ኤራንቻታ ማጻፋ 8 - Geeshsha Maxaafa

¹ Yo7ota birshana dandayza aadho eranchcha mala asi oonee? Yo7ota ubbaa birsheth erizay oonee? Aadho erateththi asa ayfeso poo7isees; xirphotida sinththika birshees.

Kawos Azazeteth

² Ne kase Xoossaa sinththan caaqqida gishshas kawos azazetta.

³ Kawo sinththafe eeson kezoppa; izi ba dosidayssa ooththanaas dandayza gishshas iita oosos zuppetoppa.

⁴ Ubbaa miish ooththanaas kawos maatay diza gishshas, «Hayssa ays ooththay?» giidi iza oychchanaas dandayzay oonee?

⁵ Izas azazettiza asi ubbay qohettenna; aadho erateththi diza wozinay likke wodenne bessiza ooso oge shaakki erees.

⁶ As metoy keehi un7eththikokka ubbaa miishshaska likke wodeynne bessiza ooso ogey dees.

⁷ Sinththafe hananayssa erizay deenna; hessa gishshas sinththafe hananayssa yootanaas dandayzay oonee?

⁸ Asi ba shemppo naagi ashshanaas dandayenna; woykko ba hayqqana gallassa bolla maatay diza asi deenna; ola gallas oonikka ola yeggidi guye simmonttayssa mala iita oosoykka banara meezetidayta yeddenna.

Iita Asata Hanotanne Kiya Asata Hanota

⁹ Salo gufanththon haniza miish ubbaa tani pilgga be7adis; asi as qohanaas daannatiza wodey dees.

¹⁰ Qasse iitati bonchchon moogettishininne geeshsha kataman sabettishin, Xoossa asati geeshsha kataman dogettishin ta be7adis; hessi ubbayka hada.

¹¹ Iita ooththida asa bolla eeson pirdontta aggiko asa wozinay iita ooththana halchchon kumees.

¹² Nagaranchchay xeetuto iita miish ooththishin iza layththay aduqqikokka, Xoossa bonchchizaytassinne Xoossa yayyizaytas lo7oy hananayssa ta erays.

¹³ Gido attiin iitati Xoossas yayyontta gishshas lo7o miishshi isttas hanenna; istta layththi eesho mala elle aadhdhana.

¹⁴ Sa7a bolla oosettiza haray hada miishshi dees; hessika xilloti iitatas bessiza qixaate, iitati xillotas bessiza lo7o miish ekkeettes. Heyti ubbayka hada.

¹⁵ Salo gufanththon asas muussafe, ushshafenne ufayeteththafe aadhdhiza hara miishshi baynda gishshas ba de7o layththan ufayeteththi lo7o gadis; hessa gishshas Xoossi salo gufanththon izas immida layththatan izi ba ooson ufayettana.

¹⁶ Tani aadho erateth eranaassinne asi ha sa7a bollan omarsinne gallas dhiskoy baynda daaburza daaburaa eranaas ta wozinan pilggadis.

¹⁷ Hessafe guye Xoossi ooththida ubbaa be7adis; salo gufanththon oosettiza miish oonikka erenna; asi keehi dafettidi pilggi xeellikokka iza birsheththaa demmanaas dandayenna. Aadho eranchchay, «Ta erays» giikkoka ubbaa eranaas dandayenna.