Nehemaya 12 - EBƆRƐ BE KAWƆL

Bɔrɛmatapoana nɛ Livaiebi be asheŋ

¹ Bɔrɛmatapoana nɛ Livaiebi nɛ Shealtiɛl pibinyɛn, Zerubabel nɛ Joshuwa daŋ juŋkpar ŋ keta bumo n shi Babilɔn be efuli so kenyaya to m bɛta m ba na be atre nde.

^2-7 Bɔrɛmatapoana na e daa la Seria nɛ Jɛremaya nɛ Ɛzra, nɛ Amariya nɛ Maluk nɛ Hatush, nɛ Shekanaya nɛ Rehum nɛ Meremɔf, nɛ Iddo nɛ Ginetɔi nɛ Abija, nɛ Mijamin nɛ Maadiya nɛ Bilga, nɛ Shemaya nɛ Joirib nɛ Jedaya, nɛ Sallu nɛ Amɔk nɛ Hilkiyah nɛ Jedaya. Joshuwa be jemanɛ na, le be basa ere e daa la bejuŋkparpo ashi bumo braana bɔrɛmatapoana kikɛ to.

⁸ Livaiebi nɛ bumo alɛ gba bɛta m ba e la Joshuwa nɛ Binui nɛ Kadmiɛl nɛ Sherebia nɛ Juda nɛ Mataniya. Bumo nɛ bumo be bechɛtopo e daa juŋkpar a boŋ kapandi be nshɛ.

⁹ Bakbukia nɛ Uno nɛ bumo be bechɛtopo malɛ e daa shuli nshɛ nɛ b daa boŋ na so a sa bumo.

Bɔrɛmatapo Nimuso Joshuwa be kaman to ebi be asheŋ

¹⁰ Joshuwa e daa la Joikim mo tuto, nɛ Joikim malɛ daa la Eliashib mo tuto; nɛ Eliashib malɛ daa la Joida mo tuto

¹¹ nɛ Joida malɛ daa la Jonatan mo tuto; nɛ Jonatan malɛ daa la Jadua mo tuto.

Bɔrɛmatapoana be mbuna be benimu be asheŋ

¹² Saŋɛ so nɛ Joikim daa la bɔrɛmatapo nimuso na bɔrɛmatapoana ere e daa la bumo be mbuna be benimuana: Meeria e daa la Seiria be kabuna be benimu. Hanani malɛ e daa la Jɛremaya be kabuna be enimu.

¹³ Ɛzra be kabuna be enimu e la Mɛshulam nɛ Amariya be kabuna be enimu la Jehohanan.

¹⁴ Maluk be kabuna be enimu e la Jonatan nɛ Shebania be kabuna be enimu la Josɛf.

¹⁵ Harim be kabuna be enimu e la Adna nɛ Meraɔf be kabuna be enimu la Helkia.

¹⁶ Iddo be kabuna be enimu e la Zakareya nɛ Ginetɔn be kabuna be enimu la Mɛshulam.

¹⁷ Abija be kabuna be enimu e la Zikri nɛ Miniamin nɛ Moadia be kabuna be enimu la Piltia.

¹⁸ Bilga be kabuna be enimu e la Shamua nɛ Shemaya be kabuna be enimu la Jehonatan.

¹⁹ Joirib be kabuna be enimu e la Mattenia nɛ Jedaya be kabuna be enimu e la Uzzi.

²⁰ Salai malɛ be kabuna be enimu e la Kallai nɛ Amɔk malɛ be kabuna be enimu la Eber.

²¹ Hilkiya be kabuna be enimu e la Hashabia nɛ Jedaya malɛ be kabuna be enimu la Netanɛl.

Bɔrɛmatapoana nɛ Livaiebi be nnaŋ be asheŋ

²² Jemanɛ nɛ Eliashib nɛ Joida nɛ Johanan nɛ Jadua daŋ ki bɔrɛmatapo nimusoana kebɛso kebɛso nɛ ewurgboŋ Dariɔs daa ji Pɛshiya be efuli so be kuwura na, b daŋ sibɛ Livaiebi nɛ bɔrɛmatapoana be benimuana be atre n wɔtɔ kawɔl to n nase nna.

²³ Ama Johanan be luwu be kaman, b maŋ naŋ sibɛ Livaiebi be benimuana na be atre n wɔtɔ kawɔl to n nase.

²⁴ Hashabia nɛ Sherebia nɛ Kadmɛl pibinyɛn Joshuwa nɛ Binui nɛ basa nɛ baa sɔ bumo so a boŋ nshɛ na e daŋ juŋkpar Livaiebi na be ntuŋ anyɔ m boŋ kapandi be nshɛ m maŋkura Ebɔrɛ fanɛ kananɛ Ebɔrɛ be kayɛrbi ewura Deevid daŋ yili kumo na.

²⁵ Mataniya nɛ Bakbukia nɛ Obadaya nɛ Mɛshulam nɛ Talmɔn nɛ Akuub e daa la basa nɛ b daa keni ebuana nɛ baa yili asɔ amo to ashi bɔrɛlambu na be mbuna ase na so.

²⁶ Joshuwa pibinyɛn, ewura Jowakim nɛ mo nananyɛn daa la ewura Jozadak na be jemanɛ to kikɛ nɛ basa ere wɔtɔ. Loŋ be jemanɛ na ma e daa la gomena nɛ Ɛzra nɛ e daa ŋini Mosis be mbra na malɛ daa la bɔrɛmatapo.

Nehemaya ka ta Jerusalɛm be egbal na m bɔɔ Ebɔrɛ enɔ be asheŋ

²⁷ Jemanɛ nɛ b daa ta Jerusalɛm be egbal nɛ b lɔŋɛ m pɔr na a bɔɔ Ebɔrɛ enɔ na, b daŋ kela n tre Livaiebi nɛ b wɔ Juda be efuli kikɛ so nna nɛ b ba ta alaŋsɔ be yiri yiri m boŋ kapandi be nshɛ m maŋkura Ebɔrɛ.

^28-29 Livaiebi nɛ b la beshɛbompo na daa wɔ ndewurbi nɛ a kulti Jerusalɛm na nna. Amoso bumo be ndeana to nɛ ndewurbi nɛ a kulti Netofa nɛ Bɛf Gilgaal nɛ Gɛba nɛ Azmavɛf na nɛ b daŋ shi m ba kesheŋ wora na to.

³⁰ Bɔrɛmatapoana na nɛ Livaiebi na daŋ fɔrso daŋkare be ekpa so nna ŋ ki cheembi. Kumo be kaman nɛ b wora loŋ n sa basa nɛ b ka na nɛ mbunaana na nɛ kadegboŋ na be egbalana, nɛ amo alɛ gba ki cheembi.

³¹ N daŋ shin nɛ Juda be bejuŋkparpoana na dii kadegboŋ na be egbal na so nna nɛ n ta beshɛbompo be ntuŋ anyɔ nɛ b bɛ abar so a nite egbal na so a boŋ nshɛ a di Ebɔrɛ epaŋ na be kekeni so m bɔɔ bumo enɔ. Katuŋ ko daŋ bɛ abar so a nite a yɔ Epi be Kabuna na be kaba so be jisoso nna.

³² Hoshiya malɛ nɛ bejuŋkparpoana na be bargato daŋ bɛ beshɛbompo na so a yɔ.

³³ Kumo be kaman nɛ Azariya nɛ Ɛzra nɛ Mɛshulam nɛ b la bɔrɛmatapoana na

³⁴ nɛ Juda nɛ Bɛnjamin nɛ Shemaya nɛ Jɛremaya malɛ gba bee foŋ mbel a bɛ bumo so.

³⁵ Ndoŋ nna nɛ Zakareya nɛ mo tuto la Jonatan nɛ mo alɛ mo tuto la Shemaya nɛ mo alɛ mo tuto la Mattania nɛ mo alɛ mo tuto la Mikaya nɛ mo alɛ mo tuto la Zakku nɛ mo alɛ mo tuto la Asaf na

³⁶ nɛ Shamaya nɛ Azarɛl nɛ Mikalai nɛ Gilalai nɛ Maai nɛ Netanɛl nɛ Juda nɛ Hanani kikɛ keta alaŋsɔ a laŋ a bɛ Ɛzra nɛ e la mbra ŋinipo na so. Alaŋsɔ na barkasa nɛ Ebɔrɛ be kenya ewura Deevid daŋ laŋ dra dra na.

³⁷ B ka ta n ya fo Kechubu be Kabuna na ase nɛ b dii atemprembi nɛ baa diiso a yɔ ewura Deevid be Kadegboŋ na to na n ya baŋ mbe Lambu na so m bɛta n yɔ egbal nɛ k wɔ Nchu be Kabuna nɛ k wɔ kadegboŋ na be epeŋilarkpa be kaba so ase na.

³⁸ Beshɛbompoana na be katuŋ nyɔsopo na malɛ bɛ abar so n sɔ bena so a nite egbal na so nna nɛ ma alɛ bɛ bumo so. Bumo nɛ Juda be bejuŋkparpoana na be bargato nɛ b ka na e daa nite a yɔ. An daŋ nite n ya baŋ Asure be Ebu jeŋgreŋ na so n ya fo Egbal Gboŋ na ase nna.

³⁹ An shi ndoŋ nna n ya baŋ Efrayim be Kabuna na nɛ Jeshana be Kabuna na nɛ Kɔrɔtɔ be Kabuna na nɛ Hananɛl be Ebu jeŋgreŋ na nɛ Kalfa be Ebu jeŋgreŋ na nɛ Mbolpɔ be Kabuna na so. Bekumpo be Kabuna nɛ k wɔ bɔrɛlambu na ase na nɛ an ya tar.

⁴⁰ Ntuŋ anyɔ nɛ b daa nite a boŋ nshɛ a di Ebɔrɛ epaŋ na kikɛ daŋ ba shɛr abar so bɔrɛlambu na ase nna. Ndoŋ nna nɛ ntuŋ na be kekama be basa ya yili bumo be eyilikpa ashi bɔrɛlambu na to nɛ ma alɛ nɛ bejuŋkparpoana na be bargato malɛ yɔ anyi be kakpa.

⁴¹ Bɔrɛmatapoana nɛ b daŋ ti anyi be katuŋ na so a foŋ mbel na e daa la Eliakim nɛ Maaseia nɛ Miniamin nɛ Mikaya nɛ Elionai nɛ Zakareya nɛ Hananiya.

⁴² Bumo nɛ b daa yil ndoŋ saŋɛ nɛ Jezrahiya daa juŋkpar beshɛbompo nɛ b daa boŋ nshɛ awɔrso na e la Maaseia nɛ Shemaya nɛ Eleazar nɛ Uzzi nɛ Jehohanan nɛ Malkija nɛ Elaam nɛ Ezar.

⁴³ Ebɔrɛ daŋ shin nɛ basa na be ŋgbene fuli bumo nna ga, amoso b daŋ ji bumo be amu nna nseŋ lara esarga damta n sa Ebɔrɛ. Beche nɛ mbia kikɛ daŋ ti kayurji na so nna. Esa daa wɔ kufɔ nɛ Jerusalɛm be kadegboŋ na gba e daa beeŋ nu awɔr nɛ basa na daa wora kagbene fuli so na.

⁴⁴ Loŋ be kamɔnchɛ na b daŋ lara basa ko nna fanɛ b baa keni ebuana nɛ baa yili ajibi nɛ asɔ wurbi ashi bɔrɛlambu na to na so nna. Bumo alɛ e naaŋ baa sɔ adɔjibi nɛ b juŋkpar n teŋi na nɛ adɔjibi nɛ asɔbɔya be kudu kudusopo nɛ b lara m ba sa Ebɔrɛ na. Bumo koŋwule na e naaŋ baa sɔ adɔjibi nɛ Mosis be mbra bee ŋini fanɛ b baa bar m ba kaa sa bɔrɛmatapoana nɛ Livaiebi na gba.

⁴⁵ Bɔrɛmatapoana na nɛ Livaiebi na be kushuŋ daŋ bɔlɔ ekama kenishi jemanɛ nɛ b daŋ wora edaŋkaresheŋ nɛ a shin nɛ basa na nyalɛ so nseŋ tiŋ n nya m bunyaŋ Ebɔrɛ na nna. Beshɛbompoana na nɛ bɔrɛlambu na to be bekumpo na daŋ shuŋ bumo be ashuŋ nɛnɛ nna fanɛ kananɛ ewura Deevid nɛ mo pibinyɛn ewura Sɔlɔmɔn daŋ yili kumo n sa bumo na.

⁴⁶ Dra na kikɛ ashi ewura Deevid nɛ Asaf be jemanɛ to, beshɛbompo na e naa juŋkparpo basa na a boŋ nshɛ a di Ebɔrɛ epaŋ.

⁴⁷ Jemanɛ nɛ Zerubabel daa la bɔrɛmatapo nimuso nɛ ma, Nehemaya, malɛ daa la gomena ashi Juda be efuli so na, ekama ashi Israɛl be efuli so daa sa kusɔ nɛ k daga fanɛ e sa nɛ beshɛbompo na nɛ bɔrɛlambu na to be bekumpo nɛ b shi Livaiebi be yiri to na e baa nya bumo be karechɛ kikɛ be kusɔ jiso nna. Basa na daa lara ŋkɛ cheembi nna a sa Livaiebi na nɛ bumo alɛ bee lara amo to be amo nɛ a daga na a sa bɔrɛmatapoana nɛ b la Ɛɛrɔn be kaman to ebi na.