رومیأن 2 - Gilaki New Testament

فقد خودا تأنه گونأکأرأنَ دأوری بوکونه

¹ بلکی‌یٚم اینفر خو ورجأ فیکر بوکونه اَ مردوم چندر پٚست ایسٚد کی اَجور کأرأن کونٚده. هر وخت اینفر بٚگه کی اَ خطأکأرٚ آدمأن وأستی موجأزأت بٚبٚد رأس‌رأسِی خؤرَه محکوم کونه، چونکی اونم هو گونأیأنَ دوچأرَ به.

² ولی دأنیمی کی خودا عأدیله و اونی دأوری اوشأنی رِه کی اَجور کأرأنَ کونٚده، حقٚ سٚر ایسه.

³ اَی آدم، آیا گومأن کونی کی خودا البأقی آدمأنَ اَجور گونأیأنٚ رِه موجأزأت کونه، ولی تی گونأیأن سٚر خو چومَ دٚوٚده؟

⁴ اگه خودا تأ هسأ تٚرَه صبر و تحمول نیشأن بٚدأ، آیا اَن تِرِه موهیم نییٚه؟ آیا نفأمی کی خودا مهرٚوأنی، تی توبه کودنٚ رِه بو؟

⁵ اگه تی دیلَ سختَ کونی و توبه نوکونی تٚرَه وأشتنأکٚ موجأزأت فرأهم کونی، چونکی ایتأ کمٚ زمأتٚ میأن خودا غیظ و غضبٚ روج فأرٚسِه هو روج کی اونی دورون خودا تومأمٚ اَ دونیأ مردومَ عدلٚ اَمرأ محکومَ کونه

⁶ و هرتأیَ، اوشأنی کأرأنٚ موطأبٚق، پأدأش یا جزأ فأدِه.

⁷ اون اَبدی زٚندیگی‌یَ اوشأنی‌یَ فأدِه کی صبر و تحمولٚ اَمرأ، اونچی‌یَ کی دوروسته، انجأم دٚهٚده و او جلال و ایحترأم و زٚنده مأنستٚنَ خأیده کی خودا بخشِه.

⁸ ولی اوشأنی رِه کی خوشأنَ جٚه همه کس بِیتر دأنٚده و اوشأنی کی خودا وجودٚ حِئقت اَمرأ جنگ دأرٚده و خوشأنی گونأدأرٚ رأیأنَ شٚده، خو غیظ و غضبَ فوکونه.

⁹ اوشأنی کی گونأ کونٚده، رنج و عذأب کشئنَ دوچأر بٚده، چی یوهودی بٚبٚد چی یوهودی نٚبٚد.

¹⁰ ولی ایلاهی جلال و گولأز و آرأمٚش همٚتأ اوشأنی‌یَ سأم به کی خودا جَا ایطأعت کونٚده چی یوهودی بٚبٚد چی یوهودی نٚبٚد،

¹¹ چونکی خودا کس‌کسٚ میأن فرق نٚنِه.

¹² هر کی گونأ بوکونه، هلأکَ به، حتّا اوشأنی کی خودا بینیویشته بوبوسته دینی حوکمأنَ نأرٚده و اوشأنی‌یٚم کی خودا دینی حوکمأنَ دأرٚده اگه گونأ بوکونٚد خودا شریعتٚ قأنونأنٚ اَمرأ اوشأنَ حوکم کونه.

¹³ چونکی دینی حوکمأنٚ ایشتأوٚستٚنٚ اَمرأ نییٚه کی اینفر خودا ورجأ قوبیل بِه، بلکی اونی انجأم دئن اَمرأ بِه.

¹⁴ حتّا اوشأنی کی یوهودی نییٚده و خودا بینیویشته بوبوسته شریعتَ نأرٚده وختی خوشأنی ویجدأنٚ اَمرأ جٚه خودا حوکمأن ایطأعت کونٚده معلوم بِه کی جٚه او حوکمأن خٚوٚر دأرٚده.

¹⁵ معلوم بِه کی خودا دینی حوکمأن اوشأنی دیلٚ دورون بینیویشته بوبوسته، چونکی اوشأنی ویجدأن و فیکرأن یا اوشأنَ موتهم کونه یا اوشأنَ قوبیل کونه

¹⁶ و او پیغأمی کی وأگویا کونم اَنه: ایتأ روج اَیِه کی خودا عیسا مسیحٚ اَمرأ، همٚتأنٚ جیگأ بٚدأ فیکرأن و ایشتیأقأنَ دأوری کونه.

دینی حوکمأنٚ دأشتٚن وٚست نییٚه، وأستی اونی موطأبٚق زٚندیگی کودن

¹⁷ ولی شومأن یوهودیأن گومأن کونیدی جٚه اَ خأطر کی خودا خو دینی حوکمأنَ شٚمٚره فأدأ، شیمی جَا رأضیه و اَنکی خودا اینتخأب بوبوسته‌یأنیدی، گولأز کونیدی.

¹⁸ شومأن خودا ایرأده و خأسته‌یأنَ دأنیدی و خُبَ جٚه بد سیوأ کونیدی، چونکی اونی حوکمأنَ جٚه او زمأت کی زأی بید بأمؤختیدی.

¹⁹ شومأن کأمیل بأوٚر دأریدی کی خودا رأیَ خُب شنأسیدی؛ هنٚ وأسی شٚمٚره کورأنٚ رأ بلد دأنیدی و گومأن کونیدی کی او چراغأنٚ مأنیدی کی خودا رأیَ اوشأنی‌یَ کی ظولومأت دورون اَویرَ بوستٚده، نیشأن دٚهٚده.

²⁰ شومأن گومأن کونیدی کی بی‌عقل مردومٚ رِه رأیَ نیشأن دیهیدی و تأنیدی ایلاهی کأرأنَ حتّا زأکأنم بأموجید، چونکی گومأن کونیدی خودا حوکمأنَ کی جٚه معرفت و دوروستی پوره دأنیدی.

²¹ هسأ، شومأن کی البأقیأنَ آموجیدی، چٚره خودتأن یأد نیگیریدی؟ البأقیأنَ گیدی کی دوزدی نوکونید؛ شومأن مگه دوزدی نوکونیدی؟

²² گیدی کی زٚنأ کودن گونأیه؛ مگه شومأن زٚنأ نوکونیدی؟ گیدی کی نوأ بُتَ پرستٚش کودن؛ مگه شومأن جٚه او چیأنی کی معبدأنٚ جَا بودوزدأنه بوبوسته، ایستفأده نوکونیدی؟

²³ شومأن خودا حوکمأنَ دأنستٚنٚ رِه گولأز کونیدی، ولی اوشأنی لقد دٚمٚج کودنٚ اَمرأ خودا حورمٚتَ ایشکنیدی.

²⁴ پس عجیب نییٚه کی موقدس کیتأبأنٚ دورون بینیویشته بوبوسته: «شیمی وأسی، قومأن خودا نأمَ کوفر گده!»

²⁵ یوهودیأنٚ ختنه کودنٚ سونّت او وخت ارزش دأره کی خودا فرمأنأنٚ جَا ایطأعت بوکونید. اَطو نٚبه، جٚه او مردوم کی یوهودی نییٚده بِیتر نیئیدی.

²⁶ چونکی اگه اوشأنی کی یوهودی نییٚد خودا حوکمأنَ ایطأعت بوکونٚد، مگه تومأم او ایمتیأزأن و گولأزأنَ کی خودا خأستی شومأ یوهودیأنَ فأدَه، اَشأنَ فأندِه؟ یقین بدأنید کی فأدِه.

²⁷ اَطو بٚبه، اوشأنی کی یوهودی نییٚد و ختنه نوبوستٚد و خودا حوکمأنَ ایطأعت کونٚده وضع و اوضأع، خودا ورجأ جٚه شومأ یوهودیأنٚ وضع اوضأع خٚیلی بِیتر بِه، چونکی شومأن کی ختنه بوبوستیدی و موقدس کیتأبأن صأب ایسید، ولی خودا حوکمأنَ ایطأعت نوکونیدی.

²⁸ جٚه خأطرَ ندید هر کی اونی پئر و مأر یوهودی بٚبه و اونم ختنه بوبوسته بٚبه، یوهودی نییٚه.

²⁹ بلکی رأس‌رأسِی یوهودی اونی ایسه کی خو بأطینٚ میأن یوهودی بٚبه و ختنه‌یٚم، دیلٚ ختنه ایسه، کی بینیویشته قأنونأنٚ رأ روشٚ اَمرأ نییٚه بلکی خودا روحٚ دٚسٚ اَمرأ انجأم به. اَطوچی آدمٚ تحسین جٚه البأقی آدمأن نییٚه، بلکی خودا جَایه.