2ካዎታ ማጻፋ 19 - Geeshsha Maxaafa

Kawo Hizqiyaasi Nabe Isayaasa Oychchida Zore

¹ Kawo Hizqiyaasi hessa siyidi ba may7o daakkides; maaqa may7idi Xoossa keeth gelides.

² Hessafekka kawoteththa keeththan azaziza Elyaaqeemey, xaafe Sheebinaynne waanna qeeseti maaqa may7idi Amoxe naa nabe Isayaasakko baana mala ubbaa kiitti yeddides.

³ Isttika izas, «Hizqiyaasi, ‹Hanna gallassaya meto, miirenne kawushshateththa gallas; hanna gallassaya nay yelettanaas aaya keeha miixattashe yela yegganaas wolqqa dhayda gallassa.

⁴ De7o Xoossaa kawushshanaas ba goda Asoore kawoy yeddida gadawaa qaala ubbaaka GODAA ne Xoossay siyidaa gidana; izi siyida qaalaa gishshas GODAA ne Xoossay iza hanqana mala neni shemppora paxa diza asaas Xoossa woossarkkii!› gides» gida.

⁵ Kawo Hizqiyaasa shuumeti Isayaasakko yida wode,

⁶ Isayaasi isttas, «Intte intte godaas, ‹GODAY nees Asoore kawo oosanchchati ta bolla cashsha qaala haasaydayssa siyada babbofa;

⁷ Tani iza bolla hessa mala ayana yeddana; izikka wore siyidi guye ba dere simmi baana; izi heen mashshan hayqqana mala ta iza ooththana› gi yootite» gides.

⁸ Olanchchata gadawazikka Asoore kawoy Laakisheppe dendi bidayssa siyidi guye simmides; kawozi Libinara olettishin demmides.

⁹ He wode Tophphiya dere yeleta gidida Gibxe kawo Tiraaqey iza olanaas yuussa bolla dizayssa Senakireemey siyides; hessa gishshas zaareththidi Hizqiyaasakko qasttanneta bolla dabdaabbe,

¹⁰ «Intte biidi Yuhuda kawo Hizqiyaasas, ‹Ne izan ammanettiza Xoossay Yerusalaamey Asoore kushen kunduku› giidi nena baleththofo.

¹¹ Hayssafe kase aydekka Asoore kawoti dere ubbaa bolla ay ooththidaakko ne siyadasa; izi istta mulera dhayssides; histtiin neni kessa ekkada attanaaz nees misatizee?

¹² Kase ta aawati dhayssida kawoteththata Gozaanen, Kaaraanen, Erafaasen hessaththoka Talasaaren diza Edene asata istta eeqa xoossati istta ashshidoo?

¹³ Hamaate kawotinne Arfaade kawoti ha7i awan dizoo? Sefarwayme katama kawozi awan dizee? Qasseka Heena kawoynne Iwa kawoti ha7i awan dizoo?» gi kiittides.

Hizqiyaasa Woosa

¹⁴ Hizqiyaasi Dabdaabeza qasttanneta kusheppe ekki nababides; hessafe guye pude GODAA Keeth kezidi dabdaabbeza GODAA sinththan miccides.

¹⁵ Hessafe guye Hizqiyaasi GODAAKKO, «Kirube bolla ne araatan uttida GODAA Isra7eele Xoossoo! Biitta bolla diza ubbaa bolla Xoossi nena; salonne sa7a medhdhiday nena.

¹⁶ GODAWU! Ha7i neni ne hayth yeggada hayssa siya; neni ne ayfetakka doyada xeella; Senakireemey de7o Xoossaa cayanaas kiittida qaala ezga.

¹⁷ «Abeet GODAWU; Asoore kawoti hayta kawoteththatanne istti biitta tumukka dhayssida;

¹⁸ Istta eeqa xoossatakka taman yeggi xuuggi dhayssida; isttika asa kushen miththafenne shuchchafe oosettidayta attiin xoos gidettenna.

¹⁹ Ha7ikka GODAWU nu Xoossawu! Neni xalla Xoossa gididayssa ha biittaa bolla diza kawoteththati erana mala iza kusheppe nuna ashsha» gi woossides.

Isayaasi Senakireeme Gishshas Yootida Tinbite

²⁰ Hessafe guye Amoxe naa Isayaasi kawo Hizqiyaasas hayssafe kaalli diza kiitaa yeddides. «GODAA Isra7eele Xoossay, ‹Asoore kawo Senakireeme bolla ne woossida woosaa tani siyadis› gides.

²¹ Hessa gishshas GODAY iza bolla yootida qaalay hayssa. «Geela7o Xiyoone naya nena kadhadussinne kawushshadus; Yerusalaame naya ne izi bollara piradhdha bishin ba qoodhe ne bolla qaaththawus.

²² Histtiin ne cayidaynne kawushshiday oonee? Neni ne qaala dhoqqu histtiday oona bollaa? ne otoreteththan dereqa xeellizay oona bollaa? Isra7eele geeshshaza bollayee!

²³ Neni qasttannidayta baggara Godaa bolla cash koradasa. Neni, ‹Tani taas diza daro para-gaaretan pude dhoqqa zumata bolla kezadis; Libaanoose zumaas xeera gakkadis; heeppe adussa ziga miththatanne doorettida xiidda miththatakka qanxxadasa; Tani izas wurseththa zawanne dhippi gida woran gakkadis.

²⁴ « ‹Tani hara deretankka haaththa olla bookkadis; isttafe haath uyadis; Tani ta toho caammatan yedhdhada Gibxe biitta pulttota melissadis› gadasa.

²⁵ «Daro wodeppe sinththan neni gimbettida katamata qoqofada, shuchcha keela kessana mala, tani qofa qachcha woththidayssa siyabeekkii? Beni halchcha woththidayssa ha7i polays.

²⁶ Heen diza asaa wolqqayka cingi wurides; istti dagammidi yeella may7ida; Coo mela demban mokkida atakilte mala, buro xapho yeddontta caarechcha mala, keeththa bolla mokkidi buro diccontta shullida maata mala gidida.

²⁷ «Ne awan uttizaakko, Ne ayde yaada ayde bizaakko ne ta bolla hanqettidayssa ta erays.

²⁸ Ne ta bolla hanqettida gishshassinne ne kadhey ta hayththan wodhdhida gishshas tani ne siidhen dafo yeggana; tani nena bixala barsana; ne yida ogera nena guye zaarana.

²⁹ «Hizqiyaasa! Hessas malatay hayssafe kaallizayssa; « ‹Ha layth wodhdhi maadhdhidayssa; yiza layth azabba maandeta; heedzdzanththa layththan zeridayssa maxandeta; woyne tura tokkidi iza ayfe maandeta.

³⁰ Ha7ikka Dawite keeththafe casha attidayti bantta xapho duge yeddana; bollarakka ayfe immana.

³¹ Yerusalaamen shemppora paxa attidayti, Xiyoone zuman hayqoppe attidayti istti kezana. GODAA Ubbaafe Wolqqama Xoossaa zil7eteththi hessa ooththana.›

³² «GODAY Asoore kawo gishshas, « ‹Izi hanno ha katamayo mulekka gelenna; issi toorakka xongenna; gondalle oykkidi izikko shiiqenna; izo biitta dooren giddoththenna.

³³ Izi ba yida ogera simmi baana; ha katamayo mulera simmi gelenna.

³⁴ Ta gishshassinne ta aylle Dawite gishshas gaada hanno katamayo tani gondalla ashshana› gees.»

³⁵ He gallassa omars GODAA kiitanchchay kezidi Asoore asay dunkaani uttidasohon 185,000 as wodhides; wonteththa gallas asay dendishin heera ubbaan ahay kumides.

³⁶ Asoore kawo Senakireemey heeppe dendi bides; guye Nannawe simmi biidi heen uttides.

³⁷ Issi gallas Nisraake geetettiza ba eeqa xoossaa keeth gelidi izi heen goynnishin iza nayti Adiramelekeynne Sarsarey iza mashshan siifi wodhida; heeppe kessi ekkidi Araraate gakkanaas baqatida; iza naa Aseradooney izasohon kawotides.