1 TESALUNIKE 1 - Bible Zulgo

¹ Na a wetse wakita aaha ka, iye Pul, mər nda Silas, nda gà Timute. Mì wetseha ka, a kurum gà mburma Mbulum ana i Tesalunike ya. A kurum ana kàa nwim gà mburma Mbulum Tsir kwa, nda Yesuw Kiristi BATSAH kwa ŋa ya. Mbulum ma ge a kurum ŋgwal, mə vəl a kurum matasla yam a gəzləŋ zayya lele.

Pul a ge kəkaaha a Mbulum aɗaba gà mburma Mbulum ana i Tesalunike ya

² Mì gewa kəkaaha a Mbulum kəla pat aɗaba kurum tserdze. Ku mege ndeɗime tekeɗe, i təv ana mìi heme a a Mbulum a ka, mì dzalawa a təv kurum, mìi hemer a ka, aɗaba kurum tserdze mbaŋa asa.

³ Kəla pat a màwa a mərra a gər a, meme na kurum ihər ki gwim a megemir ŋgwal ŋa lele, aɗaba megìse kurum ana kə̀ gəsum Yesuw Kiristi nda gəzləŋ a ya. Dite asa ka, kurum ihər ki mirwim a aba sah hinne, aɗaba ana kà wayum ŋgat a, dite ki ndzwim a ɓəŋɓəŋ lele, nda metìkè madzala gà gər kurum a təv ŋgar a.

⁴ Gà damər gà, mì sər ka, Mbulum a waya kurum. A pala kurum ka, dite ka nwim gà mburma ŋgar.

⁵ Aɗaba akahər ana mì tsik a kurum bazlam ŋgwal ŋa ya ka, mì tsik a kurum nda mezìwè gà gər mər ɗekɗek tsa, ndzəɗa Mbulum iɗəm. Mezite Mesife ŋgar na a zlak ahər mər a, aɗaba mì sər ndzer, bazlam ata ka, pàrsa iɗəm tsa. I təv ana mər mandza ŋa ika magər kurum a ka, kà sərum, meme na mì ndza ika magər kurum a. Mì ge kamala taŋa ya ka, dite mà zlak kurum.

⁶ Ama kurum kinehe ka, kàa dzum ba aà mazazama mede mər, nda biy BATSAH kwa ŋa. I təv ana kə̀ gəsum bazlam Mbulum a ka, ku mege mburma ti sèwèrewa a kurum dər akaba are hinne tekeɗe, ama kurum ka, kàa ŋgayum ba ivaɗ. Maŋgayaba ata ka, Mezite Mesife Mbulum na a vəl a kurum a.

⁷ Kamala taŋa ya ka, kà ɗifwim à ŋgwal vatwa a gà mburma Mbulum ana ika ahəɗ Makaduniya ya, nda gà na i Akaya ya tserdze, ti sir a dər ka, meme na mendze tar ana ti ndze a ya.

⁸ Aɗaba kurum na bazlam BATSAH kwa ŋa a ɗe zləm hinne ya. A ɗe zləm ka, ika ahəɗ gà Makaduniya, nda Akaya ata ɗekɗek tsa, ama gà mburma tserdze, ku mege i ŋga, tàa tsaraka megìse kurum ana kə̀ gəsum Mbulum nda gəzləŋ lele ya. Taŋa bazlam a riŋ na aà metsike a tar aka gər ŋa, a ge a ŋgulum a asa tsa.

⁹ Ku mege i ŋga, i təv ana mì dawa aɗəm a ka, ti tsikewa a mər nda ahər tar, meme na kə̀ gəsum mər lele ya. Ta gwaɗa a mər mbaŋa ka, kàa miyakum aba à gà fəla kurum ana ki gewim a, dite ka, kà dzàwum gurmits a bəɗ a Mbulum ana ndzer, ŋgat a riŋ nda gà mesife ya.

¹⁰ Kinehe ka, kurum ihər ki vevwim a Kəla ŋgar ana à mère a i gər ŋa i mbulum a ya. Kəla ata ka, Yesuw, wele ana Mbulum a mbəlara à ŋgat i məməta ya ya. Ŋgat na a ta beye a à kwa i matsəɓatsəɓ Mbulum ana mandza ŋa ika gər gà ɓəzla bakal a. A ta ge a ka, a pat seriye ŋgar ana aka ndze aɗəm a.