ኢሳያሳ ቲንቢቴ 61 - Geeshsha Maxaafa

Atoteththa Mishiraachcho

¹ Ubbaa Haariza GODAA Ayanay ta bolla dees; hiyeesatas mishiraachcho yootana mala, GODAY tana tiydes. Izi tana wozinay meqqidayta koolana mala, di7ettidayta la7a kessana mala, qashettidaytas birsheth awajjana mala kiittides.

² Dosettida GODAA layth, nu Xoossay halo kessiza gallassa awajjana malanne yeekkizayta ubbaa minththeththana mala tana kiittides.

³ Qasseka Xiyoonen kayottizayta doshisana mala, bidinththa gishshas puulateththa kallachcha; yeeho gishshas ufayssa zayte istta hu7en ta gussana mala, ceece ayana gishshas galata seelo ta istta bolla gophana mala tana kiittides; isttika iza bonchcho qonccisana mala GODAY tokkida xillo mith geetetti xeygettana.

⁴ Istti beni laalettidayta zaari keexxana; kase wode kundidaytakka zaari essana; daro yeletatappe kase kundidaytanne laalettida katamata zaari keexxana.

⁵ Imaththati intte dorsa wudeta heemmana; allaga biitta asati intte gadeninne intte woyne atakilte giddon ooththana.

⁶ Intte qasse, «GODAA qeeseta» geetetti xeygettana; asaykka inttena, «Nu Xoossaa oosanchchata» giidi xeygana; intte kawoteththata aqota maana; istta dureteththankka intte ceeqettana.

⁷ Ta derey yeellatidayssa qoodhe nam7u kushe ekkana; kawuyidayssa qoodhe bantta xinxxon ufayettana; bantta biittaas nam7u kushe laattana; mernaa ufayssi isttas gidana.

⁸ Tani GODAY suure pirda dosays; bonqqanne qoho ixxays. Ta ammaneteththan isttas bessizayssa immana; isttara mernaa caaqo qaala gelana.

⁹ Istta zareti kawoteththata giddon, istta nayti dere giddon erettidayta gidana; istti be7iza ubbay GODAY anjjida dere gididayssa erana;

¹⁰ Tani GODAAN keehippe ufayettays; ta shemppoyakka ta Xoossan hombocawus; mishiray ba hu7en kallachcha goxxiza mala, mishirayakka bana inqqun seeleththiza mala atoteththa may7o tana mayzides; xilloteththa seelokka ta bolla gophides.

¹¹ Biittay caarech caarissiza mala, atakiltesohoy puute puutisiza mala, Ubbaa Haariza GODAY kawoteththata ubbaa sinththan xilloteththinne galata caarissana.