یعقوب 4 - Gilaki New Testament

خودایَ نیزدیکٚ بید

¹ شیمی جنگ و بوگو موگو چی وأسی ایسه؟ آیا اوشأنٚ دلیل، کثیفٚ خأسته‌یأن نییٚه کی شیمی دورون جٚنگستأندرٚد؟

² چیزی رِه حسرت خوردأندٚرید کی نأریدی؛ پس شیمی دٚسأنَ خونٚ اَمرأ آلودَه کونیدی کی اونَ بٚچنگ بأوٚرید. او چیزأنی‌یَ آروزو دأریدی کی دیگرأنٚ شینه و شومأن نتأنید بٚدأرید؛ پس جنگ و بوگو موگو کونید کی اوشأنی دٚسٚ جَا بیرون بأوٚرید. دلیلٚ اَنکی اونچی خأیید، ولی نأرید، اَن ایسه کی اونَ خودا جَا درخأست نوکونید.

³ وختی‌یٚم بٚخأستید، خودا شیمی دوعأیَ جوأب نٚده، چون شیمی قصد و نیّت دوروست نییٚه؛ شومأن فقد او چیزَ بٚدٚس اَوٚردٚنٚ دونبألید کی شیمی خوشی و لیذّتَ بأعیث به.

⁴ اَی زٚنأکأر آدمأن، آیا مولتفت نیئید کی دونیأیٚ دوس دأشتٚن، خودا اَمرأ دوشمنی کودنٚ مأنی‌یَ دِهه؟ پس هرکی بٚخأیٚه دونیأ اَمرأ ریفِق بٚبه، حتم خودا اَمرأ دوشمن به.

⁵ گومأن کونید کی موقدسٚ کیتأبأن اَلکی گده کی خودا روح کی خوداوند اونَ اَمی وجودٚ دورون بٚنأ، اَندر اَمٚرَه خوش دأره کی نتأنه تحمول بوکونه کی اَمی دیل ایتأ جأ دیگه بمأنه؟

⁶ ولی نوأستی جٚه خأطرٚ دیم کی خودا اَطوچی شیطانی خأسته‌یأنٚ روبرو ایسأنٚ رِه اَمٚرَه ویشتر فیض بخشه. اَطویی، موقدسٚ کیتأبأن فرمأیٚده: «خودا، خودخأیأنٚ جولو ایسه ولی فروتنأنٚ فیض بخشه.»

⁷ بأزون، شٚمٚره فروتنی اَمرأ خودایٚ بیسپأرید و شیطان جولو بئیسید تأ شیمی جَا فرأر بوکونه.

⁸ خودایَ نیزدیکٚ بید تأ اونم شٚمٚره نیزدیکٚ بٚه. شیمی گونأکأرٚ دٚسأنٚ بوشؤرید، اَی گونأکأرأن، و شیمی دیلَ پأکٚ کونید، اَی دو دیلأن، و فقد خودایٚ وفأ بوکونید.

⁹ شیمی ایشتیوأ کردکأرأنٚ رِه آرسو فوکونید و زٚهأر بٚزنید و شیمی وجودٚ جولفٚ جیگأ دورون غم بیگیرید و نأرأحت بیبید و خنده کودنٚ عوض گریه بوکونید و شأدی کودنٚ عوض عزأ بیگیرید.

¹⁰ وختی شٚمٚره خودا حوضورٚ دورون فروتن چأکونید، بأزون خودا شیمی سٚرَ بوجؤر دأره.

دأوری کودن خودا شینه

¹¹ جأنٚ دیلٚ برأرأن، کس‌کسٚ جَا بد نیگید و ایرأد نیگیرید و کس‌کسَ محکوم نوکونید. چون اگه اَطو بوکونید، رأس‌رأسِی جٚه خودا حوکمأنٚ جَا ایرأد بیگیفتید و اونَ محکوم بوکودید ولی شیمی وظیفه نییٚه کی خودا حوکمأنَ قیضأوت بوکونید، بلکی اونٚ جَا فرمأن بٚبٚرید.

¹² فقد خودا ایسه کی تأنه دأوری بوکونه، هو خودایی کی شریعتٚ عطأ بوکوده. فقد اون ایسه کی تأنه نیجأت بٚده یا جٚه بین ببره. پس تو چی حقٚ اَمرأ تی همسأده‌یَ قیضأوت کونی؟

اینسأن نأنِه فردأ چی بِه

¹³ بشتأوید اَی تومأمٚ شومأنی کی گیدی: «ایمرو یا فردأ شٚمه فٚلأن شهر و ای سأل اویَه ایسٚم تیجأرت کونم و پیله سود بٚرٚم.»

¹⁴ شومأن چی دأنید فردأ چی پیش اَیِه؟ شیمی عُمر اَیأزٚ مأنه کی ایتأ لحظه اونَ شأ دِئن و ایتأ لحظه ده غیبٚ بِه!

¹⁵ پس وأستی بیگید: «اگه خودا بٚخأیٚه، زٚنده مأنیم و اَطو و اوطو کونیم.»

¹⁶ اگه اَ کأرٚ نوکونید، شومأن شیمی خودخأیی نقشه‌یأنٚ رِه گولأز کونید. گولأزی کی اَطو بٚبه، شیطانی ایسه.

¹⁷ پس، اَنَ جٚه خأطر نٚبٚرید کی اگه بدأنید چی کأر دوروسته، ولی اونَ انجأم ندید، گونأ بوکودید.