2 TESALUNIKE 3 - Bible Zulgo

Hamum a Mbulum aɗaba mər

¹ Gà damər mər, naha ka, dukw ana mì ndìv a dər à bazlam aaha ya: Hamum a Mbulum aɗaba mər mbaŋa, dite na bazlam BATSAH kwa ŋa a de a aka miɗ bise tsara, mburma ta gis a nda megèr kəkaaha kamala ana a ge ba i təv kurum a mbaŋa ya.

² Dite hamum a Mbulum asa mbaŋa ka, ma kasla mər i təv gà mburma ana metsehe tar manəsa ŋa, ta ge a mər a dukw ana ŋgwala tsiye ya. Aɗaba gà mburma tserdze tsa na ta gis a bazlam Mbulum a.

³ Ama BATSAH kwa ŋa a ge a kurum a dukw ana a tsik i sida ya hiywe. Ŋgat ka, a vile a kurum a ndzəɗa a gəzləŋ kurum ɓəŋɓəŋ lele. A kesle a kurum i təv Əbay sitene ya asa mbaŋa, na dite à mbè aà kurum a asa tsiye.

⁴ BATSAH kwa ŋa ka, a riŋ à zlèk a mər mbaŋa, na dite mìi gis a kurum lele, mì sir a dər ka, kurum ihər ki gwim a ka, dukw ana mì ɗif a kurum dər a haa kinehe, dite ki ta gwim a hiywe kamala taŋa ya mbaŋa asa ya.

⁵ Mìi heme a a BATSAH kwa ŋa, dite ma ɗif a kurum à vatwa, aà metsereke meme na Mbulum a waya kwa lele ya, dite nda mesimeha a mesewere are kamala Yesuw Kiristi ana a simereha mbaŋa ya.

Ku mege weke ma ge megemir lele

⁶ Gà damər mər, mìi tsik a kurum a ka, nda zləm Yesuw Kiristi BATSAH kwa ŋa, mər ihər mìi gweɗe a kurum a ka: Ka ndzum i təv ilik ŋa nda gà asiŋ gà mburma Mbulum ana rìmme ti ndze a gà màsar ŋa, a sàs a tar megemir tsiye tsa. Aɗaba tar ka, ta gəs dukw ana mì tsik a kurum a tsa.

⁷ Aɗaba kurum nda gər kurum ka, kà sərum mendze mər ana mì ndza i təv kurum akahər ata ya. Ama ka, lele na ki gwim a kamala mər ata ya. Aɗaba mər ka, gà màsar ŋa tsa.

⁸ Kwets maa zəm dukw mezime aà gà mìsle ŋgiɗ a taf masakəŋa ɓav tsa. Ku mege ndaàvəɗ, ku mege ndaàpat tekeɗe, maa yà ba aà megemir ka, hinne na aà magàlà dər ba mər a. Aɗaba a sàs a mər na mì sèwèr a kurum are agəra dukw ana mìi zim a ya tsa.

⁹ Mege dukw ata mì ge dər kamala taŋa ya ka, ana ka, mìi sle a aà mewize aà kurum a dukw mezime zləmana dukw ŋgar, bakal iɗəm tsa. Ama ka, mì ge megemir seyiŋ ivaɗ, aà meɗìfè a kurum dər ka, dite ki gwim kamala taŋa ya mbaŋa.

¹⁰ Akahər ana mər mandza ŋa a riŋ i təv kurum a ka, maa tsik a kurum, mì gwaɗa a kurum ka: «Na wura a waya mege megemir tsəka, ma zəmawa dukw mezime ɓav tsa mbaŋa.»

¹¹ Mì tsik a kurum kataya ka, aɗaba na mì tsaraka ka, ta gwa là, gà mìsle ŋgiɗ ika magər kurum ka, ŋgəɗatstsa ti ndze a kataya, a sàs a tar megemir tsidze. Ama na a ne megemir tar ka, tsap tsap mandàbàya aka bazlam.

¹² Medzìbe gà mburma ata ka, mìi pele a ter a ahəm nda zləm Yesuw Kiristi BATSAH kwa ŋa, mìi gweɗe a ter a ka, say ta ge megemir ndaka vatwa ŋa, dite ta ŋget a dukw mezime tar ana ti zim a nda ahər tar a ya.

¹³ Ama kurum gà damər mər ka, dum aka miɗ aka miɗ nda mege dukw ana ŋgwal ŋa ya, ka ti yum ba tsidze.

¹⁴ Na bəla wura a sasar magəsa ahəm aà dukw ana mì wetse i huɗ wakita aaha ya tsəka, sərum dər, wele ata ka, ka tə ndzum akaba i təv ilik ŋa nda gà ŋgat asa tsa, na dite ka, hwarwa a ger a ya.

¹⁵ Ama kə̀la ka, ka ta fə̀rum aà ŋgat kamala mala mene are are kurum a tsa. Ki tsikwimer a ivaɗ ka, aɗaba ana ŋgat damər kurum a hiywe ya.

Mandəvandəv mifefile

¹⁶ Mìi heme a a BATSAH kwa ŋana ŋgat mala məvəla zayzay a mburma ya, dite mə vəl a kurum matasla yam a gəzləŋ kəla pat ndaka vatwa ŋgiɗ pampam. BATSAH kwa ŋa ma ndza nda gà kurum tserdze.

¹⁷ Iye Pul, i ge a kurumaha wusa. I wetse naha ka, nda ahər gà ŋa. Aɗaba i wetsewa zləm gà aka mandəvandəv wakita tserdze ka, kataya. Naha ka, mewetse dukw gà.

¹⁸ Yesuw Kiristi BATSAH kwa ŋa ma ge a kurum ŋgwal ilik ilik tserdze kəla pat.