عبرأنیأن 5 - Gilaki New Testament

¹ یوهودٚ دینٚ میأن، هرتأ پیله کأهین جٚه آدمأنٚ میأن اینتخأب بِه و بٚکأرَ گیفته بِه کی ایلاهی کأرأنٚ میأن مردومٚ رِه نمأینده بٚبه و گونأ وأسی، خودایَ پیشکشأن و قوربأنیأنی فأده.

² اَجور پیله کأهین تأنه، نأدأن و رأ اَویرَ بوسته آدمأنٚ اَمرأ مولأیٚمتٚ اَمرأ رفتأر بوکونه، چٚره کی خودشم هو ضعفأنَ دأره.

³ هنٚ وأسیه کی وأستی خو گونأیأنٚ رِه، و خو قومٚ گونأیأنٚ وأسی قوربأنی فأده.

⁴ ولی نوأستی جٚه خأطر دٚئن کی هیکس نتأنه خو میلٚ اَمرأ پیله کأهین بٚبه؛ خودا وأستی کأهینَ اینتخأب بوکونه، هوطویی کی خودا هارونٚم اینتخأب و تعیین بوکوده.

⁵ اَطویی، مسیحٚم خؤرَه، پیله کأهینی، پور گولأزٚ موقأمَ فأنرٚسأنِه، بلکی خودا اونَ اَ موقأمَ فأدَه. خودا اونَ بٚفرمأسته: «تو می پٚسری؛ ایمرو من تی پئر بوبوستم.»

⁶ اَطویی‌یٚم دِه ایتأ جأ اونَ بوگفته: «تو تأ اَبد کأهین ایسی، ایتأ کأهین، مِلکیصِدِقٚ مأنستَن.»

⁷ اَنٚ اَمرأ اَسه، مسیح او زمأتی کی اَ دونیأ دورون زٚندیگی کودی، آرسو و آه و ایتأ جولفٚ غورصه اَمرأ، خودا درگأ دوعأ و مینّت کودی کی اونَ مٚردنٚ قودرتٚ جَا نیجأت بٚبخشه. خودایٚم اونی دوعأیَ، اونی کأمیلٚ فرمأن بردنٚ وأسی قوبیل بوکوده و انجأم بٚدأ.

⁸ عیسا خودا پٚسر بو، ولی او درد و عذأبی کی تحمول بوکوده اَمرأ، فرمأن بردنَ بأمؤخته.

⁹ اَ ایمتحأنٚ دٚوأرٚستنٚ پٚسی بو کی نیشأن بٚدأ کأمیلَ بوستنٚ اَندر فأرٚسِه و تأنه اَبدی نیجأتَ اوشأنی‌یَ فأدٚه کی اونی جَا فرمأن بٚرٚده؛

¹⁰ هنٚ وأسی، خودا اونَ بٚنأ کی پیله کأهین بٚبه، ایتأ کأهین مِلکیصِدِقٚ مأنستَن.

پورٚ پیمأنه روحأنی غذأ، پیلّه بوسته مسیحیأنٚ رِه

¹¹ دروأره‌یٚ اَ پیله کأهین، خٚیلی گب نٚهأ، ولی او گبأنٚ گفتن رأحت نییٚه، بوخصوص اَنکی شیمی روحأنی فأم کونْدٚ بوسته و شیمی گوشأن سینگینٚ بو!

¹² پور زمأت ایسه کی شومأن مسیحی ایسیدی، و اَسه وأستی الباقیأنٚ رِه معلّم بوبوسته بید؛ ولی هوطو شیمی ایمأنٚ دورون پس بٚمأنستیدی کی ایحتیأج دأریدی اینفر جٚه اوّل، خودا کلامٚ الفبأیَ شٚمٚره بأموجه. او قوندأقه زأکَ مأنیدی کی جغرز شیر نتأنه هیچی بوخوره. هنو اوندر پیلّه نوبوستیدی کی بتأنید پورٚ پیمأنه غذأیأنَ بوخورید.

¹³ اونی کی شیر خوره، هنو زأکٚ و خو بٚنأ اوسأنَ نأنِه.

¹⁴ پورٚ پیمأنه غذأ، پیله دأنأنٚ شینه کی دائیم تِمرین کودنٚ اَمرأ، بأمؤختٚده چوطو خورومٚ چی‌یَ جٚه نأجورٚ چی سیوأ وأکونٚد.