ዬ ማጻፋ 38 - Geeshsha Maxaafa

Hassa7isos Dawiti Yexxida Mazamure

¹ Abeet GODAWU! Ne hanqon tana seeroppa; ne yiillon tana muroppa.

² Ne wondafe yiishshi tana caddides; ne kusheykka tana naaqqi oykkides.

³ Ne hanqofe dendidayssan ta bollay payyenna; ta nagara gaason ta asateththay papattides.

⁴ Ta qohoy tana mittides; deexo tooho mala tana naaqqi oykkides.

⁵ Tani eeyateththan ooththida nagara gaason ta madunththay xinqqides.

⁶ Tani hokkadissinne quunnadis. Gallas kumeth yeekkashe pe7adis.

⁷ Ta ashoy tama misha mala xuuggees; ta bollayka payyenna.

⁸ Tani ixettadissinne nififi gadis; ta wozinay ceecida gishshas waassays.

⁹ Abeet Godawu! Ta amo ubbaa ne eraasa; tani ceecizayssi neeppe geemmibeenna.

¹⁰ Taas wozina ayfen guppees; ta wolqqay cingides; ta ayfeppe poo7oy kichchides.

¹¹ Ta madunththa gaason ta shoorotinne ta laggetikka taappe baqatida; Ta dabbotikka taappe haakkida.

¹² Tana wodhanawu koyzayti bantta narxa tana oykkana woththida; Tana qohanawu koyzayti, «Naagaashsha; nuni nena demmana» giidi ta bolla mandida; gallas kumeth ta bolla genen duulatida.

¹³ He wode tani siyontta tulle asa mala gidadis; doonakka pogontta duude asa mala gidadis.

¹⁴ Tumappe tani hayththi siyontta asa malanne doonay haasayontta asa mala gidadis.

¹⁵ Gido attiin abeet GODAWU! Tani nenan hidota ooththays; Abeet ta GODAWU! Neni taas zaaro imma.

¹⁶ Tani GODAA, «Ta tohoy handaraashin, ta morkketi ‹Izas hashshu› gaana malanne ta bolla ceeqettana mala ooththofa» gaada woossays.

¹⁷ Tani kundana matadis; ta sakoykka paxontta ixxides.

¹⁸ Ta nagaray tana metides; hessa gishshas ta qoho ta nees paaxays.

¹⁹ Ta morkketi gitanne wolqqama; tana coo ixxizayti cora.

²⁰ Tani lo7o ooso ooththiin taas iita zaarizayti tani lo7o kaalliza gishshas tanara eqetteettes.

²¹ Abeet GODAWU! Ne tana yeggofa; Abeet Xoossawu taappe neni haakkofa.

²² Abeet tana ashshiza Godawu! Tana maaddanaas eesota.