1 Yuhana 1 - Bible Zulgo

Bazlam aka gər Yesuw Kiristi, mala məvəla a kwa mesife

¹ Mì wetse a kurumaha wakita aaha ka, aka gər bazlam ana a vile a mesife a mburma ya. Aka ana tàa ge gər ahəɗ zukw tsiye ka, bazlam ata a riŋ dukw ŋgar.*fa* Mər maa tsaraka bazlam ŋa, maa ŋgatar nda are mər mbaŋa. Maa fə̀r ahər kaɗəŋ, maa ləm ahər nda ahər mbaŋa asa.

² Mbulum a pàt à mesife ata ka, ndərzayya, maa ŋgatar. Aɗaba taŋa mì tsik a kurum ka, bazlam mesife ata mì ŋgatar a. Mìi ɗif a kurum a ka, à mesife ana à ndìv a tsa, a ndze a aà biybiy a. Akahər ata piŋŋe ka, a riŋ i təv Mbulum Tsir kwa. Taŋa na kinehe Mbulum a pàt a kwa dər kuɗa ya.

³ Dukw ana mì ŋgatar a, ndəna mì tsaraka ya, na mìi tsik a kurum a mbaŋa, na dite kurum tekeɗe ka, ki gewim a à ba nda gà mər i təv gà dukw ata. Magàwà ba ana ki gewekwe a ba ya ka, nda gà Mbulum Tsir kwa, dite nda gà Yesuw Kiristi Kəla ŋgar asa.

⁴ Mì wetse a kurumaha gà dukw ata ka, na dite maŋgayaba kwa ana ki ŋgeyekwe a ba ya ka, mà rah a gəzləŋ kwa lele ya.

Mbulum ka, təv dzaydzay ŋa

⁵ Mbulum ka, təv dzaydzay ŋa, luvuŋ a riŋ i təv ŋgar kwizikw tsidze. Taŋa ka, dukw ana mì tsaraka i təv Yesuw Kiristi ya, na dite mì tsik a kurum a mbaŋa.

⁶ Na ki gweɗekwe a ka, waytsà kàa sərakwa ba nda gà Mbulum, kàa gawakwa ba, dite kwa riŋ ki ndzekwe a i luvuŋ hiywe asa ka, taŋa ka, kà sàsakwa pàrsa, ki gekwe a ka, dukw ana ndzer ŋa ya tsa.

⁷ Ama na kwa mandza ŋa i təv dzaydzay ŋa kamala Mbulum ana ŋgat mandza ŋa i təv dzaydzay ŋa ya ka, kàa gawakwa ba na taŋa ya. Məmbəz Yesuw Kəla ŋgar ana a dza dər aɗaba kwa ya ka, a bere a gəzləŋ kwa, à pìl a kwa a à bakal ana ki gewakwa ya tserdze.

⁸ Na kwa ihər ki gweɗekwe a, mər ka, gà ɓəzla ndzer ŋa, bakal a riŋ i təv mər tsəka, taŋa ka, ki benekwe a ba kwa, ndzer ŋa a riŋ i təv kwa tsidze.

⁹ Ama na kàa ɗifekwa à bakal kwa ana ki gekwa ya aka miɗ Mbulum ivaɗ ka, à pìl a kwe a à dukw ana ki gekwa ŋgwal ŋa tsiye. A bere a gəzləŋ kwa, nda mazlàra kwa i bakal kwa ata ya tserdze. Aɗaba ŋgat ka, mala ndzer ŋa, a ge a ka, dukw ana a gwa, i ge a ya kaɗəŋ.

¹⁰ Na bəla ki gweɗekwe a, maa ge bakal tsəka, taŋa ka, kà nekwa à Mbulum ka, kamala ana mala pàrsa ya. Bazlam ana a tsik a kwa ya ka, a riŋ i təv kwa tsa.