متّی 25 - Gilaki New Testament

آمأده و آگأه بیبید

¹ «او زمأتٚ دورون، آسمأنٚ ملکوت ده‌تأ ندیمه‌یَ مأنه کی خوشأنٚ چراغأنَ روشنَ کودٚد کی بٚشٚد زأمأ پیشوأز.

² پِنج تأ جٚه اَ ندیمه‌یأن عأقیل و پِنج تأ بی‌عقل بود.

³ بی‌عقلٚ ندیمه‌یأن خوشأنٚ چراغأنَ اوسأدٚد، ولی خوشأنٚ اَمرأ روغن نبردٚد.

⁴ ولی ندیمه‌یأنی کی عأقیل بود خوشأنٚ چراغأنَ اَمرأ پورٚ روغنٚ جیگأیم ببردٚد.

⁵ جٚه اَ خأطر کی زأمأ اَمؤن دٚرأزه بٚکٚشه، ندیمه‌یأنَ خأب بٚسٚرَ شؤ.

⁶ ولی نیصفٚ شبٚ رِه، ایتأ صدا بأمؤ کی: "زأمأ اَمؤندره! ویریزید و بیشید اونی پیشوأز!"

⁷ ندیمه‌یأن همٚتأن ویریشتٚد و خوشأنی چراغأنَ آمأدَه کودٚد.

⁸ او پِنج تأ کؤر کی بأقأیده خوشأنٚ اَمرأ روغن نأوٚرده بود، وختی بیدِده خوشأنی چرأغأن خأموشَ بوستن دٚرٚه، او پِنج تأ دِه کؤرٚ جَا روغن بٚخأستٚد.

⁹ ولی اوشأن جوأب بٚدأده: " اگه اَمی روغنٚ جَا شٚمٚره فأدیم، خودمأنٚ رِه وٚست نییٚه. بِیتره بیشید روغن فوروشأن جَا شِمِره روغن بیهینید."

¹⁰ ولی وختی اوشأن روغن هِئِنٚه رِه بوشؤبود، زأمأ جٚه رأ فأرٚسِه و اوشأنی کی آمأدَه ایسأ بود، اونی اَمرأ بوشؤده عروسی جشنٚ دورون و در دٚوٚسته بوبوسته.

¹¹ ایپچه کی بوگوذشت، او پِنج تأ کؤر فأرٚسِده و دروأزه پوشتٚ جَا ایجگره بٚزِده: "آقأ جأن، آقأ جأن، دروأزه‌یَ وأ کونید!"

¹² ولی اون جوأب بٚدأ: " رأس‌رأسِی شٚمٚره گم، من شٚمٚره نشنأسٚم!"

¹³ پس نوخوسید و شیمی حواس بمأنه چون نأنیدی چی روج و چی زمأتی وأگردم.

خودا کأرٚ رِه وفادأر بیبید و حقٚ‌ سعی بوکونید

¹⁴ «آسمأنٚ ملکوتَ شأ اَ نقلٚ اَمرأ وأشکأفتٚن: ایتأ مردأی خأستی بشه موسأفیرت. پس خو آدمأنَ دؤخأد و اوشأنٚ پولی فأدأ کی اونٚ نئیسأبو زمأتٚ رِه، اونَ بٚکأرَ گیرٚد.

¹⁵ هرتأیَ هونی توأنٚ اَندر فأدأ: اوّلی‌یَ پِنج تأ کیسه طلأ ، دویُمی‌یَ دوتأ کیسه طلأ و سیومی‌یَ ایتأ کیسه طلأ. بأزین رأ دکفته بوشؤ سٚفر.

¹⁶ اوّلی کی پنج‌تأ کیسه طلأ فأگیفته بو، بی‌معطلی بیهین بوفروشٚ جَا موشغولَ بوسته و پور زمأت نوبوسته کی پنج‌تأ دِه کیسه طلأ هم اونی مأل و مینألٚ ایضأفه بو.

¹⁷ دویُمی هم کی دوتأ کیسه طلأ دأشتی، هه کأرَ بوکوده و دوتأ دِه کیسه طلأ هم سود بوکود.

¹⁸ ولی سیومی کی ایتأ کیسه طلأ دأشتی، زیمینَ چالَ کوده و خو پولَ سنگٚ جیر جیگأ بٚدأ.

¹⁹ «ایتأ پیله زمأت کی بوبوسته، اربأب سٚفرٚ جَا وأگردسته و خو آدمأنَ تسویه حیسأبٚ رِه دؤخأد.

²⁰ اونی کی پنج‌تأ کیسه طلأ فأگیفته بو، پنج‌تأ دِه کیسه‌یم تحویل بٚدأ و بوگفته: "آقأ جأن، مٚرَه پنج‌تأ کیسه فأدأیی، اَنٚم پنج‌تأ دِه کیسه کی سود بوکودم."

²¹ اربأب اونَ بوگفته: "آفرین، اَی اَمین و خوروم غولأم! اَسه کی کوجه کأرأنٚ دورون اَمین و دورستکأر بی، ویشتر تٚرَه مسئولیت ایسپأرم. بیأ می شأدی دورون شیریک بوبو!"

²² «بأزین اونی کی دوتأ کیسه فأگیفته بو بأمؤ جولو بوگفت: "مٚرَه دوتأ کیسه طلأ فأدأیی، اَنٚم دوتأ دِه کیسه کی سود بوکودم."

²³ «اربأب اونَ بوگفته: "آفرین، اَی اَمین و خوروم غولأم! اَسه کی کوجه کأرأنٚ دورون اَمین و دورستکأر بی، ویشتر تٚرَه مسئولیت ایسپأرم. بیأ می شأدی دورون شیریک بوبو!"

²⁴ «بأزون او غولأمی کی ایتأ کیسه طلأ فأگیفته بو، بأمؤ و بوگفته: " آقأ جأن، دأنستیم کی اَندر سختگیرٚ مردأی ایسی کی زیمینی جَا کی اونی دورون هیچی نینٚشأسته بی، مأصول وأوینی، و زیمینی جَا کی دأنه نینٚشأنه بی‌حأصیل جمَ کونی.

²⁵ پس، می ترسٚ جَا تی پولَ سنگٚ جیر جیگأ بٚدأم کی نوکونه جٚه دٚس بشه. بفرمأ، اَنٚم تی پول!"

²⁶ «ولی اربأب جوأب بٚدأ: "اَی تنبل و نأجورٚ غولأم! تو کی دأنستی من اَندر سختگیرم کی زیمینی جَا کی اونٚ دورون چیزی نکأشته بیم، مأصول وأوینم، و او زیمینٚ جَا کی دأنه نینٚشأنِم حأصیل جمَ کونم،

²⁷ پس چٚره می پولَ صرّأفأنَ فأندأیی کی او وخت کی سٚفرٚ جَا وأگردم اونٚ سودَ فأگیرٚم؟"

²⁸ هطویم بوگفته: "اَ مردأکٚ پولَ فأگیرید و فأدید اونی‌یَ کی ده‌تأ کیسه طلأ دأره.

²⁹ چون کسی کی بتأنه اونچی کی دأره‌یَ خُب بٚکأرَ گیره، اونَ وأزم ویشتر فأدأ به. ولی اونی کی خو کأرَ دوروست انجأم نٚده، هر چندر کوجه‌دأنه‌یم بٚبه جٚه دٚس دِهه.

³⁰ اَسه اَ غولأمَ کی هی کأری رِه بٚدرد نوخوره، بیگیرید و ظولومأتٚ دورون تأوٚدید، کی اویَه گریه فیشأرٚ جَا، خو گأزأنَ سٚر به سٚر بسأبأنٚه."

دأوری روج

³¹ «او زمأت کی من، ینی او مسیحی کی وأستی بأیِه، می شوکو و جلالٚ اَمرأ و تومأمٚ می فٚرٚشته‌یأنٚ اَمرأ بأیٚم، بأزون می پور شوکو تختٚ رو نیشینم.

³² بأزین تومأمٚ زیمینٚ سٚرٚ قومأن می جولو بٚپأ ایسٚد و من اوشأنَ کس‌کسٚ جَا سیوأ وأکونم، هوطو کی ایتأ چوپأن، گوسوٚندأنَ بوزأنٚ جَا سیوأ وأکونِه؛

³³ گوسوٚندأنٚ می رأستٚ ور نٚهٚم و بوزأنٚ می چپٚ ور.

³⁴ «بأزون من کی پأدیشأ ایسٚم، اوشأنی کی می رأستٚ ور ایسأده گم: "اَی می پئرٚ جأنٚ دیلأن بأیید! بأیید کی شٚمٚره خودا ملکوتٚ برکتأنٚ دورون شیریک بوکونم، او برکتأن کی دونیأ آفرینشٚ سرگیفتنٚ جَا شِمِره آمأدَه بوسته بو.

³⁵ چون وختی کی مٚرَه ویشتأ بو، شومأن مٚرَه غذأ بٚدأییدی؛ تشنه بوم، مٚرَه آب فأدأییدی؛ بی‌کس بوم، مٚرَه جأ فأدأییدی؛

³⁶ برأنده بوم، مٚرَه لیوأس فأدأییدی؛ نأخوش احوأل و زندأنی بوم، می عیادت بأمؤییدی."

³⁷ «خوروم آدمأن جوأب دٚهٚده: "خوداوندا، چی موقع ویشتأ بوستید کی شٚمٚره غذأ فأدیم؟ چی موقع تشنه بوستید کی شٚمٚره آب فأدیم؟

³⁸ چی موقع بی‌کسَ بوستید کی شٚمٚره بٚخأنه ببریم یا برأنده بوستید کی لیوأس دوکونیم؟

³⁹ چی موقع نأخوش احوأل و زندأنی بوبوستید کی شیمی مولأقأت بأییم؟"

⁴⁰ «بأزون اوشأنَ گم: "وختی اَ خیدمتأنَ می کوجه‌ترین برأرأنٚ رِه کودن دیبید، هچین مٚرَه انجأم دئن دیبید."

⁴¹ «بأزین اوشأنی‌یَ کی می چپٚ ور ایسأده، گم: "اَی لعنت بوبوسته‌یأن جٚه اَیَه بیشید و بیشید او آتشٚ دورون کی هیوخت خأموشَ نیبه کی شیطان و اونی فٚرٚشته‌یأنٚ رِه آمأدَه بوسته.

⁴² چون کی ویشتأ بوم و شومأن مٚرَه غذأ فأندأیید؛ تشنه بوم و مٚرَه آب فأندأیید،

⁴³ بی‌کس بوم مٚرَه جأ فأندأیید؛ برأنده بوم مٚرَه لیوأس دونکودید؛ نأخوش احوأل و زندأنی بوم و شومأن می مولأقأت نأمؤیید."

⁴⁴ «اوشأن جوأب دٚهٚده: "خوداوندا، چی موقع شومأن ویشتأ و تشنه یا بی‌کس و برأنده یا نأخوش احوأل یا زندأنی بید و اَمأن خیدمتی شِمِره نوکودیم؟"

⁴⁵ «جوأب دٚهٚم: "وختی می کوجه‌ترین برأرأنَ یاور ندأییدی، هچین مٚرَه یاور ندأیید."

⁴⁶ «همیشٚکی موجأزأتٚ اَجور کسأنٚ شینه، ولی همیشٚکی زٚندیگی خوروم آدمأنٚ شین به.»