Luka 2 - Bible Zulgo

Mawà Yesuw

¹ Akahər ata ta wa Yuhana metsìlwìɓè à mburma a yam ka, Agustus ŋgat batsah Əbay ana a kwere a ahəɗ gà Ruma ya. Əbay ata a gwaɗa a gà gawla ŋgar: «Ɗamum gà mburma ana ika ahəɗ ga ya fit dze.»

² Taŋa na a ne malahalah maɗàmà mburma ana ika ahəɗ Ruma ya. Akahər ata ka, Əbay ŋgiɗ a riŋ, batsah Əbay ata a tike aɗəm ŋgat, zləm ŋgar Kwiriniyus. A riŋ a kwere a gà Siriya ika ahəɗ Ruma mbaŋa.

³ I dəba ŋa ya, ku weke a tsaraka bazlam ana batsah Əbay ata a tsik a ka, a mah ba, a da a mewetse ba a kwite ŋgar.

^4-5 Yasufa ibam akahər ata ka, ŋgat riŋ mandza ŋa i kwite Nazaret ika ahəɗ Galile. A tsaraka kataya ka, ta hitsera i fataya, ta mah ba, tə da a Betelehem aka ahəɗ Yuda nda makasl ŋgar Mariya ana huɗ a ɗe aakara aà gama ya. Tə daha, ta wetse ba tar i fata. Tə da a fata ka, aɗaba ta wa batsah tsir ŋgar Əbay Dawda piŋŋe ka, i fata.

⁶ I təv ana tar riŋ ti ndze a i Betelehem a ka, kiye Mariya aka sle kuɗa. Mawà kəla aka dza ahər ba.

⁷ Kəla ata a wa ya ka, asləka ŋa, malkwara ŋgar tsara. A wa ka, i ga hwalwa hwalwa i dìdwìn. A paɗa ahər petek, a tike dər a dukw duwa batsah ŋa kamala gùlam a. Dukw ata ka, tə dzawa aɗəm kwizir. A tike dər a fata ka, aɗaba ta ŋgat təv mehinne i ga ŋgiɗ tsa. Gà mìsle ŋgiɗ ta hənawa iɗəm.

Gà gawla Mbulum nda gà ɓəzla makəva gà duwa

⁸ Gà ɓəzla makəva gà duwa a riŋ i dala, ta kaslawa gà dukw tar i bəra ndaàvəɗ. Tar riŋ bise nda kə̀sà Betelehem.

⁹ I təv ana tar riŋ aà makàslà gà dukw tar ata ya ka, gawla Mbulum a dara a təv tar a. Dzaydzay Əbay Mbulum a pàt aba. A də̀v i magər tar ndaàvəɗ ata wùtəɗ wùtəɗ wùtəɗ. Tə dza ba aà mege magəɗa hinne tsara.

¹⁰ Ama gawla Mbulum ata a gwaɗa a tar: «Ki gwim magəɗa tsa, aɗaba i dara ka, i zla a kurumara bazlam ŋgwal ŋa ana gà mburma tserdze ta ŋgeye a dər ba hinne ya.

¹¹ Aɗaba tàa wa a kurum mala məmbə̀là à mburma i Betelehem i kwite Dawda mbakum. Ŋgat ka, *Kiristi, wele ana Mbulum a gwa, i slir a kurumaha a ya. Ŋgat ka, Əbay batsah ŋa, ika gər ahəɗ tserdze.

¹² Dum, ka tə samatum, ki ŋgetwimeriŋa, ki sirwim a dər ndzer kaɗəŋ. Aɗaba a riŋ məpàɗà ŋa i petek, mahə̀nà ŋa dər i dukuməŋa a riŋ i dìdwìn, tə dzawa aɗəm kwizir.»

¹³ Zàmma tsəka, gà asiŋ gà gawla Mbulum ŋgiɗ tàa dara a təv gawla Mbulum aaha ya. Tə daha, ti yahaba gər hinne. Tə zàmbaɗa à Mbulum a fata. Ta gwa:

¹⁴ «Mezembeɗe mege ka, biy Mbulum ana ika gər mburma tserdze ya. Mandza zayzay ŋgar ika gər gà mburma ana tserdze ika gər ahəɗ, a waya tar a.»

¹⁵ I təv ana gà gawla Mbulum ata tə da aà gà ɓəzla makəva gà dukw ata ya, ta mbəɗ gər a mbulum a gər ŋa ya ka, gà ɓəzla makəva gà dukw aaha ta gwaɗaba: «Tàkwa a Betelehem, ka tə samatakwa dukw ana Əbay Mbulum a ɗif a kwa dər a.»

¹⁶ Ta mah ba tsara, tə da. Ti ta medeha ka, tàa le aà gà Mariya nda Yasufa nda gà kəla aaha ta wa ya, a riŋ mahə̀nà ŋa i dukw ata kamala gùlam a. Tar dər mandza ŋa i dìdwìn kaɗəŋ.

¹⁷ Gà mburma ata ta ŋgat a kəla aaha ka, tə dza ba aà maɗàmà bazlam ana gawla Mbulum aaha ndeɗiŋa a tsik a tar, aɗaba kəla ata ya.

¹⁸ Gà asiŋ gà mburma ŋgiɗ ana i fataya, tə tsaraka bazlam tar ata kataya ka, a ge aà tar kamala sunwa ya.

¹⁹ Ama Mariya a tike bazlam tar ata kìtsèk a zləm. A dzalawa aaka gà gər.

²⁰ I dəba ŋa ya, gà ɓəzla makəva gà dukw ata ta mbəɗ gər a təv makəva gà dukw tar ana tə dara iɗəm a. Tə daha, tə dza ba aà mazàmbàɗà Mbulum tsara. Ta ger wusa hinne, aɗaba dukw ana tə tsarakara i fata, ndəna ta ŋgatarra ya. Aɗaba dukw ata gawla Mbulum aaha a lah metsike a tar ndeɗiŋa ya ka, kaɗəŋ, pàrsa iɗəm tsa, a ge ba kamala ana a tsik a tar a ndzer.

Ti ɗe zləm a Yesuw

²¹ I dəba ŋa ya, Yesuw a ge mehinne təsəla ka, mesèse ŋgat ide. Tə sàs ŋgat. Zləm ata ti ɗer a ka, Yesuw, kamala ana gawla Mbulum a ɗif a tar dər piŋŋe akahər ana Mariya aka ŋgat zukw tsiye.

Ti ɗe à Yesuw a Mbulum

²² I dəba ŋa ya, məkəs aaha aka siwe ba, wùsa aka val ika kəla ya lele, kamala ana Musa a gwa ya ka, aka sle.*fa* Tə zla kəla ata, tə da dər a ga Mbulum batsah ŋana a Yeruzalem, ti ɗe a dər a Mbulum.

²³ Aɗaba mewetse ŋa a riŋ i məpala ahəm Mbulum ka: «Məkəs ana aka wa asləka kəla malkwara ŋa ya ka, ti ɗer a dər, aɗaba gà ɓəza ata ka, gà biy Əbay Mbulum.»*fb*

²⁴ I dəba ŋa ya, ta vəl dər ahər dukw masakəŋana məpala ahəm Əbay Mbulum a waya ya mbaŋa, dite ka, tə ndza tsəɗaŋŋa lele. Ta vile a ka, gà maadagwar sula, kige tsa gà ɓəza huɗgum sula.*fc*

²⁵ Ama wele duwa a riŋ, zləm ŋgar Simeyun, mandza ŋa i Yeruzalem i fata. Wele ata ka, ŋgwal mburma ndzer, a ge magəɗa a Mbulum. A babawa wele ana a ta mbil a à gà Isərayel a. Ŋgat ka, maràhà ŋa nda Mezite Mesife Mbulum i ba ŋgar.

²⁶ Mezite Mesife Mbulum ata na a gwaɗar: «Say ki ta mìt a ka, kàa ŋgat a mala məmbàlà à mburma ana Mbulum a gwa, i slir a kurumaha a ya ndzer a dzekwiŋ.»

²⁷ Dite i dəba ŋa ya, Mezite Mesife Mbulum a gasar ahər a ga Mbulum batsah ŋa ata. A təv ana gà tsir Yesuw nda mama ŋgar tə daha à ŋgat a fataya, aà mege dukw ana məpala ahəm Mbulum a wiz a ka,

²⁸ Simeyun a zla aà tar Yesuw a, a tike akahər ŋgar. A ge dərraha kəkaaha a Mbulum. A gwaɗaraha:

²⁹ «Əbay Mbulum, dukw ana kà tsikiŋ akahər ata i sida ya ka, aka ge ba kaɗəŋ. Ama kinehe ka, iye ana mala megemir yak a, i mìt a ka, zayya na gəzləŋ ga ya.

³⁰ Aɗaba Yàa ŋgat a mala məmbə̀là à mburma yak ata

³¹ kù gwa, i vile a agəra gà mburma tserdze ya, nda are gà kuɗa.

³² Aɗaba ŋgat na təv dzaydzay ŋa ana a ti ɗif a à vatwa yak a gà mburma ana ika gər ahəɗ tserdze ya, dite na tì zlibe a à gà Isərayel gà mburma yak, aɗaba ana ŋgat i gwala tar a.»*fd*

³³ Bazlam Simeyun ana a tsik aɗaba Yesuw a ka, a ge aà gà tsir ŋgar nda mama ŋgar ka, kamala sunwa ya.

³⁴ Simeyun a pise a tar ahəm, a gwaɗa a mama Yesuw: «Mbulum a zla kəla aaha ka, aà madzàwà à gà Isərayel hinne aà mbulum a. Dite aà mehitse à gà asiŋ ŋa aà mbulum hinne asa. Ŋgat na a ɗif a à vatwa ndzer ŋa ya. Ama ka, gà mburma hinne ti ti niw a ŋgat.

³⁵ Kamala taŋa ya, madzala gà gər gà mburma ata tekeɗe ka, a pèt a a təv dzaydzay ŋa ndərzayya lele. Məkəs aaha, i yak ka, arəv kəla yak ata a dwil a aà kər gəzləŋ a tur tur tur, kamala akwa ana à gis a lùŋguɗ a.»

Hana, məkəs ana a mà à guma Mbulum a

³⁶ Məkəs duwa a riŋ i Yeruzalem, zləm ŋgar Hana, a màwa à guma Mbulum a mburma mbaŋa. Ŋgat ka, dəm Fanuyel ana gwala gà Aser a. Ŋgat ka, aka mbər mege màndawal. Aka ndza i zal ka, mive təsəla, à gər ana a da a zal nda daala ŋa ya.

³⁷ I dəba ŋa ya, zal ŋgar a mət, a ndza i ga ŋgar madakwa ŋa haa mive ŋgar a ge dzik tsamakər gəra faɗ. A zàwa a ga Mbulum batsah ŋa ata tsidze. Ŋgat a riŋ a gewa meslire a Mbulum kəla pat, ku mege ndaàvəɗ, ku mege ndaàpat tekeɗe. A gewa ndəra, a hamawa dər akaba a Mbulum mbaŋa.

³⁸ I təv ana tar riŋ i fataya ka, ŋgat tekeɗe, a daha a təv tar, a dza ba aà mazàmbàɗà a Mbulum, a ger wusa hinne. Dite i dəba ŋa ya, a dza ba aà maɗàvà zləm a kəla ata a gà mburma ana tserdze ta bebe a wele ana Mbulum a ta mbil a dər à gà Yeruzalem a.

Gà tsir Yesuw nda mama ŋgar ta mbəɗ gər a Nazaret

³⁹ Gà tsir Yesuw nda gà mama ŋgar tə ndəv à dukw ana tserdze məpala ahəm Əbay Mbulum a tsik a ka, ta mbəɗ gər à Yesuw aka ahəɗ Galile a kwite tar Nazaret.

⁴⁰ Aləka kəla ata a gəl ba, a sime. A tsàh lele, Mbulum a piser ahəm, a waya ŋgat.

Yesuw a ge mive kurwa gəra sula ka, a da a ga Mbulum batsah ŋana

⁴¹ Gà tsir Yesuw nda mama ŋgar tə dawa a *megirive Paska a Yeruzalem kəla viye.

⁴² Aləka Yesuw a ge mive kurwa gəra sula ka, tə da nda gà tsir ŋgar a megirive ata tserdze, kamala ana gà tsir ŋgar tə dawa ya.

⁴³ Aləka i dəba ŋa ya, megirive ata a ndəv ka, ta mbìɗ a gər a ma. Ama Yesuw ka, a mətsa aà tar i Yeruzalem a. Gà tsir ŋgar nda mama ŋgar tàa sər aaba tsa.

⁴⁴ Ta gwa i tar ka, gà Yesuw tàa mbər mede aka miɗ nda gà asiŋ gà mburma mər. Tə da wurwas ka, tə dza ba aà mayaha ŋgat i liwiŋ gà wur tar a, nda gà masla tar a.

⁴⁵ Ama tàa ŋgat Yesuw ɓav tsa. Ta mbəɗ gər a Yeruzalem asa, tə daha, ti yaha ŋgat i fata.

⁴⁶ Ama i huɗ mehinne makər a ka, tàa le ahər a riŋ mandza ŋa i ga Mbulum batsah ŋa ata i fata. A riŋ i liwiŋ gà ɓəzla medzeŋge məpala ahəm Mbulum gà Yahuda. Ŋgat a riŋ à dze a zləm a medzeŋge tar ana ti dzeŋgewa ya. Dite ŋgat tekeɗe, a tsèm aà ter a bazlam ana a tsaraka ya.

⁴⁷ A ge aà gà mburma ata tserdze tə tsaraka bazlam ŋgar ata ya ka, kamala sunwa ya. Aɗaba dukw ana a tsik a ya ka, metsehe iɗəm ka, hinne.

⁴⁸ Gà tsir ŋgar nda mama ŋgar ta ŋgatar ka, a ge aà tar kamala dukw mene aà mburma ya mbaŋa. Mama ŋgar a gwaɗar: «Aàla na kà ya ba à mər kataya ya, kəla gà? Mər nda tsir yak ka, maa ya ba aà mayaha kər ka, hinne.»

⁴⁹ Yesuw a gwaɗa a tar aaka: «Ki yehwim a iye ana, aàmala? Wànà kà sərum tsiye ka, say i ndze a i ga tsir gà ya?»

⁵⁰ Ama tə tsaraka bazlam ata a tsik a tar kataya ya tsa.

⁵¹ Dite i dəba ŋa ya, gà Yesuw nda gà tsir ŋgar ata ta mbəɗ gər a kwite Nazaret. Tə daha a fata ka, Yesuw a gəsawa dukw ana ti tsikewar a lele. Mama ŋgar ibam, a tikewa gà dukw ana a gewa ya, a gər ŋgar lele asa.

⁵² I dəba ŋa ya, Yesuw a səkah à magəla ba, dite a ŋgat metsehe a gər lele asa mbaŋa. A gewa dukw ana a tsahən aà gà Mbulum nda gà mburma ya.