2 TESALUNIKE 1 - Bible Zulgo

¹ Iye Pul, mì wetseha wakita aaha ka, mər nda gà Silas nda Timute. Mì wetseha ka, a kurum gà mburma ana i Tesalunike, kurum gà biy Mbulum Tsir kwa, nda Yesuw Kiristi BATSAH kwa ŋa ya.

² Mìi heme a a gà Mbulum Tsir kwa ata nda Yesuw Kiristi BATSAH kwa ŋa, ta ge a kurum ŋgwal, ta vəl a kurum matasla yam a gəzləŋ kurum zayya lele.

Mbulum a ti ses a ikaba seriye a gà mburma ya tserdze

³ Gà damər mər, ku mege meme tekeɗe, say mìi ge a kəkaaha a Mbulum kəla pat aɗaba kurum. Taŋa ka, ŋgwal ŋa na mìi ge a kamala taŋa ya, aɗaba megìse kurum ana kə̀ gəsum Mbulum nda gəzləŋ kurum a ka, a riŋ à sìkèh a hinne ya. Dite mawàyà ba kurum ana ki weywim a ba ika magər kurum a tekeɗe, a riŋ a de a aka miɗ aka miɗ kamala taŋa ya mbaŋa ya.

⁴ Aɗaba taŋa, i təv ana mì yahawa ba gər nda gà mburma Mbulum ŋgiɗ a ka, mì tsikewa a tar bazlam aka gər mendze kurum ana ki ndzwim a ya, nda maŋgayaba lele. Aɗaba ku mege gà mburma tar a riŋ ihər ti sèwèr a kurum a are, ti newa a kurum are hinne tekeɗe, kàa tə̀zum tsa, dafarəkrək kàa mərum aba ivaɗ. Dite megìse kurum ana kə̀ gəsum Yesuw Kiristi ya ka, a riŋ a de a aka miɗ aka miɗ mbaŋa. Maŋgayaba i təv mər hinne na taŋa ya.

⁵ Taŋa na a ɗif a kwa dər parakkà, Mbulum a ti ses a ikaba seriye a gà mburma ya ka, nda ndzer ndaka vatwa ŋa ya. Agəra mesewere are kurum ata ka, sərum dər, Mbulum na a ta vile a kurum a vatwa, na dite ki slwim a aà mada a mekwere ŋgar a. Aɗaba mekwere ŋgar ata na kinehe kurum ihər ki sèwèrwim a are ya.

⁶ Kaɗəŋ, Mbulum a ta ge a seriye ka, ndaka vatwa ŋa lele. Kamala megweɗe ya, a ta vile aɗəm a mesewere are a gà na tì sèwèr a kurum are ya.

⁷ Dite kurum ana kinehe kurum ihər ki sèwèrwim a are ya ka, a ta vile a kwe akaba a mandza zayzay lele. Dukw ata a ta ge a ba ka, aka təv ana Yesuw Kiristi BATSAH kwa ŋa a dere a i gər ŋa i mbulum a ya. Tar nda gawla ŋgar ana gà ndzəɗa tar a riŋ hinne ya, na ti lekere a ŋgat a ya.

⁸ A dere a ka, ŋgar ŋgar, nda gà akwa məvata ŋa. A ti sèwèr a dər are a gà na ti niw Mbulum a, dite nda gà na tì dze a zləm a bazlam ŋgwal ŋa ana ti ɗif a dər aka gər ŋgar a tsiye mbaŋa.

⁹ Mesewere are tar ana ti ti sèwèr a ya ka, Mbulum a dzeye à ter a aà biybiy. A pele a ter a ahəm, dite na ti sle a aà mada a təv Yesuw Kiristi BATSAH kwa ŋa tsiye ya. Tar ka, ta ŋget a a ndzəɗa ŋgar ana ika gər gà duwa tserdze ya tsa. Dite ti ti ndze a i təv mezlibe ŋgar ana tì zlibe a dər a tsa asa mbaŋa.

¹⁰ Gà dukw ata ti ta ge a ba kamala taŋa ya ka, a pat ana à mère a ya. A mère a ka, gà mburma ŋgar tì zlibe a à ŋgat. Gà na ta gəs ŋgat nda gəzləŋ a tserdze, a ge a ter a hayaffà i gəzləŋ, tì zèmbeɗe a à ŋgat. Ta gweɗe a, ŋgat ka, Batsah ŋa kaɗəŋ. Dite kurum tekeɗe, ika magər gà mburma ata mbaŋa, aɗaba ana kə̀ gəsum bazlam ŋgar ana mì ɗif a kurum dər a ya.

¹¹ Aɗaba taŋa, mìi heme a a Mbulum kəla pat agəra kurum. Mìi hemer a ka, dite ma ne à kurum gà tsəɗaŋŋa, mendze kurum mə̀ pàt ka, ŋgwal ŋa, kamala ana ŋgat a waya, a zal a kurum a. Mìi hemer a asa ka, dite mə vəl a kurum ndzəɗa ŋgar aà mege gà dukw ana ŋgwal ŋa tserdze, a sàs a kurum ki gwim a ya. Dite nda gà megemir ana ki gwim a ka, agəra ana kə̀ gəsum ŋgat nda gəzləŋ kurum a ya.

¹² Na kàa gwim kamala taŋa ya ka, mburma tì zlibe a à zləm Yesuw BATSAH kwa ŋa, aɗaba kurum, dite tì zlibe a à kurum mbaŋa asa ka, aɗaba megemir ŋgar ana a riŋ a ge a i gəzləŋ kurum a. Gà dukw ata ti ta ge a ba kamala taŋa ya ka, aɗaba ana gà Mbulum Tsir kwa nda Yesuw Kiristi BATSAH kwa ŋa ta ge a kurum a ŋgwal ŋa ya. a