رومیأن 16 - Gilaki New Testament

پولسٚ سلأمأن روم کیلیسا اعضأ رِه

¹ اَمی خأخور فیبی‌یَ کی جٚه کنخریه شهرٚ کیلیسا خأدیمأن ایسه، شٚمٚره معرّفی کونم.

² اونَ اینفر مأنستَن کی خودا قوم میأن ایحترأمٚ لأیقده، در خوداوند قوبیل بوکونید. اونَ او ایحترأم اَمرأ کی موقدسأنٚ رِه لأیقه، در خوداوند قوبیل بوکونید و هرجور کی تأنیدی اونَ کومک بوکونید، چونکی اون خٚیلیأنَ کی ایتأ جٚه اوشأن من ببم او وخت کی ایحتیأج دأشتیم کومک بوکوده.

³ پریسکیلا و اونی مرد آکیلایَ سلأم برسأنید. اَشأن عیسا مسیح خیدمت کودن رِه، می اَمرأ همکأر بود.

⁴ رأس‌رأسِی خوشأنی جأنَ می وأسی خطرٚ دورون تأوٚدأده و تنأ می وأسی نوبو، بلکی تومأمٚ او کیلیسایأن کی جٚه اوّل یوهودی نوبود، اَشأنی جَا سپأسگوزأرٚد.

⁵ خأهیش کونم می گرمٚ سلأمأنَ او ایمأندأرأنَ کی عیبأدتٚ وأسی اَشأنی خأنه میأن جمَ بٚده فأرسأنید. می جأنٚ دیلٚ ریفِق اپینتوسَ سلأم فأرسأنید. اون اوّلی نفر بو کی آسیا میأن مسیحَ ایمأن بأوٚرده.

⁶ هطویم می سلأمَ مریمَ فأرسأنید کی خٚیلی زحمتأن بٚکٚشه کی اَمٚرَه کومک بوکونه.

⁷ می قومٚ خیشأن، آندرونیکوس و یونیاسَ کی کس‌کسٚ اَمرأ زندأن دورون ایسأبیم، سلأم فأرسأنید. اَشأن می جَا پیشتر مسیحی بوبوستٚد و روسولأن اوشأنٚ رِه خٚیلی ایحترأم نٚهٚده.

⁸ می جأن و دیلٚ ریفِق و خورومٚ مسیحی اَمپلیاسَ سلأم برسأنید،

⁹ هطویم اوربانوس کی خوداوندٚ خیدمتٚ رِه اَمی همکأره و می ریفِق اِستاخیس.

¹⁰ آپلیسَ کی خو وفأدأری‌یَ مسیحَ ثأبیت بوکوده و هطویم اوشأنی‌یَ کی آرستُبولسٚ خأنه دورون کأر کونٚده، می گرمٚ سلأمأنَ فأرسأنید.

¹¹ می قومٚ خیش هیرودیون و هطویم او ایمأندأرأنَ کی نارکسوس خأنه دورون ایسأده سلأم برسأنید.

¹² خوداوندٚ خیدمتگوزأرأنَ، گرأمی بانویأن تریفینا و تریفوسا و جأن و دیلٚ پرسیس کی خوداوند رِه خٚیلی زحمت بکشده سلأم فأرسأنید.

¹³ او اینتخأب بوبوسته مسیحی روفُسَ و اونی مأر، کی مِرِه‌یٚم ایتأ مأرٚ مأنستَن بو، می سلأمَ برسأنید.

¹⁴ خأهیش کونم می سلأمأنَ اَسینکریتوس، فلیگون، هِرماس، پَتروباس، هِرمیس و البأقی برأرأن کی اوشأنی اَمرأیٚده فأرسأنید.

¹⁵ هطویم فیلولوگوس، یولیا، نیریاس و اونی خأخور و اولِمپاس و تومأمٚ مسیحیأنَ کی اوشأنی اَمرأیٚده، می سلأمَ برسأنید.

¹⁶ کس‌کسَ ایتأ موقدسٚ مأچی اَمرأ سلأم بیگید. مسیحٚ تومأمٚ کیلیسایأن شٚمٚره سلأم رٚسأنده.

آخری گب

¹⁷ ختمٚ کلام، اَی جأن و دیلأن، خأهیش کونم جٚه اوشأنی کی دودستگی و تفرقه چأکونده، دؤر بئیسید چونکی اَجور آدمأن بأعیث بٚده، البأقیأنٚ ایمأن سوستَ بٚه و خأیده او عقیده‌یأنَ کی شیمی آموجه‌یأنٚ اَمرأ فرق کونه دروأره‌یٚ مسیح بأموجد.

¹⁸ اَجور معلمأن، اَمی خوداوند عیسا مسیحَ خیدمت نوکونٚده و فقد خوشأنٚ نفع دونبألٚده. اَشأن، خُب گب زنٚده و سأده دیلٚ مردومٚم ویشتر وختأن اَشأنی گولَ خورٚده.

¹⁹ ولی همه دأنده کی شومأن اینجیلٚ رِه وفادأر و قأیم ایسأییدی و اَ موضو وأسی خٚیلی خوشألم. ولی می آروزو اَنه کی همیشٚک دروأره‌یٚ دوروستی وأخب و آگأه بیبید و دروأره‌یٚ بدی و نأدوروستی، سأده‌ دیل و بی‌تجروبه.

²⁰ او خودا کی صولح و آرأمٚش اونی شینه، خٚیلی زود شیطانَ شیمی پأیأنٚ جیر سأوِه! اَمی خوداوند عیسا مسیحٚ فیض و لوطف شیمی اَمرأ بٚبه!

²¹ تیموتائوس می همکأر و لوکیوس، یاسون و سوسیپاتروس می قومٚ خویش، شٚمٚره سلأم رٚسأنده.

²² من، ترتیوس شیمی مسیحی برأرم کی اَ دسخطَ پولس زوأنٚ جَا نیویسٚم، می گرمٚ سلأمأنَ شِمِره اوسه کونم.

²³ گایوسٚم سلأم رٚسأنه. من اونی میهمأنٚم و مسیحیأن اَیَه اونی خأنه دورون جمَ بٚده. اِراستوس، شهرٚ خزأنه‌دأر سلأم رٚسأنه و هطویم اَمی برأر کوارتوس.

²⁴ اَمی خوداوند عیسا مسیح فیض شیمی همٚتأنٚ اَمرأ بٚبه. آمین.

²⁵ اَسه تومأمٚ جلال بر خودا بٚبه کی تأنه او اینجیلٚ موطأبٚق کی بشأرت دٚهٚم، شٚمٚره قورص و قأیم چأکونه. اَ پیغأم کی دروأره‌یٚ عیسا مسیحه، اونی نقشه‌یَ، شیمی نیجأتٚ رِه کی یوهودی نیئیدی وأشکأفته کی پیشترأن ایتأ رأزٚ مأنستَن بو کی معلوم نوبو.

²⁶ اَسه پیغمبرأنٚ پیشگویی موطأبٚق و او اَبدی خودا فرمأنٚ جَا، اَ پیغأم همه جیگأ وأگویا بِه کی مردوم، دونیأ اَسر اوسر میأن مسیحَ ایمأن بأوٚرٚد و اونی جَا ایطأعت بوکوند.

²⁷ او خودا رِه کی دأنأی یکتأ ایسه، عیسا مسیح دٚسٚ جَا تأ اَبد جلال بٚبه! آمین.