ኢሳያሳ ቲንቢቴ 64 - Geeshsha Maxaafa

¹ Abeet GODAWU, neni salota daakkada duge wodhdharkkii! Zumati ne sinththan kokkoretto.

² Qayxare tamay haath penttisiza mala, ne morkketa matan ne sunththi erettana mala wodhdha; kawoteththatakka ne sinththan kokkorssa.

³ Kasekka neni nu qoppontta yashissiza miish ne ooththida wode ne wodhdhiin zumati kokkorida.

⁴ Beniisofe doommidi hidota ooththi naagizaytas gakkiza malaata ooththiday neeppe attiin hara Xoos be7ida ayfeynne siyida hayththi mulekka deenna.

⁵ Suure miish ufayssan ooththizaytanne ne oge qoppizayta neni maaddaasa; gido attiin nuni istta bolla pacey baynda nagara ooththida gishshas hekko neni nu bolla hanqettadasa; histtiin nuni waani attana dandayzonii?

⁶ Nuni ubbayka tuna asa mala gididos; nu xilloteththa ooso ubbay tunida carqqa mala. Nuni ubbayka boncco mala qokkidos; nu nagaray nuna carko mala pitti efides.

⁷ Oonikka woosan ne sunth xeygenna; nena oykkana paaccizaykka deenna; neni ne ayfeso nuuppe genththadasa; nu nagaray nuna dhayssana mala aggadasa.

⁸ Gidikkoka abeet GODAWU, neni nuus aawa; nuni urqqata; neni nuna medhdhidayssa; nuni ubbayka ne kushen medhettidayta.

⁹ Abeet GODAWU, keeha hanqettofa; nu nagaraakka mernaas qoppofa; nuus woosetta; nu ubbay ne dere gidida gishshas ne ayfeso nuukko haa zaara.

¹⁰ Ne geeshsha katamati aykkoy baynda bazzo gidida; Xiyoonakka aykkoy baynda bazzo biitta gidadus; Yerusalaameykka yegetta attadus.

¹¹ Nu aawati kase nena izan galatiza Xoossa Keeththay taman xuugettides; kase lo7osoti ubbatikka dhayda.

¹² Abeet GODAWU, hayssi ubbay haniinkka ne simmikii? Neni co7u gaada nuna zaway baynda qixaate qaxxayay?