ዬ ማጻፋ 35 - Geeshsha Maxaafa

Dawite Mazamure

¹ Abeet GODAWU! Tanara eqettizaytara neni eqetta; tanara olettizaytara neni oletta.

² Gondallenne xurure oykkada, tana maaddanaas denda.

³ Tana yedeththizayta bollan ne tooranne mashsha denththa. Tana, «Ta nena ashshizaade» ga.

⁴ Ta shemppoyo wodhanawu koyzayti yeellatettonne kawuyetto; ta bolla iita ooththana maqettizayti kawuyidi guye simmetto.

⁵ GODAA kiitanchchay istta yedeththo; isttika carko sinththan diza suulla mala gidetto.

⁶ GODAA kiitanchchay istta gooddo; istta ogeykka dhumanne hallith gido.

⁷ Coo tana oykkanawu bantta narxa woththida; qasseka coo tana kundisanaas olla bookkida.

⁸ Istti qoppontta dishin bashshi istta bolla puttu go; istti woththida woximadey istta oykko; istti ollan kundi dhayetto.

⁹ He wode tani GODAAN ufayettana; izi ashshida gishshas tani ufayettana.

¹⁰ Ta kumeththa asateththay nena, «Abeet GODAWU! Qohettidayta qohizayta kusheppe ashshizay, hiyeesatanne metotanchchata bonqqizayta kusheppe naagizay hara ne malay oonee?» gaana.

¹¹ Iita asati ta ooththontta miishshan tana mootida; ta erontta miishshan ta bolla wordo markka markkasida.

¹² Tana bizzasida; ta lo7o ooththoyssa kushe iita zaarida.

¹³ Gido attiin tani istti hargida wode maaqa may7adis; ta asateththa xooman daabursadis; ta woosaas zaaroy dhaydes.

¹⁴ Ta ishaas woykko ta dabbos ta muuzottiza mala muuzottadis; aaya hayqqiin kayottiza asa mala keeha yeekkadis.

¹⁵ Gido attiin tani dhuphettiin istti ufayssan issi bolla shiiqida; he gene asati ta erontta gaason tana wadhdhidi aggontta ixxida.

¹⁶ Istti iita asati qidhiza mala tana qidhida; yiillos ba ach garccida.

¹⁷ Abeet Godawu! Neni awude gakkanaas tana co7u gaada xeellanee? Istta iita oosaappe tana ashsha; ha gaammo mala asatappe ta al7o shemppoyo woththa ekka.

¹⁸ He wode gita shiiqon ta nena galatana; cora asa shiiqon ta nena sabbana.

¹⁹ Wordora tana morkkizayti ufayettofetto; tana coo ixxizayti ta bolla qim7otoppetto.

²⁰ Istta doonappe saro haasayay kezenna; biittan co7u giidi diza asata bolla yo7o qaxeththeettes.

²¹ Istti ba doona ta bolla doydi, «Hekko be7a! Ne ooththoyssa nuni nu ayfen be7idos» geettes.

²² Abeet GODAWU! Neni hayssa beyaasa; hessa gishshas neni co7u gooppa; taappeka haakkofa.

²³ Abeet Godawu, ta Xoossawu! Ta gishshas oletta; denda; beegga; ta doona gidada mootetta.

²⁴ Abeet GODAWU ta Xoossawu! ne xilloteththa mala taas pirda; ta morkketakka ufayssofa.

²⁵ Istti banttas, «Hashshu, hashshu, nuni nu wozinan amottidayssi polettides; nuni iza mittidos» gaana mala ooththofa.

²⁶ Ta waayen ufayettizayti ubbay yeellatettonne kawuyetto; ta bollan otorettizayti yeellanne kawushshateth may7etto.

²⁷ Tani shatumizayssa dosizayti ufayettidi «Hashshu!» getto; istti ubba wode, «Ba aylleza saroteththan ufayettiza GODAY dhoqqu dhoqqu go» getto.

²⁸ Gallas kumeth ta inxarsay ne xilloteththinne ne galata yootana.