ኢዮቤ ማጻፋ 13 - Geeshsha Maxaafa

¹ «Hekko hayssa ubbaa ta ayfey be7ides; ta hayththika siyidi akeekides.

² Intte erizayssa keena tanikka erays; ta aykkonka inttefe guuxxike.

³ Gidikkoka ta haasayay ubbaa dandayza Xoossara; ta izarakka marshettana.

⁴ Intte gidikko wordon kumideta; oonakka paththanawu dandayontta aakimeta mala.

⁵ Hayssa ubbaafe intte co7u gidaakko eranchchata misati beettanakkoshin!

⁶ Tani shiishshiza marshe qaala siyite; ta qohokka tani yootishin co7u giidi ezgite.

⁷ Xoossa sunththan ays wordo haasayeetii? baleththon intte Xoossa ufayssana inttes misatizee?

⁸ Iza bessontta ogera maaddeetii? Izas xabaqa eqqandetii?

⁹ Xoossi inttena qoridaakko issi lo7o miish inttefe demmandeshaa? Intte asata eeysizayssa mala Xoossaka eeyssanawu dandayana inttes misatizee?

¹⁰ Intte geemara wordo maaddiko tumappe Xoossi inttena hanqana.

¹¹ Iza bonchchoy inttena yashshennee? Iza teemaykka inttena daganththennee?

¹² Intte leemison haasayza haasayati bidinththa mala go7ay bayndayta; intte marsheteththayka mana miishsha mala meqerettana.

¹³ Ane co7u giite! Tani haasayana mala taas gisha immite; hessafe guye ba dosoyssa hano.

¹⁴ «Tani ach saxxada gencecashe dizay aazassee? Ta shemppoyakka ta kushen dawus.

¹⁵ Hessa gishshas Xoossi tana wodhana koykkoka taappe attiza miishshi aykkoyka deenna; gidikkoka ta hanoza izas erisana.

¹⁶ Nagaranchcha asi Xoossa sinththi shiiqanaas dandayontta gishshas oonee erizay hayssi ta xalateththi paxanaas gaaso gidanaas dandayees.

¹⁷ Ane ta haasayza qaalata wogara ezgite; ta doonara ta markkattizayssa siyite.

¹⁸ Ta marsheteththaa lo7eththa giigsada shiishshadis, izi taas pirdanayssaka ta erays.

¹⁹ Tana mootizay diikko tani marshettontta co7u gaada hayqqana.

²⁰ «Godawu! Ta ne sinththafe qotettontta mala heyta nam7u miishshata taas ooththa.

²¹ Heytikka ne hanqo qeseta ta bollafe denththa; yashissiza ne taman tana daganththofa.

²² Xoossawu! Koyro ne haasaya; ta nees zaaro immana; tanikka haasayana; nekka zaaro imma.

²³ Ero gido ta ooththida nagaraynne qohoy ay likkee? Ane ta moorozanne ta nagara tana erisa.

²⁴ Ne sinththa taappe genththada tana ne morkke mala aazas qooday?

²⁵ Carkoy qoqofiza boncco malanne mela happa mala ne ays tana yashiseththan goodday?

²⁶ Ta bolla ne xaafida mootoy keehi camo; tani yelagateththan ooththida qohozakka taas aggabeekka.

²⁷ Ne ta tohota durumata giddon qachchadasa; ta tanggo ubba wode ne kaalettaasa; ta geedon ne eqqaasa.

²⁸ «Hessa gishshas tani wooqqida miishsha mala gidada attana; baday mida may7o malakka ta dhayana.