Obadaya 1 - EBƆRƐ BE KAWƆL

Bɔrɛdare nɛ Obadaya ku na be asheŋ

¹ Kusɔ nɛ Enyɛnpetale Ewurgboŋ na kaŋɛ a laŋɛ Edɔm be kaplɛa so nɛ an nu nde: “Men koso n shin nɛ an yɔ nɛ anyi nɛ Edɔmebi e ya kɔ abar kena.”

² Le nɛ Enyɛnpetale na kaŋɛ Edɔm: “Meeŋ shin nɛ fo ki epɔshipo nɛ ekama nyam e keni fo jiga.

³ Fo, Edɔm be kamoowu e naa fule fo na. Fo Edɔm nɛ fo tase kebee so nɛ fo kowu wɔ kaboŋ jeŋgreŋ na, e naa puchi a kaŋɛ fo kumu fanɛ wanɛ e naaŋ tiŋ m pɔɔ fo so na, ŋko?

⁴ Kashenteŋ nna fanɛ fo wɔ awɔlto fanɛ kajɔnɔkoso ka bee firgi nna, fo alɛ nseŋ ta fo kowu n ya yuu fanɛ k kaa wɔ achɛkpabi to na, ama ma, Enyɛnpetale na e kaŋɛ fo na fanɛ meeŋ shin nɛ fo shi kakpa nɛ fo wɔ ere m ba kaseto.

⁵ Nɛ beyu ŋko besugepo daŋ ba fo to kanyɛso, ndafanɛ kusɔ nɛ k daa beeŋ nya fo gba maaŋ baa walɛ. B daa beeŋ yuri fo kananɛ baa sha. Beyu baŋ ba kanyɛso, asɔ nɛ baa sha nawule nɛ baa ta. Basa baa chuge greep be asɔrso malɛ, baa kaa yige amo be gbrɛ ko nna a chɔga so, ama fo ere, fo doŋana beeŋ mur fo cheche.

⁶ Menyi ere Isɔɔ be kanaŋ to ebi, baaŋ sensaŋ menyi be asɔ kikɛ n yɔ.

⁷ Men doŋana beeŋ tintiŋ menyi n yɔ efuli ere so be ekarso cheche, nɛ men teriana e fule menyi nseŋ pɔɔ menyi so. Bumo nɛ baa tu menyi a ji menyi be ajibi naniere beeŋ sho menyi ajigbelɛ, ama menyi alɛ maaŋ pin.”

⁸ Enyɛnpetale na yɛ: “Kachɛ na kaŋ fo, meeŋ mur Edɔm be basa nyiashempo kama nɛ b wɔ lsɔɔ be abee so a pin asheŋ to na. Meeŋ mur bumo cheche.

⁹ O, Teman be benakɔpo, kufu beeŋ pɛ menyi tain, baaŋ ku ekama nɛ e wɔ lsɔɔ be abee so na to.

¹⁰ Ŋkpal menyi Edɔmebi ka diewu n ta kumu kpakpaso n shuŋ men kurgepoana Jeekɔb be kanaŋ to ebi kushuŋ lubi na so, anishinyɔr beeŋ ba menyi so. Menyi alɛ beeŋ mur kuraa.

¹¹ Kachɛ nɛ bedoŋ nɛ b la befɔ daŋ ba bɔla Jeekɔb be kanaŋ to ebi be mbuna to n luri Jerusalɛm to m muu bumo be asɔ kikɛ nseŋ to beri m barga amo to n sa abar na men daa yil jiga a keni bumo. Amoso menyi alɛ gba daa du fanɛ bedoŋ na nna na.

¹² A daa maŋ daga fanɛ men baa yil a mushe men niopibiana Jeekɔb be kanaŋ to ebi saŋɛ nɛ tɔrɔ nɛ kachɛ lubi tu bumo ashi bumo be kemur be saŋɛ so na.

¹³ A daa maŋ daga fanɛ men luri ma basa be kade to n ya kaa mushe bumo ashi bumo be etɔrɔ be kaplɛa so nseŋ suge bumo asɔ kachɛ lubi achɛ na.

¹⁴ A daa maŋ daga fanɛ men ya yili ŋkpancheriana a pɛ bumo to be bumo nɛ b nya ekpa n shile a yɔ nɛ b ya ŋana na. A daa maŋ daga fanɛ men pɛ bumo m bɔɔ bumo doŋ ana enɔ saŋɛ nɛ b wɔ tɔrɔ na.

¹⁵ Men nu nfe, kachɛ nɛ ma ere Enyɛnpetale na beeŋ ji efuli kama demu na taga to nna na. Asɔ nɛ menyi Edɔmebi wora ere beeŋ ba menyi alɛ gba so loŋ chap. Menyeeŋ teŋi kusɔ nɛ men du ere gbagba.

¹⁶ Ma basa nɛ b tase ma kebee cheembi so ashi Jerusalɛm na ka nya kasogberge ere bre meeŋ gberge efuli pɔtɛana kikɛ gba kusoe a chɔ loŋ. Baaŋ nya kasoegberge a chɔ Jerusalɛm peya na, hale nɛ k yɛr bumo kemur to cheche.

Israɛl ka beeŋ kɔ m pɔɔ so be asheŋ

¹⁷ Kumɔlga beeŋ baa wɔ Zayɔn be kebee bre so, nɛ basa ko e nya ekpa n shile ŋ ŋana. Ndoŋ beeŋ baa la kakpa cheembi nsaa la Jeekɔb be kanaŋ to be kasawule.

¹⁸ Jeekɔb be kanaŋ to ebi beeŋ baa du fanɛ edɛ suse so nna nɛ Isɔɔ malɛ be kanaŋ to ebi e baa du fanɛ afitiri wɔlso nɛ baaŋ chɔɔ. Isɔɔ be kanaŋ to be ekama maaŋ naŋ ji efute. Ma, Enyɛnpetale na e kaŋɛ loŋ na.

¹⁹ Keshishɛrsawule so ebi na beeŋ ba sɔ menyi lsɔɔ be kanaŋ to ebi be abeesawule a wɔtɔ, nɛ basa nɛ b wɔ abee be kaseto na malɛ e ba Filistiebi be nsawule ŋ ki bumo peya. Israɛlebi beeŋ ba sɔ Efreimebi nɛ Samɛriaebi be nsawule, nɛ Bɛnjaminebi malɛ e ta Gilead.

²⁰ Israɛl be benapo nɛ b pɛ n yɔ Keenan na beeŋ bɛta m ba kɔ n sɔ nsawule loŋ hale n ya fo Zarefat. Jerusalɛm be benapo nɛ b wɔ Sefarad naniere malɛ beeŋ ba kɔ n sɔ keshishɛrsawule be ndeana.

²¹ Zayɔn to be bekɔmpɔɔsopoana beeŋ ya kɔ Edɔm m pɔɔ kumo so nsaa ji kuwura kumo so. Enyɛnpetale malɛ gbagba e naaŋ ki bumo be ewura.”