مَرقُس 13 - Gilaki New Testamentعیسا معبدٚ فوگوردٚستنٚ وأگویا کونه 1 هو روجٚ رِه کی معبدٚ جَا شؤئؤندوبود بیرون، ایتأ جٚه شأگردأن بینأ بوکود معبدٚ سأختمأنٚ جَا تعریف کودن و بوگفته: «اوستأد فأندرید اَ سأختمأنأنٚ چندر قشنگده! چی ظریفٚ بتأشته سنگأنی دأرٚد!» 2 عیسا جوأب بٚدأ«هطویه، اَ قشنگٚ سأختمأنأنَ فأندریدی؟ بدأن کی دِه هیتأ سنگ سنگٚ سٚر نٚمأنه، بلکی همه چی فوگورده.» 3 وختی عیسا زیتونٚ کوه میأن، معبدٚ روبرو نیشته بو، پطرس و یعقوب و یوحنا و آندریاس خلوتٚ خلوتی بأمؤده اونی ورجأ و وأورسئده 4 «اَمٚرَه بوگو اَ مأجیرأیأن اَکِی ایتفأق دکفه؟ اوشأنَ فأرٚسِئنٚ نیشأنه چیسه؟» 5 عیسا جوأب بٚدأ «بٚپأیید کسی شٚمٚره گول نٚزنه. 6 خٚیلیأن می نأمٚ اَمرأ اَیٚده، گده: "من مسیحم" و خٚیلیأنَ گول زنٚده. 7 جٚه دؤر و نیزدیک جنگأنٚ خٚوٚر شیمی گوش فأرٚسِه. امّا هُلَ نوکونید چونکی اَ جنگأن ایتفأق دکفه، امّا اَ زودیأنٚ رِه دونیأ تومأنَ نیبه. 8 «قومأن و مملکتأن جنگستنٚ وأسی کس‌کسٚ اَمرأ بوگو موگو کونٚده، دونیأ جوروأجور جأجیگأیأن میأن زیمین لرزه و قحطی ایتفأق دکفه. ولی اَشأن تأزه زأیمأنٚ دردٚ شورو بوستنه. 9 وختی اَ مأجیرأه‌يأنَ فأندرستید، شٚمٚره بٚپّأئید، چونکی مردوم شٚمٚره گیرده و حأکیمأنٚ دٚس ایسپأرده و کنیسه‌یأنٚ میأن شلأق زنٚده. هطویه، شٚمٚره می وأسی بٚرٚده فرمأندأرأن و پأدیشأیأنٚ ورجأ. ولی اَ کأر ایتأ خوروم فورصت به کی، اوشأنٚ رِه دروأره‌یٚ من وأگویا بوکونید. 10 اینجیلٚ پیغأم وأستی اوّل تومأمٚ قومأنَ فأرٚسٚه و بأزون آخرٚ زمأت فأرٚسِه. 11 امّا وختی شٚمٚره گیرده و بٚرٚده محکمه، پیشتر غورصه نوخورید کی چی بیگید. اونچی کی خودا شٚمٚره گه هونَ بیگید، چونکی او وخت روح‌القدس گب زٚنِه، نه شومأن. 12 «برأر، خو برأرَ و پئر، خو زأکَ مٚردنٚ رِه تسلیم کونه. زأکأن خوشأنی پئر و مأر ضد ویریزٚده، اوشأنی مٚردنَ بأعیث بٚدأ. 13 همٚتأن می وأسی شیمی جَا نیفرت اوسأنٚده. ولی هر کی تأ آخر، زحمتأنَ خو جأن بیگیره، نیجأت یأفه. 14 «بأزین وختی "مکروهٚ ویرأنگرَ" او جأ میأن کی نوأستی بِئیسه، بیدینید (اونی کی خأندأندٚره خُب بیدینه)، بأزون اوشأنی کی یوهودیه میأن ایسأده، جیویزٚده شٚده تپه‌یأنٚ ور. 15 و اوشأنی کی خأنه بأمٚ جؤر ایسأده، گورُختنٚ زمأتٚ رِه حتّا ایچی اوسأدٚنٚ وأسی خأنه میأن وأنگردٚد؛ 16 هطو اوشأنی کی کیشأورزی زیمینأنٚ سٚر ایسأده، لیوأس اوسأدٚنٚ وأسی وأنگردٚد بٚخأنه. 17 «بٚدأ بحألٚ او زنأکأنی کی او زمأت میأن شکم یا شیرخوره زأی بٚدأرٚد. 18 دوعأ بوکونید شیمی گورُختٚن زمستأنٚ میأن نٚبه. 19 چونکی مردوم او روجأنٚ میأن ایجور بلأ جَا گریفتأرَ بٚدأ کی خودا چأکوده دونیأ اوّل، تأ هسأ، ایتفأق دنکفته بو و هیوختٚم ایتفأق دنکفه. 20 و اگه خودا او سختٚ روجأنَ کوتأ نوکوده بی، هیتأ اینسأن جینویشتی امّا خو اینتخأب بوبوسته‌یأنٚ وأسی او روجأنَ کوتأ بوکوده. 21 «اگه هو روجأنٚ رِه اینفر شٚمٚره بٚگه، " فأندٚر، مسیح اَیَه ایسأ!" یا " فأندٚر، اویَه ایسأ!" بأوٚر نوکونید. 22 چونکی خٚیلی اَجور اَلکی مسیحیأن و پیغمبرأن اَیٚده و حتّا موجیزه‌یأنٚم کونٚده، جوری کی اگه ایمکأن بدأشته‌بی خودا اینتخأب بوبوسته‌یأنٚم گول زئیدی. 23 پس شٚمٚره بٚپأیید، من جٚه پیشتر اَشأنَ شِمِره وأگویا بوکودم. 24 «امّا او روجأنٚ میأن، هو موصیبٚتأنٚ پٚسی، خورشید تأریکَ به، مأه خو نورَ جٚه دٚس دِهه. 25 ستأره‌یأن فٚوٚده و نیرویأنی کی زیمینَ دأشتأندرٚد بٚپٚرکٚش دکفده. 26 بأزون مردوم همٚتأن، اینسأنٚ پٚسرَ فأندٚرٚد کی اَبرأنٚ میأن ایتأ قودرت و پیله شوکوهَ اَمرأ اَیِه. 27 اون خو فٚرٚشته‌یأنَ اوسه کونه کی اونی اینتخأب بوبوسته‌یأنَ جٚه زیمین و آسمأنٚ گوشٚه کنأرأن جمَ کونٚده. 28 اَسه اَنجیل دأرٚ جَا درس بأموجید. وختی اونی خألأن زٚپّه زٚنِه و ولگ اَوٚره، فأمیدی کی تأوستأن فأرٚسِئندٚره. 29 هطویم وختی تومأمٚ اَ نیشأنه‌یأنَ فأندریدی بدأنید کی آخرپٚسی کأر خٚیلی نیزدیکَ بوسته. 30 «رأس‌رأسِی شٚمٚره گم تأ وختی کی اَ چیزأن ایتفأق دنکفه، اَ نتأج جٚه بین نیشه. 31 زیمین و آسمأن جٚه بین شٚده، امّا هیوخت می کلام جٚه بین نیشه. 32 «امّا هیکس نأنِه کی کو روج و سأعت دونیأ آخر فأرٚسِه، فٚرٚشته‌یأنٚم حتّا نأنٚده، خودا پٚسرم اونی جَا خٚوٚر نأرِه، فقد اونَ می پئر، خودا دأنه. 33 پس نوخوسید و حأضیر بیبید، چونکی نأنیدی اَکِی او وخت فأرٚسِه. 34 «می وأگردٚستنٚ ایتأ مردأکٚ وأگردٚستنَ مأنه کی ایتأ دِه مملکتٚ جَا سٚفر بوکوده، و خو خیدمتکأرأنَ هرتأیَ ایتأ کأر بیسپأرده و دربأنٚم بٚفرمأسته کی اونی وأگردٚستنٚ رأفأ بئیس. 35-37 «پس شومأنم حأضیر بیبید چونکی نأنیدی صأب خأنه کو روج وأگرده، شب، نیصفٚ شب، خوروس خأن، صُبٚ دٚم. شیمی حواس بمأنه وختی کی اَیٚم، غیفلتٚ خأبٚ میأن نئیسید. وأزم گم کی می رأفأ بئیسید. اَن می پیغأمه شٚمٚره و همٚتأنٚ رِه.» |
© 2024 Transform Iran
Transform Iran