دوم تسالونیکیان 1 - Gilaki New Testament

¹ اَ نأمه جٚه پولس، سیلاس و تیموتائوس ور ایسه. اَ نأمه‌یَ شٚمٚره نیویسیم، کیلیسای تسالونیکیان کی در اَمی پئر خودا و اَمی خوداوند عیسایٚ مسیح زٚندیگی کونیدی.

² شِمِره آرأمٚش و فیضَ، اَمی پئر خودا و اَمی خوداوند عیسایٚ مسیح جَا خأییم.

دوعأ و شوکر کودن

³ گولٚ برأرأن، اَمی وظیفه‌ ایسه کی شیمی وجودٚ وأسی خودایَ شوکر بوکونیم. هطویه، چونکی شیمی ایمأن جوری روشد بوکوده کی شأیسته ایسه اَ کأرَ بوکونیم و شیمی محبت، کس‌کسٚ اَمرأ خٚیلی زیأدَ بوسته.

⁴ هر کیلیسایی کی شیم، اَشأنٚ رِه گیم کی چوطو تومأمٚ آزأر و اَذِتأنٚ اَمرأ و سختیأنی کی آدمٚ جأنَ فأگیره، صبرٚ اَمرأ تومأمٚ شیمی ایمأنَ خودا رِه بدأشتیدی، شیمی وجودٚ وأسی ایفتخأر کونیم.

⁵ اَ آزأر اَذِتأن نیشأن دِهه کی خودا رأیأن، عدل و اینصأفٚ اَمرأ ایسه، چونکی اَ زحمتأن و رنجأنٚ اَمرأ جٚه ایوٚر شٚمٚره خو پأدیشأیی رِه حأضیر کونِه

⁶ و جٚه ایوٚر دِه‌یٚم او تِنبیه و موجأزأتأنَ، اوشأنی‌یَ کی شٚمٚره آزأر دٚهٚده رِه حأضیرَ کونِه.

⁷ اونٚ وأسی، شٚمٚره کی آزأر و اَذِت بوبوستید، اَ ایطمینأنَ دٚهٚم کی وختی خوداوند عیسا، نأخٚوٚرکی او آتش شوأله‌یأنٚ میأنی جٚه آسمأن خو پورقوّت فٚرٚشته‌یأنٚ اَمرأ بأیٚه، خودا اَمٚرَه و شٚمٚره آرأمٚش بخشه؛

⁸ امّا اوشأنی‌یَ کی خودا شنأخت و اونی قوبیل کودن و اونی نیجأتٚ نقشه کی عیسایٚ مسیح اَمرأ بو قوبیل نوکودٚده، موجأزأت کونه.

⁹ اَشأن ایتأ اَبدی موجأزأتَ فأرٚسٚده و خودا حوضورٚ جَا دورٚ بٚده و هیوخت اونی پیله قودرت و شوکوهَ ‌نیدینده.

¹⁰ هطویه اَ ایتفأقأن، اونی وأگردٚستنٚ روجٚ میأن پیش اَیِه، هو روج کی اونی قوم و اونی ایمأندأرأن، تعریف و ستأیٚشٚ اونَ پیشکش بوکونٚد. هو روجٚ میأن شومأنم اونَ ستأیٚش کونندِیأنٚ میأن ایسأیید، چونکی او شهأدتَ کی اونی رِه بٚدأییم ایمأن بأوٚردید.

¹¹ پس اَمأن شیمی وأسی دوعأ کودنَ ایدأمه دیهیم کی خودا شٚمٚره یاور بٚده کی شیمی کردکأرأن او ایلاهی دعوتٚ رِه شأیسته بٚبه و او خوروم آروزویأنَ کی دأریدی، عملی بوکونٚه و خو قودرتٚ اَمرأ شیمی کأرأنَ کی ایمأنٚ جَا بیرون اَیِه، کأمیلٚ کونٚه.

¹² بأزون مردوم شیمی کأرأنَ فأندٚرده و اونی وأسی اَمی خوداوند، عیسایٚ مسیحٚ ایسمَ تعریف تمجید کونٚده؛ شومأنم اونی وأسی کی اونی شین ایسید، عیزت و ایحترأم یأفیدی. اَنَ بدأنید کی اَمی خودا و اَمی خوداوند عیسایٚ مسیحٚ لوطف و فیض، تومأمٚ اَ مرتبه‌یأنَ شِمِره فرأهم بوکوده.