ዬ ማጻፋ 108 - Geeshsha Maxaafa

Dawiti Yexxida Mazamure

¹ Abeet Xoossawu! Ta wozinay mino; tani nees kumeththa wozinappe yexxananne nena sabbana.

² Ta diiththinne maasinqoy dendite! tanikka maalado wonttara dendana.

³ Abeet GODAWU! Tani deraa giddon nena galatana; qasse kawoteththata giddon nees saban yexxana.

⁴ Ne siiqoy gita; salotappeka aadhdhees. Ne ammaneteththayka pude salo gakkees.

⁵ Abeet Xoossawu! Salotappe bollara dhoqqu dhoqqu ga! Ne bonchchoy biitta ubbaa gakko.

⁶ Neni siiqizayti attana mala ne ushachcha qesen nuna ashsha; ta woosa siya.

⁷ Xoossi ba geeshshasohon dishe, «Tani xoonada Seekeeme biitta shaakkana; qasse Sukoote Zullaa gishana.

⁸ Gala7aadey tayssa; Minaaseykka tayssa; Efreemey ta hu7en woththiza birata qoobe; Yuhuday ta kawoteththa guufe.

⁹ Mo7aabey taas meechchaso; Eedoomey tayssa gididayssa erisanaas tani ta caamma iza bolla woththays; tani Filisxeeme xoonada gererays» gides.

¹⁰ Gimbettida katamaakko tana oonee efanay? Eedoome gakkanaas tana oonee kaaleththanay?

¹¹ Abeet Xoossawu! Nuna aggiday nena gidikkii? Neni nu olanchchatara kezikke gadasa.

¹² Asa maadoy hada; hessa gishshas nu morkketa bolla nuus xoono imma.

¹³ Xoossi nunara gidikko nuni morkketa xoonana; izi nu morkketa ba tohon yedhdhana.