ሌሚሶ ማጻፋ 25 - Geeshsha Maxaafa

Solomooney Xaafida Hara Leemisota

¹ Yuhuda Kawo Hizqiyaasa asati duuqqidi xaafida Solomoone leemisoti hayssafe kaallizayta.

² Xuura genththoy Xoossas bonchcho; xuura pilggidi kesoy kawotas bonchcho.

³ Salota dhoqqateththanne sa7a ciimmateththa asi gakkonttayssa mala, kawota qofaakka asi pilggi eranaas dandayenna.

⁴ Birappe qita diggaycha; wogaceykka qoxxidi lo7o miish kessana.

⁵ Kawo sinththafe iitata diggaycha; histtiko iza kawoteththa araatay xilloteththan minni eqqana.

⁶ Kawo sinththan nena dhoqqu dhoqqu histtofa; gita asata giddon beettanaas amottofa.

⁷ Gita asa sinththan nena kawushshanaappe izi barkka nena, «Haysso dhoqqu ga» giikko nees lo7o.

⁸ Ne ayfezan be7ida ubbaa markkattanaas dubbusha baanaas eesotoppa; ays giikko neni markkatta simmiin, hara asi ne markkateththay bala gididayssa qonccisikko neni yeellatana.

⁹ Neessinne ne laggezas giddon palamay medhettiko, he palama garsan hara asa xuura qonccisoppa.

¹⁰ Histtontta aggiko neni yootizayssa siyida asi nena kawushshana; hessan ne sunththay nam7anththo simmidi lo7ontta mala moorettana.

¹¹ Koshshiza wodezan haasayettida likke qaalay bira bolla tigettida worqqa alleqo mala.

¹² Aadho erateththi diza asi zoriza zorey ezgiza asas hayththan aaththiza worqqa mala; woykko muuruta worqqafe oosettida alleqo mala.

¹³ Kath shiishshiza wode irxxa haaththi uyiin aliza mala; ammanettiza kiitanchchay bana kiittizayta ufayssees.

¹⁴ Immonttayssa, «Immana» giidi coo paapottiza asi iray baynda shaaranne carko mala.

¹⁵ Dandayanchcha asi dere haarizaade yooti mayzees; liiqo qaalay meqeth kanththi gelees.

¹⁶ Ees demmiko ginara ma; gido attiin darssiko nena xuuggana.

¹⁷ Nena uufidi ixxontta mala ne lagge soo ubbato booppa.

¹⁸ Ba laggeza bolla wordora markkattiza asi koxey, giththa mashshaynne wondafey as qohiza mala qohees.

¹⁹ Metto wode ammanettontta asan zemppoy, qaaxxiza achchan coommiza malanne silida tohon hemettiza mala.

²⁰ Ceeci uttida asas mazamure yexeththi meego gallas may7o qaariza malanne madunththa bolla xuuggiza miish tigiza mala.

²¹ Ne morkkey gafikko miza; saamettiko ushsha.

²² Neni hessaththo ooththiko iza hu7en tama bonqo kaashidi qolizaade mala. GODAYKKA ne oosos waaga immana.

²³ Arshey mokkiza bagga carkoy ira ehiza mala, zigirsi hanqo ehees.

²⁴ Duunama machchira issi keeththan de7anaappe keeththa daaranchchan deeththi lo7o.

²⁵ Daaburda asi irxxa haath uyidi aliza mala haakko biittafe yiza lo7o qaalay ufayssees.

²⁶ Iita asa sinththan kundiza xillo asi bulqottida pulttonne moorettida olla haaththa mala.

²⁷ Daro eessa muusi lo7o gidenna; hessaththoka baas bonchcho koshshi bonchchisenna.

²⁸ Bana haarontta asi gimbey laalettida katama mala.