Nɔmbɛs 1 - EBƆRƐ BE KAWƆL

B ka fara ŋ karga Israɛlebi be asheŋ

¹ Israɛlebi na ka lar Ijipt be efuli so na be kafɛ nyɔsopo to be kufɔl nyɔsopo be kachɛ juŋkparso na, nɛ Enyɛnpe Ebɔrɛ malga Mosis kutɔ ashi Enyɛnpe be wajɛbu na to ashi Sainai be keshishɛrsawule na so ŋ kaŋɛ le:

² “Fo nɛ Ɛɛrɔn e karga Israɛlebi na kikɛ, mbuna mbuna nɛ kanaŋ kanaŋ so nseŋ sibɛ benyɛn na kikɛ be atre.

³ Men sibɛ bekama nɛ b fo nfɛ adunyɔ ŋko m baŋ so nsaa beeŋ tiŋ ŋ kɔ kena na kikɛ be atre.

⁴ Men shin nɛ yiri kikɛ to be enimu koŋwule e chɛ menyi to.”

⁵ Eyiri na to be benimu nɛ b lara fanɛ b chɛ to n shuŋ loŋ be kushuŋ na nde: Shedur pibinyɛn Elizur shi Ruben be yiri to

⁶ nɛ Zurishaddai pibinyɛn Shelumiɛl shi Simiɔn be yiri to

⁷ nɛ Aminadab pibinyɛn Naashɔn shi Juda be yiri to

⁸ nɛ Zuwa pibinyɛn Nataniɛl shi Isaaka be yiri to

⁹ nɛ Hɛlɔn pibinyɛn Eliab shi Zebulun be yiri to

¹⁰ nɛ Amihuud pibinyɛn Eliashama shi Efreim be yiri to nɛ Pɛdazur pibinyɛn Gamaliɛl shi Manase be yiri to

¹¹ nɛ Gidiɔni pibinyɛn Abidan shi Bɛnjamin be yiri to

¹² nɛ Amishadai pibinyɛn Ahieza shi Dan be yiri to

¹³ nɛ Okran pibinyɛn Pagiɛl shi Ashɛr be yiri to

¹⁴ nɛ Duwɛl pibinyɛn Elisaaf shi Gad be yiri to

¹⁵ nɛ Enaan pibinyɛn Ahira shi Naftali be yiri to.

¹⁶ Le be basa ere nɛ bumo gbagba be basa lara fanɛ bumo be eyiri to be benimu ashi Israɛl be efuli so.

¹⁷ Kufɔl nyɔsopo na be kachɛ juŋkparso nɛ le be bejuŋkparpo kudu anyɔ ere chɛ Mosis nɛ Ɛɛrɔn to

¹⁸ n tre Israɛlebi kikɛ n shɛr n shin nɛ b ŋini mbuna mbuna nɛ nnaŋ nɛ b shi to nɛ b sibɛ benyɛn nɛ b fo nfɛ adunyɔ ŋko m baŋ so na kikɛ be atre kukoko to.

¹⁹ Kananɛ Enyɛnpe Ebɔrɛ kaŋɛ Mosis ashi Sainai be keshishɛrsawule so na gbagba chap nɛ Mosis daŋ wora.

^20-46 B daŋ sibɛ benyɛn nɛ b fo nfɛ adunyɔ ŋko m baŋ so nsaa beeŋ tiŋ ŋ kɔ fo kena na kikɛ be atre mbuna mbuna nɛ kanaŋ kanaŋ so nna. Jeekɔb pibinyɛn nimuso Ruben be yiri to nɛ b daŋ fara a karga: Ruben be yiri to ebi daa la basa ŋgboŋ adena nɛ ashe nɛ alfa anu nna. Nɛ Simiɔn be yiri to ebi daa la basa ŋgboŋ adunu nɛ akpanu nɛ alfa asa. Nɛ Gad be yiri to ebi daa la basa ŋgboŋ adena nɛ anu nɛ alfa ashe nɛ adunu. Nɛ Juda be yiri to ebi daa la basa ŋgboŋ adushunu nɛ ana nɛ alfa ashe. Nɛ Isaaka be yiri to ebi daa la basa ŋgboŋ adunu nɛ ana nɛ alfa ana. Nɛ Zebulun be yiri to ebi daa la basa ŋgboŋ adunu nɛ ashunu nɛ alfa ana. Nɛ Efreim be yiri to ebi daa la basa ŋgboŋ adena nɛ alfa anu. Nɛ Manase be yiri to ebi daa la basa ŋgboŋ adesa nɛ anyɔ nɛ alfa anyɔ. Nɛ Bɛnjamin be yiri to ebi daa la basa ŋgboŋ adesa nɛ anu nɛ alfa ana. Nɛ Dan be yiri to ebi daa la basa ŋgboŋ adeshe nɛ anyɔ nɛ alfa ashunu. Nɛ Ashɛr be yiri to ebi daa la basa ŋgboŋ adena nɛ kako nɛ alfa anu. Nɛ Naftali be yiri to ebi daa la basa ŋgboŋ adunu nɛ asa nɛ alfa ana. Benyɛn nɛ Mosis nɛ Ɛɛrɔn nɛ Israɛl be bejuŋkparpo kudu anyɔ na daŋ karga na kikɛ daa la basa ŋgboŋ alfa ashe nɛ asa nɛ alfa anu nɛ adunu nna.

⁴⁷ Ama b daa maŋ sibɛ Livaiebi na bre be atre,

⁴⁸ ŋkpal manɛ so, le nɛ Enyɛnpe Ebɔrɛ daŋ kaŋɛ Mosis:

⁴⁹ “Sa maŋ karga Livaiebi nɛ b fo kena be kekɔ na bre n ti Israɛlebi na so.

⁵⁰ Shin nɛ Livaiebi na e baa keni Enyɛnpe be wajɛbu na nɛ asɔ nɛ a wɔ kumo to kikɛ so. Bumo e naŋ baa sulɔ kumo nɛ asɔ nɛ a wɔ kumo to na kikɛ, nsaa keni kumo so, a yuu kumo nsaa yuu bumo be ewajɛbu a chena a kulti kumo saŋkama nɛ b wora keeyito popɔr.

⁵¹ Saŋkama nɛ men baŋ chɛrga echenakpa, Livaiebi na e naaŋ baa bɔɔ Enyɛnpe be wajɛbu na. Bumo koŋwule na malɛ e naaŋ baa yuu kumo kaplɛkama nɛ men ya chena. Esa pɔtɛ kama malɛ nɛ e yili n taga Enyɛnpe be wajɛbu na to b mɔ mo.

⁵² Israɛlebi nɛ b ka na malɛ e chena ntuŋ ntuŋ so n ta bumo gbagba be etuuta n dulgi bumo be echenakpa.

⁵³ Ama Livaiebi na bre beeŋ yuu bumo be ewajɛbuana n chena ŋ kulti Enyɛnpe be wajɛbu na a kuŋ kumo, saŋɛ na so, esa kama maaŋ taga kumo to n shin nɛ n nya agbo ga n wɔtɔ Israɛlebi kikɛ.”

⁵⁴ Israɛlebi na daŋ wora kusɔ kama nɛ Enyɛnpe Ebɔrɛ daŋ kaŋɛ Mosis na nna.