اعمالٚ رسولأن 28 - Gilaki New Testament

موجیزه مالتٚ جزیره میأن

^1-2 وختی سألیم فأرٚسِییم دریأکنأرَ، بفأمستیم مالتٚ جزیره میأن ایسأییم. او جزیره مردوم اَمی اَمرأ خٚیلی مهرٚوأن بود و چونکی وأرٚش، اَمؤندوبو و سردَ بوسته، آتش چأکودٚد کی اَمی جَا پذیرأیی بوکوند.

³ پولسٚم هیمه جمَ کودی و آتش رو نٚئی. نأخٚوٚرکی گرمأ وأسی، ایتأ زهردأرٚ لأنتی هیمه‌یأنٚ جَا بیرون بأمؤ و قأیم اونٚ دٚسَ دوچوکسته!

⁴ وختی جزیره مردوم فأندرستده کی لأنتی اونی دٚسَ آویزأنَ بوسته، کس‌کسَ بوگفتٚده: «شک نأریم اَ مردأی قأتیل ایسه! اگه چی توفأنٚ جَا جیویشته، ولی عیدألت ولأنه زٚنده بمأنه!»

⁵ ولی پولس لأنتی‌یَ آتش میأن تأوٚدأ بودونٚ اَنکی آسیب بیدینه.

⁶ مردوم رأفأ ایسأبود کی پولسٚ جأن بأد بوکونه، یا ایوأرکی بٚکفه و بیمیره ولی هرچی رأفأ بئیسأده، خٚوٚری نوبوسته. پس خوشأنٚ نظرَ عوضٚ کودٚد و بوگفتٚده: «اون ایتأ جٚه خودایأنٚ ایسه!»

⁷ دریأکنارَ فأنرٚسِه، هو جیگأ کی اَمأن بیجیر بأمؤ بیم، ایتأ مِلک اویَه نٚهأ بو کی، او جزیره حأکیم، پوبلیوسٚ شین بو. اون اَمٚرَه خورومی اَمرأ ببرده خو خأنه و تومأمٚ ایحترأمٚ اَمرأ سه روج اَمی جَا پذیرأیی بوکود.

⁸ او زمأتٚ میأن پوبلیوسٚ پئر تب و خونی اسهأل دأشتی. پولس اونی ورجأ بوشؤ و اونی رِه دوعأ بوکود و خو دٚسَ اونی رو بٚنأ و شفأ بٚدأ!

⁹ او وخت او جزیره البأقی نأخوشأنٚم بأمؤده و شفأ بیأفتٚد.

¹⁰ جٚه اَ خأطر خٚیلی پیشکشی اَمی ور سرأزیرَ بوسته. اَمی شؤئؤنٚ وختم، هرچی سٚفر رِه لأزیم دأشتیم اَمِرِه بأوٚردٚد کشتی میأن.

پولسٚ شؤئؤن رومٚ میأن

¹¹ سه مأه کی بوبوسته، ایتأ دِه کشتی اَمرأ حرکت بوکودیم. اَی‌سٚفرٚه ایتأ کشتی اَمرأ کی اسکندریه شین بو سٚفر بوکودیم کی «خودایأنٚ دوقولو» نأم دأشتی کی زمستأنٚ میأن او جزیره دورون بئیسأبو.

¹² اَمی رأ میأن سه روج سیراکیوسٚ میأن بئیسأییم.

¹³ جٚه اویَه دؤر بٚزِییم کی فأرٚسِییم ریگیونٚ میأن. فردأیی جونوبٚ بأد بٚدٚمٚسته. پس ایتأ روجٚ میأن فأرٚسِییم پوطیولی بندرٚمیأن.

¹⁴ اویَه ایماندأرأنی بیأفتیم کی اَمی جَا خأهیش بوکودٚد ایتأ هفته اَشأنٚ ورجأ بئیسیم، اَطویی بوبوسته کی فأرٚسِییم روم.

¹⁵ رومٚ مسیحیأن کی بشتأوسته بود اَمأن اَمؤندریم، تأ فورومٚ ور کی اَپیوسٚ رأ سٚر نٚهأ بو اَمی پیشوأز بأمؤده. ایتأ عیده‌یٚم «سه میخأنه» شهرٚ میأن اَمی پیشوأز بأمؤده. وختی پولس اَشأنَ بیدِه، خودایَ شوکر بوکوده و جأن بیگیفته.

¹⁶ وختی فأرٚسِییم روم، پولسَ وئأشتٚده کی هرتأ جیگأ کی خأیه زٚندیگی بوکونه. فقد ایتأ نیگهبأن همیشٚک اونَ پأستی.

پولس رومٚ میأن بشأرت دِهه

¹⁷ جٚه اَمی اَمؤن رومٚ میأنی سه روجٚ پٚسی، پولس اویَه یوهودٚ پیله‌ کسأنَ جمَ کود و اَشأنَ بوگفته: «اَی برأرأن، اورشلیمٚ یوهودیأن مٚرَه بیگیفتٚده و رومٚ دولتٚ دٚس بیسپأردٚد کی مٚرَه عذأب بٚدٚد، هرچن کی هیکسَ اَذِت آزأر نرسأنه ‌بوم و نه اَمی پیله بأبأیأنٚ رسم و روسومأنَ بی‌حورمتی بوکوده بوم.

¹⁸ رومیأن می جَا وأخأست بوکودٚد و بٚخأستٚد مٚرَه وِلَ کونٚد، چونکی بٚفأمٚسته بود کی کأری نوکودم کی مٚردنٚ رِه سزأوأر ببم.

¹⁹ ولی وختی یوهودیأن موخألفت بوکودٚد، مجبور بوبوستم قیصرٚ رِه دٚس‌ بٚدأمن ببم، بودونٚ اَنکی می قومٚ جَا شیکأیت بوکوده بیم.

²⁰ ولی شیمی جَا خأهیش بوکودم ایمرو اَیَه بأیید هوطو کی کس‌کسٚ اَمرأ آشینأ بیمی، بٚگم کی اَ زینجیلأن کی می دٚسأنَ دٚوٚستٚده جٚه اَ خأطر ایسه کی ایمأن دأرم ایسرأییلٚ اومید ینی او مسیح کی اونی اَمؤن وعده بٚدأ بوبوسته بو ظوهور بوکوده.»

²¹ اَشأن جوأب بٚدأده: «اَمأن تی ضد هیچی نشتأوستیم. نه ایتأ نأمه جٚه یوهودیه دأشتیم و نه خٚوٚری جٚه موسأفٚرأنی کی اورشلیمٚ جَا بأمؤده.

²² ولی خأییمی تی جَا بشتأویم کی چی ایمأنی دأری، چونکی تنأ اونچی‌یَ کی مسیحیأنٚ جَا دأنیمی اَنٚ کی هرتأ جیگأ جٚه اوشأنٚ بد گده.»

²³ پس قرأر بوبوسته ایتأ روج دِه بأیٚد. او روجٚ میأن، خٚیلی جٚه او آدمأن اونی خأنه بأمؤده و پولس خودا ملکوت و عیسایٚ مسیحٚ جَا اَشأنٚ رِه گب بٚزِه. اون صُب تأ شب جٚه موسا پنج‌تأ کیتأب و یوهودٚ پیغمبرأنٚ کیتأبأن خو گبأنٚ وأسی دلیل اَوٚردیدی.

²⁴ او جِمئیتٚ میأن، ایتأ عیده ایمأن بأوٚردٚد و ایتأ عیده نأوٚردٚد.

²⁵ ولی بوگو موگو پٚسی کس‌کسٚ اَمرأ، پولس جَا سیوأ بوبوستٚد، هوطویی کی اَ آخری گبأن تترج اَشأنٚ گوشأنٚ میأن بیپیچسته کی بوگفته بو: «روح‌القدس چی خُب اشعیایٚ پیغمبرَ بٚفرمأسته:

²⁶ "اَ قومٚ ورجأ بوشو و بوگو: وختی اونچی‌یَ کی گمٚه، بشتأوید، هیچی نٚفأمیدی. وختی اونچی‌یَ کی انجأم دٚهٚمَ، بیدینید، اونَ نٚفأمیدی.

²⁷ چونکی اَ مردوم دیل سختَ بوسته، و اَشأنٚ گوشأن نتأنه بشتأوه، و خوشأنٚ چومأنَ او جوری دٚوٚستٚده کی نٚتأنٚد بیدینٚد و اوشأنی گوشأن نتأنه بشتأوه، و اَشأنی دیل نتأنه بفأمه، و نٚتأنٚد می ورجأ وأگردٚد کی اَشأنَ شفأ بدم."»

²⁸ «پس خأیم بدأنید کی خودا نیجأت اوشأنی کی یوهودی نوبودٚ رِه اوسه بوبوسته، و اَشأن ایشتأوده.»

²⁹ بأزون کی اَنَ بوگفته، یوهودیأن جٚه اویَه بوشؤده، جوری کی خٚیلی کس‌کسٚ اَمرأ بوگو موگو کودأندوبود.

³⁰ پولس تومأم دو سأل خو ایجأره‌یی خأنه میأن زٚندیگی کودی و تومأمٚ اوشأنی کی اونی دئنٚ رِه اَمؤییدی، مهرٚوأنی اَمرأ اوشأنَ قوبیل کودی

³¹ و یأرستنٚ اَمرأ خودا ملکوت و خوداوند عیسایٚ مسیحٚ جَا اَشأنی اَمرأ گب زِئی، بودونٚ اَنکی هیکس اونی جولویَ بیگیره.