Siiqo Saba 7 - Geeshsha Maxaafa

Panththazi

¹ «Kawo naada lo7izaaree! Ne tohoti neni naxala caamma aaththa dishin be7iza wode ay mala lo7izoo! Ne sheechchati hiillanchcha wogacey qoxxidi lo7eththi alleqissida inqqu misatees.

² Ne gul7ay woyne ushshi kumida birille misatees; ne xeessay lo7o ciishshan qashettida gistte mirqqe misatees.

³ Ne dhanththati mentte yelettida Wusha laaqqa misateettes.

⁴ Ne qoodhey danggarsa zaalen alleqettida adussa gimbe misatees; ne ayfey gita Haseboone katama penge matan diza eele haath misatees; ne siidhey Damasqo xeelisidi gimbida Libaanoose gimbeza misatees.

⁵ Ne hu7ey Qarmeloose zuma misatees; ne hu7e binanay xaaxetti uttida xilata misatees; ne hu7e daththayka kawoza wozina ekkides.

⁶ Ta godee! Ne ay mala lo7ay! Ne ay mala kayshay! Ne siiqoy tana ay mala ufayssizee!

⁷ Ne geesay zamba geesa misatees; ne dhanththay zamba wurco misatees.

⁸ Tani ha zamba bolla kezana; kezada iza ayfeta maxana; ne dhanththati woyne ayfe mala wurccotti uttida; qasse ne peenoy appile ayfe mala sawees.

⁹ Ne metershati eessa ililo mala mal7eettes» gides. «Histtiko he lo7o ililoy ta siiqoza metershata giddoranne achchata giddora duge wololu gi goggo.

Geela7oya

¹⁰ Tani ta siiqozassa; izikka tana amottees.

¹¹ Ta siiqozoo! haa ya; nam7ay katamappe kezidi ane gede gaxare boos; heen omars ane issife aaththoos.

¹² Maalado wonttara ane woyne atakilte giddo boos; woyney ciiyidaakko, oroomaaneykka ayfidaakko ane beyoos; heen tani ta siiqo nees qonccisana.

¹³ Inko ayfe sawoynne dumma dumma ayfe immiza atakilteti nu karen kumida; ta siiqozoo! Ha ayfetappe teeridaytanne oorath maxettidayta nees woththadis.