ዬ ማጻፋ 144 - Geeshsha Maxaafa

Dawite Mazamure

¹ Ta kusheta olas, ta biradhdhetakka xongeththas loohissida GODAY ta zaallay galatetto!

² Izi tana siiqizanne genththiza Xoossa; izi taas miixanne tana ashshizayssa; izi ta gondallenne tani baqatada attizaso; kawoteththatakka izi taas haarisizayssa.

³ Abeet GODAWU! Ne hayssa sire bonchchanaas asi aazee? Ne hayssaththo asas qoppanawu asa nay aazee?

⁴ Asi issito carki aadhdhiza carko mala; iza layththatikka eeson dhayza kuwa mala.

⁵ Abeet GODAWU! neni salaa daakkada duge wodhdha! zumata bochchada cuwasa!

⁶ Wolqqanth yeddada ne morkketa laalla! Ne wondafe yiishshan dukkada yedeththa!

⁷ Bollafe ne kushe yeddada, tana wolqqama haaththafe goochcha kessa; allaga asata kusheppe ne tana ashsha.

⁸ Istta doonay wordo haasayees; istti ushachcha kushe denththidi wordo caaqqeettes.

⁹ Abeet Xoossawu! Tani nees ooraththa mazamure yexxana; tammu shayan waaxettida diiththan nees yexxana.

¹⁰ Kawotas xoono immaasa; ne aylle Dawite giththa mashshafe ashshaasa.

¹¹ Wordo haasayzaytappenne ba ushachcha kushe denththidi wordo caaqqizaytappenne allagatappe tana ashshanne naaga.

¹² Nu attuma nayti ba naateteththan dalqidalqidi dicciza miththa mala gidetto! Nu macca naytikka kawo keeththa gulan alleqos essida tuuqe mala gidetto.

¹³ Nu gootaratan dumma dumma qommo kaththi kumo; nu dorsati shii laaqqa gakkanaas yeletto; heemettizason tammu shii gakkanawu daretto.

¹⁴ Nu miizati yelizayta gidetto; istti awucayontta yelettidi corattetto. Nuna asi di7oppo; nu zagon waasoy siyettofo.

¹⁵ Ha anjjoy iza gakkiza derey anjjettida dere; Xoossi izas GODAA gidida derey anjjettida dere.