ኤርማሳ ቲንቢቴ 49 - Geeshsha Maxaafa

Amoone Deres Yootettida Kiita

¹ Amoone asaa GODAY, «Isra7eeley attuma nayta yelibeennee? woykko iza laattanayti baawee? Histtiin Milkkoomey Gaade ays laattidee? Iza asati ays katamayn dizoo?

² Amoone katama Eraaba bolla ola waaso cenggurssi seetettana wodey yaana. Iza budhettada doorettida doore gidana; izi gutati ubbay xuugettana; Isra7eeley bana kessi gooddidayta ba dereppe kessa gooddana.

³ Hanne Haseboone! Aye katamay dhayda gishshas yeekka; Eraaba macca naytoo waassite; maaqa may7idi yeekkite; gaasoykka Milkkoomey ba qeesetaranne ba shuumetara di7ettidi baana; dirsa giddon yaanne haa woxerettite.

⁴ Hanne kaddidaaree! Neni ne shoobbatan ays ammanettay? Neni lo7o kath immiza ne shoobban ays ceeqettay? neni ne dureteththan ceeqettada, ‹Tana oonee bochchanay?› gaasa.

⁵ Tani ne yuushon dizaytappe ne bolla shiro ehana; intte ubbayka goodettana; baqata bolla dizayta shiishshana asi beettenna.

⁶ «Hessafe guye tani Amoone asaappe di7ettida miishshaa zaarana» gees.

Eedoome Gishshas Yootettida Kiita

⁷ Eedoome gishshas GODAY Ubbaafe wolqqama Xoossay, «Aadho erateththi Temaane asaappe dhaydee? Zorey akeekanchchatappe haakkidee? Istta aadho erateththay cingidee?

⁸ Tani Eesawe qaxxayiza wode ta iza bolla bashsha ehiza gishshas intte Didaanen dizayti guye simmi baqatite; ciimma olla giddon qotettite.

⁹ Woyne maxizayti intteko yiidi maxishe pushulo ashshi erettennee? kaysoti kaysotana gelikko ba koyidayssa xalla ekkeettes deettennee?

¹⁰ Gido attiin tani Eesawe paxa kallo ashshana; izi qotetti attontta mala izi qotettanaasohota tani qoncce kessana; iza nayti, iza dabbotinne iza shooroti dhayana; izikka ba hu7es deenna.

¹¹ «Yelida aayanne aaway baynda ne garsan diza nayta ne aggaaga; ta istta dichchana; am7etikka tanan ammanettetto» gees.

¹² GODAY, «Xawa uyana bessonttaytas xawa ushshi attonttayssa gidikko neni waana qixaateppe attanee? Nees qaxxayeteththi attenna; ne uyanaas bessees.

¹³ Booxiray laalettada dagamas, qidhessinne qanggeththas malata gidana mala tani tanan caaqqadis; izi katamati ubbay mernaas aykkoy baynda bula gidana» gees.

¹⁴ GODAAPPE yida issi kiita siyadis; «Eedoome bolla worajjanaas shiiqite; olettanaas dendite!» gi yootiza qasttanney kawoteththatakko kiitettides.

¹⁵ GODAY, «Ha7i tani nena kawoteththata giddon laafa; asaa giddonkka kadhettidaade ooththana.

¹⁶ Nenoo zaalla gongolo giddon dizayssoo! Nenoo dhoqqa zumbulla hu7en uttidayssoo! Ne yombiza yombaynne ne wozina otoroy nena baleththides; neni ne keeth golle mala dhoqqasohon keexxikokka tani nena heeppe duge olana» gees.

¹⁷ GODAY, «Eedoomey dagamas malata gidana; heera aadhdhiza as ubbay izi bolla gakkida bash be7idi malalettishe qidhana.

¹⁸ Sodoomeynne Gamooray bantta yuushon diza katamatara issife dhayda mala Eedoomey dhayana; oonikka he biittan de7enna; issaadeyka izin uttenna» gees.

¹⁹ GODAY, «Gaammoy Yordaanoose woratappe mehe heemmiza demban kezi wodhdhiza mala tanikka Eedoomey qoppontta dishin keza wodhdhana; iza biittafe ta iza gooddana; ta dooridayssa iza bolla shuumana; ta malay oonee? tanara eqettana dandayzay oonee? tanara eqettana dandayza heenththanchchay oonee?» gees.

²⁰ Hessa gishshas tani GODAY Eedoome bolla polanaas halchchida halchchonne Temaanen dizayta bolla ta qoppida qofaa siyite! guuththa wudeti gooshetti baana; hessa gaason wudey heemettizaso mulera dhayssana.

²¹ Eedoome kundeththa giirissi biitta qaaththana; istta waasoykka Zo7o abba gakkanaas kooshumees.

²² Golle mala duge sitti gi izi bolla wodhdhana; ba qefetakka Booxira bolla miccana; he wode Eedoome olanchchati miixay oykkida maccassa mala hirgana.

Damasqo Gishshas Yootettida Kiita

²³ GODAY Damasqo gishshas, «Hamaate asaynne Arfaade asay Damasqo katama dhayo siyidi dagammides; abba dambala mala shirotides; istta wozinaykka seerides.

²⁴ Damasqoy daaburadus; baqatanaas guye simmadus; kokkoradus; miixay oykkida maccassa mala ceeceynne tuggay izo oykkides.

²⁵ Ta izin ufayettiza erettida katamaya waana yegetta attadee?

²⁶ He wode izis naateththa attuma nayti ubbay ke7idason ke7idason oge bolla kundana; olanchchati ubbayka hayqqi wurana.

²⁷ Tani Damasqo katama yuushon diza gimbe bolla tama yeddana; he tamay Beeni-Hadaade shakko maana» gees.

Qeedaare Gishshassinne Haxoore Gishshas Yootettida Kiita.

²⁸ Baabiloone kawo Nabukadanaxoorey oli xoonida Qeedaare kawoteththa gishshassinne Haxoore kawoteththa gishshas GODAY, «Dendidi Qeedaare olite! Arshey mokkiza baggara diza deraa dippi histtite.

²⁹ Istta dunkaanetanne istta wudeta ekkite! Istta aqosoynne istta gaamellati ubbay attontta ekettana; Histtidi isttas, ‹Istta bolla shiro bolla shiroy yides› giidi waassana.

³⁰ «Intteno Haxooren dizaytoo! Baabiloone kawo Nabukadanaxoorey intte bolla iita miish ooththana maqetti uttida gishshas baqatite; biidi ciimma gongolon qotettite.

³¹ «Dendite! Hirgay baynda badhdhi gi uttida banan ammanetti uttida kawoteththaa olite! Ibiththi woykko kolatay baynda dishin barkka diza deraa bolla worajjite» gees.

³² GODAY, «Istta gaamellati bonqqettana; istta wudetakka buuri ekki baana; bantta hu7e gaamme histti meedettidayta tani carkon laallana; tani Ubbasora istta bolla bosha ehana.

³³ «Haxoorey worakanata duussaso gidana; mernaas bula gidana; oonikka heen de7enna; ay asikka izin uttenna» gees.

Eelaame Gishshas Yootettida Kiita

³⁴ Yuhuda kawo Sedeqiyaasi kawotida koyro layth GODAAPPE Elaame gishshas taakko yida qaalay,

³⁵ Ubbaafe wolqqama GODAY, «Hekko izi wolqqateththas yoch gidida Elaame wondafeta ta menththana.

³⁶ Oyddu bagga gulatappe tani Elaame bolla oyddu carkota ehana; istta he oyddu bagga carkotan ta laallana; Elaameppe di7etti bidayti gakkontta kawoteththay deenna.

³⁷ Istta shemppo wodhana koyza istta morkketa sinththan tani Elaame yarkiyarkisana; istta bolla bash ehana; hessika ta istta bolla ehana hanqo; tani istta mulera dhayssana gakkanaas mashshan yedeththana.

³⁸ Tani araata Elaamen tokkana; tani izi kawotanne shuumeta dhayssana.

³⁹ «Gido attiin wurseththa wodetan tani Elaame zaara ishalsana» gees.