ሌሚሶ ማጻፋ 14 - Geeshsha Maxaafa

¹ Aadho erateththi diza maccassaya ba keeth keexxawus; eeyaya gidikko ba keeth ba kushen laallawus.

² Suure hemettiza asi GODAAS yayyees; geella oge hemettizay gidikko iza kadhees.

³ Eeya haasayay iza zokkos gatuma ehees; aadho eranchchata inxarsay gidikko istta naagees.

⁴ Booray bayndason gootaray mela dees; gido attiin nees boorata wolqqan daro kaththi beettees.

⁵ Ammanettiza markkay ubbato tuma markkattees; wordo markkay gidikko wordo markkattees.

⁶ Qilccizay aadho erateth koykkoka demmenna; akeekay diza asi waayettontta erateth demmees.

⁷ Eeya asappe haakka; ays giikko neni iza haasayappe erateth demmaka.

⁸ Akeekanchcha asas aadho erateththi ba oge naago; eeyata eeyateththi gidikko istta cimmees.

⁹ Eeyati nagara ooththidi modhettanayssa aggidi qilcceettes; suure asatappe gidikko lo7o qofay beettees.

¹⁰ Issoy issoy ba wozinan diza ceece erees; iza ufayssaa oonikka izara koxxenna.

¹¹ Iitata keeththay laalettana; suureta keeththay gidikko minni de7ana.

¹² Asas likke misatiza ogey dees; wurseththan gidikko hayqos gaththees.

¹³ Miichchankka wozinay meqqi erees; muuzoteththan ufayssi polettana dandayees.

¹⁴ Ba wozina xilloteththafe haassizayti ba ooso waaga ekkana; lo7o asikka ba lo7o ooso waaga ekkana.

¹⁵ Eeya asi ubbaa miish ammanees; cinccay gidikko akeekidi tanggees.

¹⁶ Aadho eranchchay GODAAS yayyeessinne saatti tanggees; iitappeka haakkees; eeyay gidikko wuday baynda bichcharees.

¹⁷ Elle hanqettiza asi eeya ooso ooththees; yo7o qachchiza asi dosettenna.

¹⁸ Wozina paceti eeyateth laattana; akeekanchchati gidikko erateth kallachcha mala goxxana.

¹⁹ Iitati lo7ota sinththan gulbatana; nagaranchchati xillota pengen hokkana.

²⁰ Manqota istta laggetikka ixxeettes; duretas gidikko daro laggeti deettes.

²¹ Ba shooro kadhiza asi nagara ooththees; gido attiin manqo maaddizay anjjettidayssa.

²² Iita halchchizayti suure ogeppe kare kezeettes dettenee? Lo7o qoppizayti gidikko siiqonne ammaneteth eheettes.

²³ Minni ooson ubbaan wodhey dees; hada yo7oy gidikko manqisees.

²⁴ Aadho eranchchatas istta dureteththi isttas kallachcha; eeyata eeyateththi gidikko coo hada.

²⁵ Tumu markkay shemppo ashshees; wordo markkay gidikko baleththees.

²⁶ GODAAS yayyiza asas mino miixay dees; iza naytaska baqati attiza sohoy dees.

²⁷ GODAAS yashshi de7o pultto; hayqo woximadeppe as ashshees.

²⁸ Dere corateththay kawos bonchcho; dere guuththateththi kawos bash gidees.

²⁹ Dandayanchcha asas gita akeekay dees; elle hanqettiza asi gidikko ba eeyateth qonccisees.

³⁰ Woppu gida wozinay bollas payyateth immees; qanaatey gidikko meqeththa giddon gelida woyzazire mala.

³¹ Manqota naaqqiza asi istta medhdhidayssa cayees; metotanchchatas qadhettizaa gidikko Xoossa bonchchees.

³² Iitati bantta iita ooson kundana; gido attiin xilloti hayqo wodekka baqati attizasoy dees.

³³ Akeekanchcha asaa wozinan aadho erateththi kumides; gido attiin eeyati aadho erateththa gishshas aykkoka erettenna.

³⁴ Xilloteththi kawoteththaa dhoqqu dhoqqu ooththees; gido attiin nagaray ay asikka kawushshees.

³⁵ Aadho erateththi diza aylley kawo ufayssees; gido attiin yeellachchiza aylley ba bolla hanqo ehees.