ዬ ማጻፋ 8 - Geeshsha Maxaafa

Dawiti Zammareta Kaabbos Susul7en Yexxida Mazamure

¹ Abeet GODAWU! Nu Godawu ne sunththi biitta ubbaan keehi bonchchettides; neni ne bonchcho salotappe bollan dhoqqu dhoqqu histta woththadasa.

² Neni ne morkketa gishshas ne baalgaaranne ne bolla mandizayssa sirphi ooththanawu guuththa nayta doonaninne dhammiza nayta doonan galata kunththadasa.

³ Neni ne kushen medhdhida salota, sohon sohon neni woththida aginanne xoolintteta tani be7iza wode,

⁴ neni asas qoppanawu asi aazee? Woykko neni asa naas wudettanawu izi aazee?

⁵ Iza neni kiitanchchatappe guuththara ziqqisadasa; bonchchonne gitateththa kallachcha iza hu7en goxxisadasa.

⁶ Iza neni ne medhdhida medheteththa ubbaa bollan haarizaade ooththada sunththadasa; ubbaaka izas haarisadasa.

⁷ Dorsatanne miizata, do7a ubbaa,

⁸ salo kafota, abba moletanne abba giddon diza medheta ubbaaka izas haarisadasa.

⁹ Abeet nu GODAA Xoossawu! Ne sunththi biitta ubbaa bolla keehi bonchchettides.