اوّل قرنتیان 6 - Gilaki New Testament

ایختلأف ایمأندأرأن میأن

¹ وختی اینفر جٚه شومأن ایتأ دِه ایمأندأرٚ جَا شیکأیت دأره، چوطو یأره کی خو شیکأیتَ دونیأیی دادگأ رِه ببره؟ مگه نوأستی اونَ البأقی ایمأندأرأنٚ اَمرأ درمیأن بٚنه؟

² مگه نأنیدی کی اَمأن ایمأندأرأن، ایروج دونیأیَ دأوری و قیضأوت کونیمی؟ پس اگه اَطو ایسه، چٚره نوأستی اَ کوجه کأرأنَ بتأنید شیمی میأن فیصله بدید؟

³ مگه نأنیدی کی اَمأن حتّا فٚرٚشته‌یأنم قیضأوت کونیمی؟ پس چندر ویشتر وأستی بتأنید اَ زٚندیگی معمولی موضویأنَ سأمأن بدید.

⁴ وختی اَطوچی ایختلأفأن بیرون اَیِه، چٚره ایختلأفٚ فیصله دئنٚ وأسی دونیأیی قأضیأنٚ ورجأ شیدی کی کیلیسا اوشأنَ قوبیل نأرِه؟

⁵ اَنَ گم کی خجألت بٚکشید: مگه تومأمٚ شیمی کیلیسا دورون، حتّا اینفر عأقیل بیأفته نیبه کی اَ ایختلأفأنَ فأرٚس فوروس بوکونه؟

⁶ مگه اَن دوروسته کی ایمأندأر ایمأندأرٚ ضد دادگأیَ شیکأیت بوکونه و بی‌ایمأنأن اَشأنٚ ایختلأفَ فأرٚس فوروس بوکوند؟

⁷ رأس‌رأسِی اَطوچی شیکأیتأن و ایختلأفأن شیمی روحأنی ضعفَ نیشأن دِهه! بِیتر نییٚه شیکأیتٚ عوض، شٚمٚره ظولم بٚبه و جٚه شیمی حق بوگذرید؟

⁸ ولی شومأن اونی عوض، البأقیأنَ و حتّا شیمی مسیحی برأرأنَ ظولم کونیدی و اوشأنٚ حقَ پأمأل کونیدی.

⁹ مگه نأنیدی اوشأنی کی ظولم کونٚده خودا ملکوتَ ارث نٚبرده؟ شٚمٚره گول نزنید! اوشأنی کی بدنأم ایسٚد، بُتأنَ پرستٚده، زٚنأ کونٚده، لوأط کونٚده، همجینس‌بأز ایسٚد،

¹⁰ و هطویم اوشأنی کی طمع کونٚده، مستَ کونٚده، ایفترأ زنٚده، مردومٚ کولأیَ اوسأنٚده، هیتأن جٚه خودا ملکوت سأم نبرٚد.

¹¹ پیشتر ای عیده جٚه شومأن، اَطوچی زٚندیگی دأشتیدی کی گونأ اَمرأ ایتأ بوبوسته‌ بو، ولی هسأ شیمی گونأیأن بوشؤسته بوبوسته و شومأن خودا رِه وقف بوبوستید و اون شٚمٚره دوس دأره، و اَن اَمی خوداوند عیسا مسیح کأر وأسی و روح‌القدسٚ قودرتٚ اَمرأ ایمکأن دأره.

جٚه جینسی گونأیأن دؤر بئیسید

¹² ایمکأن دأره کی بیگید: «تأنٚم هرتأ کأر بوکونم» - ولی بدأنید کی همه چی شِمِره فأیده نأرِه. حتّا اگه شیمی گبٚ اَمرأ «تأنٚم هرتأ کأر بوکونم»، ولی نوأستی هیچی‌یَ اسیر و بٚرٚده ببم.

¹³ گیدی: «غذأ شکمٚ شین ایسه و شکمٚم غذأ رِه. و خودا ایروج هر دوتأیَ جٚه میأن اوسأنِه.» ولی دروأره‌یٚ جأن، وأستی بدأنیم کی جأن بدنأمی رِه نییٚه، بلکی خوداوندٚ خیدمتٚ رِه ایسه، و اونه کی جأنٚ همٚتأ ایحتیأجأنَ برطرفَ کونه.

¹⁴ خودا هو قودرتٚ اَمرأ کی اَمی خوداوند عیسا مسیح جٚه مٚردنٚ پٚسی زٚنده کوده، اَمی جأنأنم مٚردنٚ پٚسی ایوأردِه زٚنده کونه.

¹⁵ مگه نأنیدی کی شیمی جأنأن، رأس‌رأسِی مسیح جأنٚ عُصم و اعضأ ایسه؟ پس، مگه دوروست ایسه کی شیمی جأنَ کی اَ پیله مأنی‌یَ دأره، فأگیرٚم و ایتأ بدکأرٚ زنأک جأنٚ اَمرأ پینیک بٚزٚنم؟ هیوخت!

¹⁶ مگه نأنیدی کی ایتأ مردأی کی ایتأ بدکأرٚ زنأکٚ اَمرأ جوفتَ بِه، اونی اَمرأ ایتأ جأن بِه؟ چونکی موقدس کیتأبأن دورون بینیویشته بوبوسته: «او دوتأن ایتأ جأن بٚده.»

¹⁷ ولی اگه شٚمٚره خوداوندَ تقدیم بوکونید، اونی اَمرأ ایتأ بیدی.

¹⁸ هنٚ وأسی ایسه کی گم جٚه زٚنأ دؤر بئیسید هیتأ گونأ اَندر، جأنٚ رو شومٚ اَثر نٚنِه. وختی اَ گونأیَ کونیدی، شیمی جأنَ ضرر زنیدی.

¹⁹ مگه هنو نأنیدی کی شیمی جأن، روح‌القدسٚ جأ مکأن ایسه کی اونَ خودا شٚمٚره عطأ بوکوده؟ مگه نأنیدی کی روح‌القدس شیمی وجود میأن زٚندیگی کودأندٚره؟ پس شیمی جأن، شیمی شین نییٚه!

²⁰ خودا شٚمٚره خٚیلی گیرأن بیهه، پس تومأمٚ شیمی عُصم و اعضأیَ خودا جلال و بوزورگی‌یَ نیشأن دئنٚ وأسی بٚکأر تأوٚدید، چونکی اون شیمی جأنٚ صأب ایسه.