RUMA 5 - Bible Zulgo

Yesuw a sər ba à kwa nda gà Mbulum

¹ Kamala taŋa ya, Mbulum a ne à kwa gà ŋgwal ŋa ika miɗ ŋgar ka, aɗaba ana kə̀ gə̀sakwa ŋgat nda gəzləŋ kwa ya. Ama kinehe ka, ki ndzekwe a zayya nda gà Mbulum, agəra dukw ana Yesuw Kiristi BATSAH kwa ŋa a ge ya.

² Ŋgat na a hə̀ndə̀k a kwa i vatwa ya, na dite Mbulum a ge a kwa ŋgwal, aɗaba ana kə̀ gə̀sakwa ŋgat nda gəzləŋ kwa ya. Ŋgwal dukw ata kə̀ ŋgatakwa ya ka, ki ŋgeyekwe a dər ba, aɗaba ana kà sərakwa ndzer ka, Mbulum a ta vile a kwe a mezlibe ŋgar ana tì zlibe a à ŋgat a mbaŋa ya.

³ Ama gəzləŋ kwa a ndze a ndzəɗakkà ka, agəra taŋa ɗekɗek tsa. Ki ŋgeyekwe a ba mbaŋa ka, aɗaba mesewere are ana kwa ihər ki sèwèrekwe a ya. Aɗaba kà sərakwa, mesewere are ata ka, à zlèk a kwa, ki sinikikwe a dər ba aà magəsa gəzləŋ.

⁴ Na bəla kàa simekwaha a mesewere are ata ka, gəzləŋ kwa a ŋget a ndzəɗa, a ndze a ɓəŋɓəŋ lele. Na kàa ŋgatakwa ndzəɗa kataya ka, ki dzèkwe a madzala gà gər kwa a təv Mbulum, ki sirekwe a dər ka, ŋgat na a ta gekwe a dukw ana a tsik i sida ya ya.

⁵ Na ki dzelekwe aaka a gà gər kamala taŋa ŋa ya ka, biy taf masakəŋa tsa. Mbulum à mbìɗ a kwe a dəba tsa dukw ŋgar. Aɗaba a ɗif a kwa ka, à meweye ŋgar ana a waya kwa hinne ya. A ɗif a kwa dər kataya ka, nda ahər Mezite Mesife ŋgar ana a vəl a kwa ya.

⁶ Aɗaba akahər ata piŋŋe ka, kàa ŋgatakwa ndzəɗa aà mege dukw ana ŋgwal ŋa ya tsa. Aləka i dəba ŋa ya, a ndze tits aka məpàslà ahər Mbulum ana a tike ya ka, Yesuw Kiristi a dara, a mət aɗaba kwa ana kwa gà ɓəzla bakal a.

⁷ Kà sərakwa ka, kuɗa ihər na wura à gis a məməta aɗaba mìsle ŋgiɗ a, ku mege wele ata aka nəs à məpala ahəm tsa, aka zazam lele tekeɗe ya. Na bəla mìsle ŋgiɗ ŋgat ŋgwal mburma lele ka, biy tsa, wura a gweɗe a, i gis a məməta avukw ŋgat.

⁸ Ama Yesuw Kiristi ŋgat a mət aɗaba kwa, akahər ana kwa gà ɓəzla mene are a Mbulum mba ya. Kamala taŋa ya, Mbulum a ɗif a kwa ka, à meweye ŋgar ana a waya kwa hinne ya.

⁹ Yesuw Kiristi a mət aɗaba kwa ka, a ne à kwa gà ŋgwal ŋa ika miɗ Mbulum nda məmbəz ŋgar ana a dza dər a. Aɗaba taŋa, kà sərakwa ndzer, a ta mbil a à kwa i matsəɓatsəɓ Mbulum ana zləmana a ta gis a kwa ya.

¹⁰ Akahər ana kwa gà ɓəzla mene are Mbulum mba ya ka, ŋgat nda gər ŋgar ŋa a yaha masəra ba nda gà kwa ka, nda məməta Kəla ŋgar ana a mət a. Aɗaba taŋa, kwa kinehe ka, gà masla Mbulum. Kà sərakwa, a ta mbil a à kwa ndzer kaɗəŋ ka, aɗaba Kəla ŋgar ata a mbəlara i məməta ya ya.

¹¹ Ama taŋa ɗekɗek tsa. Ki ŋgeyekwe a ba hinne mbaŋa ka, aɗaba ana kà sərakwa ndzer, Mbulum a ndze a nda gà kwa ya. A ndze a nda gà kwa ka, aɗaba Yesuw Kiristi BATSAH kwa ŋana a ne à kwa gà masla ŋgar a.

Bazlam aka gər gà Adama nda *Kiristi

¹² Dukw ana a ge ba ya ka, araha: Mburma ilik a ge bakal, dite bakal ata a dara aka gər ahəɗ a. Mimbile i bakal a tekeɗe, nda ahər mburma ilik mbaŋa. Aɗaba bakal ata na mburma ta mete a ya. Kamala taŋa ya, məməta a ndze a, ku mege a ŋga, aka gər ahəɗ tserdze, aɗaba ana tar tserdze tàa ge bakal a.

¹³ Aɗaba bakal a riŋ ika gər ahəɗ ka, daga piŋŋe, aka ana Mbulum aka tsik məpala ahəm ŋgar a Musa zukw tsiye mbaŋa. Ama akahər ana məpala ahəm a riŋ zukw tsiye ka, Mbulum a ɗamawa bakal tar tsa.

¹⁴ Ama ku mege kataya tekeɗe, daga aà gər mendze Adama ya, haa tsikw aà mendze Musa ka, mburma tserdze i ahər məməta. Ku mege tar tàa ge bakal kamala Adama ana a gəs ahəm aà Mbulum tsiye tekeɗe ka, ta matawa mbaŋa. Adama a ne ka, mendzikiɗe ba wele ana ti tsik ahər, ta gwa, a ti dere a mba ya.

¹⁵ Ama gà tar ata sula ya ka, tar pampam mbaŋa, aɗaba ŋgwal dukw ana Mbulum a vəlakwa biy taf masakəŋa ya ka, ar ka, kamala biy bakal Adama ata a ge ya tsa. Kaɗəŋ, gà mburma tserdze ta mete a ka, aɗaba bakal wele ata a ge ya ilik. Ama ŋgwal dukw ana Mbulum a ge a kwa ya ka, a za taŋa kweleŋ fètìte. Aɗaba a pise a kwa ahəm biy taf masakəŋa, a ge a kwa ŋgwal ŋa ka, nda ahər mburma ilik, kamala megweɗe ya ka, Yesuw Kiristi.

¹⁶ Dukw ana Mbulum a vəl a ka, a ge a megemir lele. Ar ka, kamala biy bakal Adama ata ya tsa. Bakal wele ata ilik a ge ya ka, Mbulum a gəs dər ŋgat a seriye, dite i dəba ŋa ya, seriye ata à gis a kwa tserdze mbaŋa. Ama biy na Mbulum a ge a kwa ŋgwal ŋa ya ka, ku mege kàa gekwa bakal pampam hinne tekeɗe, aka ne à kwa gà ŋgwal ŋa ika miɗ ŋgar, na dite seriye ŋgar ata à gis a kwa asa tsiye.

¹⁷ Kaɗəŋ, mburma ilik a ge bakal, na dite mburma tserdze ta matawa ka, aɗaba bakal ŋgar a. Ama Yesuw Kiristi, ŋgat a ge a megemir ka, pam. Nda ahər ŋgar na Mbulum a ge a kwa ŋgwal ŋa lele hinne, a sər ba à kwa nda gà ŋgat a. Aɗaba taŋa na ki ŋgetekewe a mesife ana à ndìv a tsa aà biybiy a, dite ki ta kwerekwe akaba a nda gà ŋgat asa.

¹⁸ Kamala taŋa ya, seriye Mbulum à gis a mburma tserdze ka, aɗaba Adama ana a ge bakal a ilik. I təv Yesuw Kiristi ana a ge dukw ŋgwal ŋa ya tekeɗe, kamala taŋa ya mbaŋa. Aɗaba ŋgat ilik a beye à mburma tserdze i seriye Mbulum a, dite a vəl a tar mesife asa mbaŋa.

¹⁹ Aɗaba kà sərakwa, gà mburma hinne, ti ne gà ɓəzla bakal ka, agəra wele ata ilik a gəs ahəm aà Mbulum tsiye. I təv Yesuw Kiristi tekeɗe, ar ka, kamala taŋa ya mbaŋa. Gà mburma hinne, ti ne gà ŋgwal ŋa ika miɗ Mbulum ka, aɗaba ana ŋgat ilik a gəs ahər ahəm a.

²⁰ Ama Mbulum a vəl məpala ahəm ŋgar a Musa ka, i dəba ŋa ya dite bakal a səkah aka gà mburma hinne asa ivaɗ. Ama na bakal aka səkah ka, ŋgwal ana Mbulum a ge a ter a tekeɗe, à sìkèh a hinne mbaŋa.

²¹ Kamala taŋa ya, ŋgwal ana Mbulum a ge a mburma ya ka, a kwere a tar tserdze, na dite ka, ti ne a gà ŋgwal ŋa ika miɗ ŋgar a. Ar ka, kamala bakal ana akahər ata a ge Əbay aka mburma, dite a bets a tar a mbaŋa. Aɗaba Mbulum a vəl a kwa ŋgwal ŋgar ata ka, na dite ki ŋgetekewe a dər mesife ana à ndìv a tsa aà biybiy a. A vəl a kwa ka, nda ahər Yesuw Kiristi BATSAH kwa ŋa.