Sunwa Yuhana 9 - Bible Zulgo

¹ I dəba ŋa ya asa mbaŋa ka, gawla Mbulum mìizlam ŋana a vizl a mezleliŋ ŋgar. I təv ana a vizl aɗəm a ka, i ŋgat a mawusawus duwa a dəɗara i mbulum a aka gər ahəɗ a. Mawusawus ata ka, tàa vəlar lèkilè a ahər, aà mahə̀ndə̀kà dər i biye ana kwitsikw a.

² Aləka a hə̀ndə̀k dər iɗəm a ka, hədzək a dara iɗəm a tùtùkwtùkkwa kamala hədzək akwa ana ti tike aà batsah kusak a. Hədzək ata ka, a kaha gà gəza mbulum nda pat, a ge ziŋziŋ hinne.

³ Dite i dəba ŋa ya ka, gà dzara na tə dayara i hədzək ata ya ya. Ta vəl a tar ndzəɗa, ti neye kamala gà hìrde ya.

⁴ Ta gwaɗa a tar: «Ka zəmum kwizir tsa, kige tsa ka nəsum à slàmbah dukw mezime nda gà dizl ɗaf tsidze. Say ki dzeywim a ka, à gà mburma ana lambà Mbulum a riŋ ika yemere tar tsiye ɗekɗek pəra.»

⁵ Ama ka, tàa vəl a tar vatwa aà məbatsa mburma a biye fit kweleŋ tsa kəla. Ta vəl a tar vatwa ka, aà mesewere a tar are biy kiye ə̀zləm pəra. Medze gà dzara ata ti dzeye à ter a ya ka, a wir aà ter a ka, hinne. Mewire ŋa ka, kamala biy hìrde ya.

⁶ I huɗ kiye ə̀zləm ŋa ata ya ka, mburma ta waya məməta agəra mesewere are ata. Ama ka, ta ŋget ahər a vatwa ɓav tsa. Məməta a tsahən aà tar ka, hinne, ta weye a mimete iɗəm a, ama ka, məməta a sìrìk a ter a vatwa ivaɗ.

⁷ Gà dzara ata ka, ti ndzikiɗ ba kamala piris ana tə dùwaya, ti de a dər a gùvəl a. Ika gà gər tar ka, duwa a riŋ ikəka kamala felère Əbay ana malàmbàɗà ŋa nda gura ya. Dite yemere tar tekeɗe ka, kamala biy mburma ya.

⁸ Ambəz gər tar ka, zùbəl ŋa birìɓ kamala biy gà məkəs a asa. Gà zlir ana i bazlam tar a tekeɗe, a ndza kamala biy azil a.

⁹ Duwa a riŋ aà gà gəzləŋ tar kamala andiw mege gùvəl a malàmbàɗà ŋa nda ndzemde. Gà gwezleviyek ana aà tar a, a ɗe a ka, dèɗìɗìɗìɗe kamala gà piris ana hinne, ta ŋgil a à gà muta, tì tìz a dər a gùvəl a.

¹⁰ Dzimir aà tar kamala i hìrde ya. Aɗaba taŋa tar tekeɗe, ti dze a mburma kataya mbaŋa. Gà dzimir tar ata na ta vəl a tar ndzəɗa aà medzeye a mburma i huɗ kiye ata ə̀zləm a.

¹¹ Əbay tar ka, gawla na a kwere a tar i batsah biye ata kwitsikw a. Tə zalar ndaka ahəm gà Ibəranikwa ka, «Abadun», ndaka ahəm gà Girek tekeɗe ibam, «Apuliyun», kamala megweɗe ya ka, «Mala Swalwa. »

¹² Kamala taŋa ya, gà malahalah mesewere are ata tàa da iɗəm a ka, a zehe a gà mesewere are a riŋ sula na ti dere a ya asa.

¹³ I dəba ŋa ya ka, gawla Mbulum mendilik ŋana a vizl a mezleliŋ ŋgar. I təv ana a vizl aɗəm a ka, i tsarakara mifefile duwa a ɗera i təv ana ta vəlawa aaka duwa a Mbulum a. Ama təv ata ka, ika miɗ Mbulum, məvəɗa ŋa ka, nda gura ana tsakala ŋa hinne ya.

¹⁴ Mifefile ata a fàfəl a ka, a gawla Mbulum mendilik ŋa aaha. A gwaɗar: «Pəl à gà gawla faɗ ŋa ata tə dànaya tar aà gìgìze dula ata tə zalar Efrat a.»

¹⁵ Gà gawla ata faɗ a ka, Mbulum a tike a tar məpàslà ahər, na dite ka, ta ger a megemir i huɗ mive ata ya, kige tsa i huɗ kiye ata ya, nda gà i huɗ pat ata ya mbaŋa, nda gà ku mege i huɗ ler ata ya tekeɗe ya. Kamala taŋa ya, a ndzək tar, dite tə daha, tə tarətsa ba ikaba mburma ya təv pampam makər. Dite ka, ta bats iɗəm tsèke ŋgiɗ a ilik. Kamala taŋa ya asa, mifefile ata a ɗe aba ya ka, gawla Mbulum ata a daha, a pəl à tar kuɗa.

¹⁶ I fataya ka, i ŋgataha a gà sliwdze tar. Tar ka, hinne, tə tsala aka piris, dite ta gweɗiŋara: «Mayahaba gər gà mburma ana i fataya ka, miliyuŋ dərməka sula.»

¹⁷ I huɗ sunwa gà ata a da aka iye ya ka, i ŋgataha a gà na tə tsala aka piris a. Tar ka, nda gà petek gùvəl ika tar, mewetse ŋa pampam makər, nduzzwa kamala akwa ya, biy ŋgiɗ mbulum mbulum, dite biy ŋgiɗ aaha ka, a ndza za kəla za kəla asa mbaŋa. Gər gà piris tar ŋa a ndzikiɗ ba ka, kamala gər azil a. Na a dara i gà bazlam tar a ka, gà akwa nda hədzək, nda gà dukuməŋa a riŋ a wanawa ka, wàfùfùffa kamala asana ya.

¹⁸ Gà dukw ata pampam makər a, na a vəl màdzànàpa mesewere are ata a mburma, a bats aà tar ata mandza ŋa təv pampam makər a, tsèke ŋgiɗ ilik. Kamala megweɗe ya ka, gà akwa ata nda gà hədzək, nda gà dukw ata a wanawa wàfùfùffa kamala asana ya na a bats tar a.

¹⁹ Aɗaba gà piris ata, na a vəl a tar ndzəɗa ka, gà bazlam nda gà dzimir tar na aà məbatsa gà mburma ya. Ama dzimir tar asa ka, gər ikəka, a ndzikiɗ ba i mesiwiɗ, ti dze a dər a mburma.

²⁰ Ama gà asiŋ gà mburma ana tàa mata à gà mesewere are ata makər a tsiye ka, tàa mbəɗ à gəzləŋ tar ɓav tsa. Tə da aka miɗ aka miɗ nda mandza gurmits a bəɗ a sitene, nda gà dukw tar ana ta geye nda ahər tar ŋa, ta vaɗa gà asiŋ a nda gura ya. I ŋgiɗ ibam, nda ndzemde pampam. Biy ŋgiɗ asa tə làmbaɗa nda kur, nda gà biy ŋgiɗ asa ka, ta papazaya gà dizl. Gà dukw ata tserdze ya ka, ta ŋget a duwa tsa, ti tsereke a zləm tsa, dite ti de a nda gà sik tar ɓav tsa asa mbaŋa. Ama ku mege kataya tekeɗe ka, tì dzèye a ter a dər akaba gurmits a bəɗ hiywe pəra.

²¹ Gà mburma ata ka, tə daba aka miɗ aka miɗ nda megeye gà dukw tar hiywe. Tàa miyak à məbatsa mburma, nda matawala gà duwa tsa. Tàa vəl ba tar a mege mezelme nda təv muva, nda gà megeye akəl tar hiywe. Tə da dər aka miɗ aka miɗ kamala taŋa ya, tàa mbəɗ à gəzləŋ tar tsa.