TITUS 2 - Bible Zulgo

Dzeŋge a mburma ka, dukw ana ndzer ŋa ya

¹ Ama kər kinehe, dzeŋge a mburma ka, dukw ana ndzer ŋa, a de a ndaka vatwa Mbulum a.

² Tsik a gà mburma ana gà màndawal ŋa ya ka, tə ta kwaya tsa. Mede tar ma ge ka, ŋgwal ŋa, dite gà mburma tì zlibe à ter a ya. Tə dzala gà gər ka, ndaka vatwa ŋa, ta gəs Mbulum a gəzləŋ tar lele. Ta waya gà asiŋ gà mburma ŋgiɗ nda gəzləŋ ilik ŋa, ta gəs gəzləŋ i təv meslè duwa ya tserdze.

³ Gà məkəs ana gà màndawal ŋa ya tekeɗe ka, kataya mbaŋa. Gwaɗa a tar ka, mede tar ma ge ŋgwal ŋa lele, kamala ana a tsahən aà Mbulum a. Ti ti ne gà ɓəzla melèvekè ahəm aà mburma lèvèk lèvèk tsa, kige tsa ti ne ɓele guzum tsa asa. Say ti ɗif ka, à dukw ana ŋgwal ŋa ya, a gà asiŋ gà mburma ŋgiɗ ivaɗ, na dite ti zezem a tar a.

⁴ Na tàa ge dər kataya ka, dite ti ɗif a dər a gà məkəs ana gà daala ŋa ya mbaŋa, meme na ta weye a gà zal tar, nda gà ɓəza tar a.

⁵ Dite i dəba ŋa ya ka, tar tekeɗe, ti sle aà mene a gà ɓəzla metsehe, ta ge a muva tsa. Ta ge a megemir i gà ma tar tehteh lele. Ta gewe a ka, dukw ana ŋgwal ŋa ya, ta gis a ahəm aà gà zal tar lele mbaŋa. Na tàa ge dər kataya ka, wura a ti tsik a dukw ana ŋgwala tsiye, aà bazlam Mbulum tsa.

⁶ Tsik a gà gawla kamala taŋa ya mbaŋa. Ta ge metsehe, ta kwara ba tar lele.

⁷ Ama kər ka, ge dukw ana ŋgwal ŋa ya ɗekɗek pəra, na dite gà asiŋ gà gawla ata tàa fə̀r aà kər i təv gà dukw ana ki ge a ŋgwal ŋa tserdze ya ka, ti zezem a kamala biy yak ata ki ge a ya mbaŋa. I təv ana ki dzeŋge a ter a ya ka, dzeŋge a tar ndaka vatwa Mbulum nda gəzləŋ ilik ŋa. Ka ti tsik a tar aɗəm dukw ana taf masakəŋa ya tsa.

⁸ Dzeŋge a tar ka, dukw ana ndzer, wura a sle a aà mewele aà kər a tsiye, na dite gà ɓəzla mene are yak tekeɗe ka, ta ge a hwarwa, aɗaba ana ta ŋget a vatwa aà metsìkè aà kər dukw ana ŋgwala tsa, zləmana ti tsik a ya asa tsiye.

⁹ Gà ɓele tekeɗe ibam ka, tsik a tar, ta gəs ahəm aà gà ɓəzla ga tar kəla pat, nda təv dukw ana tserdze ya. Ta ge a tar dukw ana a tsahən aà tar a, tə̀ sə̀rdala, ti niw bazlam tar tsa.

¹⁰ Tə zla aà tar duwa ya nda akəl a tsa asa. Ama ta ge ka, dukw ana ŋgwal ŋa ya ivaɗ, na dite gà ɓəzla ga tar ata ti sir a dər ka, tar gà ɓele ndzer a. Dukw ana ta ge a tserdze ya ka, na dite gà mburma tì zlibe a à bazlam ana ki dzeŋgekwe a aka gər Mbulum, mala məmbə̀là à kwa ya.

¹¹ Ama gà mburma Mbulum ta ge gà dukw ata i tsik a. Aɗaba ŋgat ka, a pàt a kwa à ŋgwal ŋgar ana a ge a gà mburma tserdze ndərzakka ya, a waya məmbə̀là à kwa.

¹² Mbulum a ge a kwa ŋgwal ŋgar ata ka, dite kà zazamakwa mede ana ŋgwal ŋa tsiye, nda gà dukw gər ahəɗ ana meèweke ba kwa a waya ya asa tsa. Ki ndzekwe a ika gər ahəɗ ka, nda metsehe, nda mege dukw ana ndzer ŋgwal ŋa ya. Mede kwa na à tsehin a aà Mbulum a mbaŋa.

¹³ Ndzakwa ka, nda mandza zləm, vavakwa pat ŋgwal ŋa ata Yesuw Kiristi, mala məmbə̀là à kwa à mère a ya. A mère a ka, nda mezlibe ŋgar ana tì zlibe a à ŋgat a. Ŋgat ka, Mbulum kwa batsah ŋa ana a za gà dukw tserdze ya.

¹⁴ Ŋgat a dzeye à mesife ŋgar aɗaba kwa. Kamala taŋa ya na a pəl a kwa dər à bakal kwa tserdze ya. A bara aà kwa bakal kwa ya, na dite kà nekwa gà mburma ŋgar ana gà biy ŋgar, ta vile a ba aà mege gà megemir ana ŋgwal ŋa lele ya.

¹⁵ Dzeŋge gà bazlam aaha i wetse dze ya, a mburma. Kà mà a taraha à arəv. Be à ɗaf a gà na tì dzer a zləm tsiye, ka pala a tar ahəm. fafəlawa a tar nda ndzəɗa ana Mbulum a vəlak a. Ka ta vəl vatwa a wura ilik aà metsìkè aà kər dukw ana ŋgwala tsiye tsa.