬና» ያጌስ።

¹³ ሺን ፆሳይ ኪታንቾታፔ ኦዴኮ፥ «ታኒ ኔ ሞርኬታ ኔ ቶሆይ ዬያሶ ኦና ጋካናው፥ ሃይሳን ታፔ ኡሻቻ ባጋን ኡታ» ጊዴ?

¹⁴ ኪታንቾቲ ኡባይ ኣቶቴ ዴማናው ዴዒያ ኣሳታ ማዳናው ፆሳይ ኪቲዳ ኣያናታ ጊዶኮናዬ?