1 TESALUNIKE 4 - Bible Zulgo

Dukw ana a tsahən aà Mbulum a

¹ Gà damər gà, dukw ana a zeha mìi tsik a kurum a ya ka, araha: Akahər ana àvə̀ɗaka mì ɗif a kurum ka, à mede ana a tsahən aà Mbulum a. Araha kaɗəŋ, mì sər ka, mede kurum aka ne kamala taŋa ya. Ama kinehe ka, mì ge a kurumaha kamkam hinne, nda zləm Yesuw BATSAH kwa ŋa: Zazamum ka, mede ata hiywe, səkahum dər aka miɗ aka miɗ asa.

² Aɗaba kurum kà sərum, mì ɗif a kurum ka, à dukw ana Yesuw BATSAH kwa ŋa a gwaɗa a mburma, gwim a.

³ Aɗaba taŋa, dukw ana Mbulum a waya ka, nwim gà tsəɗaŋŋa ika miɗ ŋgar. Kamala megweɗe ya ka, ki gwim mezelme nda təv muva tsa.

⁴ Taŋa ku mege weke ika magər kurum ka, tə ndza nda məkəs ŋgar ndaka vatwa ŋa lele, kamala ana a tsahən aà Mbulum a, mburma tə ta ŋgat vatwa aà məma à kurum a bakal tsidze.

⁵ Ki ndzwim a nda gà tar ka, kamala meèweke ba kurum ana ŋgwala tsa, dzə̀lùwùwùrwùr a kwere a kurum a tsa. Aɗaba na a gewa kamala taŋa ya ka, gà mburma ana tə sər Mbulum tsiye. Ama kurum ka, ki gwim dər kamala taŋa ya tə tsa.

⁶ Wura ilik ma ta ge bakal, a ge a wirwir aà damər ŋgar a nda təv məkəs ŋgar a tsidze. Aɗaba BATSAH kwa ŋa a ta vile a mesewere are ka, a gà na ta gewa gà medzibe gà dukw bakal ata kamala taŋa ya. Mì be a kurum à ɗaf, mì tsik a kurum aba taŋa ya ka, daga piŋŋe.

⁷ Aɗaba Mbulum a zal a kwa ka, aà mege mezelme tsa. A zal a kwa ka, na dite ki nekwe a gà tsəɗaŋŋa ika miɗ ŋgar a ivaɗ.

⁸ Aɗaba taŋa, na wura tətstəts aka raraɗaba ahər a zləm, a waya mandza zləm a bazlam ata tsəka, a niw taŋa ka, bazlam mburma tsa. Ama a niw ka, biy Mbulum, wele ana a vəl a kurum Mezite Mesife ŋgar ana tsəɗaŋŋa ya ivaɗ.

⁹ Gà damər mər, a ge a ŋgulum tsa na i wetse a kurumaha aka gər mawàyà ba kurum ana, ki weywim a gà asiŋ gà damər kurum a. Aɗaba Mbulum nda gər ŋgar na a ɗif a kurum à mawàyà ba ata ya.

¹⁰ Haya kaɗəŋ, kamala taŋa ya, kurum ihər ki weywim a gà mburma Mbulum ana ika ahəɗ Makaduniya ya tserdze mbaŋa. Ama ka, mìi ge a kurum a kamkam hinne asa, na dite mawàyà ba kurum ata ki weywim a ba ya, à sìkèh a aka miɗ aka miɗ a.

¹¹ Mərum aba lele, na dite mendze kurum ana ki ndzwim a ya ka, zayya a ge a ŋgwal ŋa ya. Dzalum aka gà dukw kurum lele. Gwim megemir nda ahər kurum ŋa, kamala ana mì tsik a kurum akahər ata ya.

¹² Na kàa gwim dər kataya ka, gà na tàa gəs Yesuw Kiristi nda gəzləŋ tar zukw tsiye, ti zlibe a à kurum. Dite kurum tekeɗe, dukw mezime kurum riŋ mbaŋa, ki ŋgeleywim a aba duwa ya ɓav tsa asa mbaŋa.

Pat ana Yesuw BATSAH kwa ŋa à mère a ya

¹³ Gà damər mər, a sàs a mər ka, sərum duwa aka gər gà məməta. Aɗaba arəv ma ta da aà kurum a kamala gà na ta veve a Yesuw tsiye tsa.

¹⁴ Kwa ka, kà sərakwa ndzer, Yesuw aka mət, dite i dəba ŋa ya ka, Mbulum a mbəlara à ŋgat i məməta ya. Kamala taŋa ya tekeɗe, sərum dər ka, gà na tàa gəs Yesuw nda gəzləŋ tar a, aləka tàa mata ka, Mbulum a ta mbilere à ter a i məməta ya kataya mbaŋa, na dite ti ndze a i təv ilik ŋa nda gà Yesuw a.

¹⁵ Kamala taŋa ya, duwa ma wise a kurum gər tsa. Aɗaba a pat ana BATSAH kwa ŋa à mère a ya ka, gà na tàa mata ya, ti ne a gà ɓəzla dəba ika kwa ana kwa riŋ mandza ŋa nda are ya ɓav tsidze. I tsik a kurum taŋa ka, dukw ana BATSAH kwa ŋa a ɗif dər à gər ŋgar a.

¹⁶ A pat ata ka, Mbulum à fèfil a nda magala ŋgəlakəkka, na dite dukuməŋa à dze ahər a ba ya. Əbay ana ika magər gà gawla Mbulum a, a zeliŋa, dite ta vèt a mezleliŋ Mbulum mbaŋa. I dəba ŋa ya ka, BATSAH kwa ŋa a terre a i gər ŋa i mbulum a kuɗa. Dite gà mburma ana ta mata ya, tàa gəs ŋgat nda gəzləŋ tar a ka, tar na ti lèh a aà mimbilera i məməta ya.

¹⁷ I dəba ŋa ya asa ka, Mbulum a yehe a kwe a gər, a kwa ana kwa riŋ mandza ŋa nda are ya, à dzik akaba a kwa a təv ŋgar nda hulɓukw. Kamala taŋa ya, kwa tserdze ki ti lìmekwe a nda gà BATSAH kwa ŋa i gər ŋa i fata, ki ndzekwe a i təv ŋgar aà biybiy kuɗa.

¹⁸ Aɗaba taŋa, màyum baha à arəv nda bazlam ata ika magər kurum ilik ilik tserdze.