Nshɛ 143 - EBƆRƐ BE KAWƆL

Kekule Ebɔrɛ be kechɛto be asheŋ

¹ Jande Enyɛnpe Ebɔrɛ, nu ma kekule! Nu ma kushu nseŋ wu ma kuwɔr. Bɔla fo kashenteŋji nɛ kebaawɔtɔ niŋiso so n sɔ ma n yige.

² Sa maŋ ji ma, fo kayɛrbi demu; ŋkpal manɛ so, esa kikɛ be kebaawɔtɔ maŋ niŋi ashi fo anishito.

³ Bedoŋ bee ju ma nna a kulti nɛ mee tɔr a koso. Tentembiri mina to nɛ n wɔ, fanɛ esa nɛ e wu a dese nchaŋ to dra dra kikɛ na.

⁴ Ŋkpal loŋ so ma tama kikɛ loge nna, nɛ ma kagbene jija ma m baŋ so.

⁵ Mee nyiŋi asheŋ nɛ fo wora nfɛ damta nɛ a choŋ na kikɛ nna nsaa fɛ amo be asheŋ.

⁶ M maŋ ma enɔana so ashi kabɔrɛkule to a shoŋi fo nna, Kananɛ kasawule wɔlso bee sha nchu na nɛ ma kiyoyu gba bee shu a fin fo.

⁷ Jande Enyɛnpe Ebɔrɛ, nu ma kabɔrɛkule manaŋ! Ma tama kikɛ loge. Sa maŋ pal kaman n sa ma. Nɛ mannɛ aloŋ meeŋ ya ti bumo nɛ b teŋ wu n yɔ bubuni to na so.

⁸ Ŋkpal ŋ ka ta ma yirda n deŋi fo so so, shin nɛ m baa nyiŋi fo kasha nɛ k maa loge na be asheŋ kachipurso kikɛ. Mee kule fo nna nɛ fo ŋini ma ekpa nɛ meeŋ baa bɔla so a wora asheŋ.

⁹ O Enyɛnpe Ebɔrɛ, mɔlga ma ashi bedoŋ be enɔ to, ŋkpal manɛ so, fo kutɔ nɛ mee ba nsaa nya kekuŋ.

¹⁰ Fo e la ma Ebɔrɛ. Ŋini ma kusɔ nɛ fee sha fanɛ n wora, nseŋ shin nɛ fo Kiyoyu nɛ e du boeŋ na e baa juŋkpar ma ekpa kikɛ so.

¹¹ Enyɛnpe Ebɔrɛ, baa kɔ a kuŋ ma fanɛ kananɛ fo nase kɔnɔ na. Bɔla fo kumɔlga be eleŋ na so m mɔlga ma ashi etɔrɔ to.

¹² Ŋkpal fo kasha nɛ k maa loge nɛ fo kɔ n sa ma so, mɔ ma doŋana kikɛ nseŋ mur bekama nɛ baa kɔrfɛ ma na; ŋkpal manɛ so, n la fo kayɛrbi nna.