2 ቆሮንቶሳ 12 - ኦራ ጫቁዋ ጎፋጳዉሎሳ ቆንጬ 1 ጬቄቴስ ጎዒ ባይናይሳ ኤራይስ። ሺን ጬቄታናው ኮሺኮ፥ ጎዳፔ ኤኪዳ ቆንጬን ጬቃና። 2 ታማኔ ኦይዱ ላይፌ ካሴ፥ ኪሪስቶሳ ኣማኒያ ኢሲ ኡራይ ሄን ሳሉዋ ቢዳይሳ ታ ኤራይስ። ሄ ኡራይ ኣሾን ዎይኮ ኣሾፔ ካሬራ ቢዳኮ ታ ኤሪኬ፤ ፆሳይ ኤሬስ። 3 ሄ ኡራይ ሄን ሳሉዋ ኤኬቲዳይሳ ኤራይስ። ሺን ኢ ኣሾን ዎይኮ ኣሾፔ ካሬራ ኤኬቲዳኮ ታ ኤሪኬ፤ ፆሳይ ኤሬስ። 4 ሄ ኡራይ ጋናቴ ኤኬቲዲ ኣሲ ቆንጪሳናዉኔ ኣሲ ኦዳናው ዳንዳዖናባ ሲዒስ። 5 ታኒ ሄ ኣዲያባን ጬቄታና፥ ሺን ታኒ ታ ዳቡራፔ ኣቲን ታናን ጬቄቲያባይ ባዋ። 6 ታኒ ቱማ ኦዴቲያ ጊሾ ጬቄታናው ኮይኮካ ኤያ ጊዲኬ። ሺን ኣሲ ታ ኦይሳ ቤዔይሳፌኔ ሲዔይሳፌ ኣዲ ቆፖና ሜላ ጋዳ ጬቄቴ ኣጋይስ። 7 ታው ቆንጪዳ ጊታ ቆንጬን ታ ኦቶርቶና ሜላ ታና ዋይሳናው ታ ኣሹዋን ጫዲያ ፃላሂያ ኪታንቾይ ታው ኢሜቲስ። 8 ሃ ዋይሲያባ ታፔ ዲጋና ሜላ ታኒ ጎዳ ሄ ቶሆ ዎሳስ። 9 ሺን ጎዳይ፥ «ታ ዎልቃይ ኔ ዳቡራን ቆንጪያ ጊሾ ታ ኣ ኬሃቴይ ኔው ጊዳና» ያጊስ። ኪሪስቶሳ ዎልቃይ ታናን ቆንጫና ሜላ ታ ዳቡራን ኡፋይታሼ ጬቄታይስ። 10 ታኒ ኪሪስቶሳ ጊሾ ዳቡሪያ ዎዴ ጫዬቲያ ዎዴ ዋዬቲያ ዎዴ ጎዴቲያ ዎዴ ሜቶቲያ ዎዴ ታ ዳቡራን ኡፋይታይስ። ኣይስ ጊኮ፥ ታ ዳቡሪያ ዎዴ ሄ ዎዴ ሚናይስ። ጳዉሎሲ ቆሮንቶሳ ኣሳስ ቆፔስ 11 ታኒ ኤያ ኣሳዳ ጬቄታስ። ሄሳዳ ታ ጬቄታና ሜላ ኦዳይ ሂንቴና። ታ፥ ታ ሁዔን ኤሬቶና ኣሲ ጊዲኮካ፥ «ጊታ ሃዋሬታ» ጌቴቴይሳታፔ ጉፂኬ። ሄሳ ታው ማርካታናው ቤሴይ ሂንቴናሺን። 12 ታ ሂንቴ ጊዶን ዴዓሼ ዳንዳዓን ኦዳ ማላታቲኔ ማላቲ ታ ቱማ ሃዋሬ ጊዴይሳ ቤሶሶና። 13 ታ ሂንቴው ቶሆ ጊዶናይሳፌ ኣቲን ሃራ ዎሳ ኬታፔ ሂንቴ ኣይቢን ጉፂዴቲ? ሄሲ ባላ ጊዲኮ ታና ማሪቴ። 14 ታኒ ሂንቴኮ ባናው ጊጌቲሺን ሃይሲ ታው ሄን። ታ ሂንቴናፔ ኣቲን ሂንቴው ዴዒያባ ኮዮና ጊሾ ሂንቴና ዋይሳናው ኮዪኬ። ዬሊዳይሳቲ ባንታ ናይታስ ሻሎ ሚንጆሶናፔ ኣቲን ናይቲ ባንታና ዬሊዳይሳታስ ሻሎ ሚንጆኮና። 15 ታ ሂንቴ ጊሾ ታው ዴዒያባኔ ታና ኣ ኢሚንካ ታና ኡፋይሴስ። ያቲን፥ ታኒ ሂንቴና ሄሳዳ ኬሃ ሲቂያ ዎዴ ሂንቴ ታና ጉራ ሲቄቲ? 16 ጊዲኮካ፥ ታ ሂንቴው ቶሆ ጊዲኬ፤ ዋይሳቢኬ፤ ሺን ሂንቴና ጪሞኒኔ ጌኔን ኦይኪዳባ ሂንቴው ዳኖና ኣጌና። 17 ሃሪ ኣቶሺን፥ ታ ሂንቴኮ ኪቲዳ ኣሳታፔ ሂንቴና ጪሚዳ ኣሲ ዴዒ? 18 ቲቶይ ሂንቴኮ ባና ሜላ ታኒ ዎሳስ፤ ቃሲ ኣማኒያ ኢሻካ ኢያራ ዬዳስ። ያቲን፥ ቲቶይ ሂንቴና ጪሚዴ? ኑኒ ኑ ኦሱዋ ኢሲ ኣያናን ኦቦኮ? ቃሲ ኑ ሃኖይካ ኢሲኖ ጊዴኔ? 19 ኑ ኡባ ዎዴ ሂንቴ ሲንን ኑና ፂሊሳናው ሞቴቲያባ ሂንቴው ዳኒ? ኑ ኪሪስቶሳን ዴዒዲ ፆሳ ሲንን ሃዒ ጋካናው ኦዶስ። ኑ ሲቆ ኢሻቶ፥ ኑ ሃ ኡባ ኦይ ሂንቴና ዲቻናሳ። 20 ታ ሂንቴኮ ቢያ ዎዴ ኦኒ ኤሪ ሂንቴ ታ ኮዬይሳዳ ሃኖና፥ ቃሲ ታካ ሂንቴ ኮዬይሳዳ ሃኖና ጋሄቶና ኣጎኮ ጋዳ ያያይስ። ቃሲ ኦኒ ኤሪ ሂንቴ ጊዶን ፓላሚ፥ ቃናቴይ፥ ሃንቆይ፥ ዪቄይ፥ ዚጊርሲ፥ ኣሳ ሱን ኢሶይ፥ ኦቶሮይኔ ካቺ ዶና ኣጌና ጋዳ ያያይስ። 21 ታኒ ናምዓን ሂንቴኮ ቢያ ዎዴ ፆሳይ ሂንቴ ሲንን ታና ካዉሻና ጋዳ ያያይስ። ካሴ ናጋራ ኦዲ ሄ ባንታ ኦዳ ቱናቴፌ፥ ላይማቴፌኔ ዬላያ ኦሱዋፔ ሲሚቦና ኣሳታ ቤዓዳ ኣዛኖና ኣጊኬ ጋዳ ያያይስ። |