Maak 9 - EBƆRƐ BE KAWƆL

¹ Nɛ Yesu naŋ kaŋɛ: “Ma e kaŋɛ menyi kashenteŋto na fanɛ basa ko wɔ nfe a maaŋ wu she b wu Ebɔrɛ be kuwura na ka ba nɛ eleŋ nna pɔɛŋ.”

Kemaŋkura nɛ Yesu nya be asheŋ

² Asheŋ nɛ Yesu malga na be nchɛnshe be kaman nɛ e keta Pita nɛ Jeems nɛ Jɔn nɛ mo nɛ bumo nawule ya dii kebee jeŋgreŋ ko so n ya chena ndoŋ gbrɛbi. Ndoŋ nna nɛ e kilgi kanaŋ ko bumo be anishito.

³ Nɛ mbe asɔbuuso fuli to parr a kpa edɛ. Durnya to be esa kikɛ daa maaŋ tiŋ n shin nɛ a fuli to a kpa edɛ kananɛ a daŋ fuli to na.

⁴ Kumo be kaman nɛ bebɛsopo asa na wu anebi Elaija nɛ anebi Mosis nɛ baa malga Yesu kutɔ.

⁵ Ndoŋ nna nɛ Pita kaŋɛ Yesu: “Eŋinipo, anyi be kebaawɔ nfe ere nyalɛ ga. Anyeeŋ yuu abuu asa nɛ kukoŋwule e baa la feya nɛ kukoŋwule e baa la Mosis peya nɛ kukoŋwule malɛ e baa la Elaija peya.”

⁶ E daŋ malga loŋ nna ŋkpal kufu ka daŋ pɛ mo nɛ bumo nɛ b ka na ga so nɛ e daa maŋ nyi kusɔ nɛ e beeŋ kaŋɛ.

⁷ Nɛ kuwɔlpa ko lar nɛ kumo be kiyoyul ba buu bumo so nɛ ebɔl shi kuwɔlpa na to ŋ kaŋɛ: “M Pibinyɛn shaso nde, men baa nu mbe kɔnɔ.”

⁸ Nɛ b gbɛ manaŋ ŋ keni nɛ Yesu nawule e yil, esa kama maŋ naŋ ti mo so a wɔ bumo kutɔ.

⁹ Ndoŋ nna nɛ bumo kikɛ fara a gbelge kebee na so nɛ Yesu fiɛ bumo so ŋ kaŋɛ: “Men sa maŋ kaŋɛ esa kikɛ kusɔ nɛ men wu na be asheŋ hale nɛ ma, Nyiŋgbasa Pibinyɛn e ya tiŋi luwu to.”

¹⁰ B daŋ nu mbe kɔnɔ, ama b daŋ fara nna a malga kumo be asheŋ a bishi abar: “Ketiŋi luwu to ere be kifito e la manɛ?”

¹¹ Nɛ b bishi Yesu: “Manɛ e ba nɛ mbraŋinipoana na bee kaŋɛ fanɛ anebi Elaija e daga kejuŋkpar m ba na?”

¹² Nɛ e kaŋɛ bumo le: “Kashenteŋ, Elaija bee juŋkpar a ba nna nɛ e ba lɔŋɛ kusɔ kama n yili. Ŋkeshin nɛ manɛ e ba nɛ abɔrɛsibɛ na bee kaŋɛ fanɛ ma, Nyiŋgbasa Pibinyɛn beeŋ ji etɔrɔ damta nɛ b keni ma jiga?

¹³ Ma alɛ e kaŋɛ menyi na fanɛ Elaija teŋ ba, nɛ basa wora mo kusɔ kama nɛ k par bumo fanɛ kananɛ abɔrɛsibɛ na kaŋɛ na.”

Yesu ka chɛ kebinyɛnbi nɛ mbuibi lubi tɔr so na be asheŋ

¹⁴ B ka bɛta m ba bebɛsopo nɛ b ka na kutɔ nɛ b wu jimaŋ damta ndoŋ. Saŋɛ na so nɛ mbraŋinipoana be beko nɛ bebɛsopo na daa ji emɔrɔ.

¹⁵ Basa na ka baŋ wu Yesu nɛ k chinchiŋ bumo ga nɛ b shile n yɔ mo kutɔ n ya chɔrɔ mo.

¹⁶ Nɛ Yesu bishi mbe bebɛsopo: “Manɛ be emɔrɔ nɛ menyi nɛ bumo bee ji?”

¹⁷ Nɛ jimaŋ na to be esa ko sɔ ŋ kaŋɛ: “Eŋinipo, m pibinyɛn nɛ n ta m ba fo kutɔ, ŋkpal manɛ so, kiyoyu lubi e wɔ mo to nɛ e maa tiŋ a malga.

¹⁸ Saŋkama nɛ kiyoyu lubi na baŋ ya koso mo so, e bee lɛ mo kasawule nna, nɛ apɔpɔ e baa lar mbe kɔnɔ to, nɛ e baa we anyi to, nɛ mbe eyur kikɛ e ki keŋkreŋ. Ŋ kule fo bebɛsopo na fanɛ b ju kiyoyu lubi na mo to, ama b maŋ tiŋ.”

¹⁹ Nɛ Yesu bishi bebɛsopo na: “O menyi mbreebi, nuso be basa e la menyi nɛ men maŋ kɔ yirda ere bre? Nuso be kechɛr nɛ menyee sha fanɛ n chɛr menyi kutɔ? Nuso be kanyiti nɛ menyee sha fanɛ n naŋ ta ŋ keta menyi?

²⁰ Men bar kebia na ma kutɔ.” Nɛ b bar mo m ba sa Yesu. Kiyoyu lubi na ka baŋ wu Yesu nɛ e da kebia na n lɛ kasawule n shin nɛ e bee sela aya to a kpa enɔana nsaa gbelti nɛ apɔpɔ bee lar mbe kɔnɔ to.

²¹ Nɛ Yesu bishi kebia na mo tuto: “Kusɔ ere wɔ mo to n chɛr a?” Nɛ kanyɛn na kaŋɛ: “Hale mbe kebiato kikɛ.

²² Mbe keda mo n lɛ edɛ nɛ nchu to a sha kemɔ mo shi ga. Wu anyi kuwɔr n chɛ anyi to nɛ feeŋ tiŋ nna na.”

²³ Nɛ Yesu kaŋɛ mo: “Fo yɛ meeŋ tiŋ? Shɛŋ shɛŋ maaŋ baa du kpakpa n sa esa nɛ e kɔ yirda!”

²⁴ Epul na to nɛ kebia na mo tuto kaŋɛ awɔrso: “Ŋ kɔ yirda, ama k maŋ shi nna. Chɛ ma to!”

²⁵ Yesu ka wu fanɛ jimaŋ na bee wora keshi mo so nɛ e fiɛ kiyoyu lubi na so ŋ kaŋɛ: “Kpawu nɛ neemu be kiyoyu lubi, lar kebinyɛnbi na to nsaa maŋ naŋ bɛta n yɔ mo to kikɛ.”

²⁶ Nɛ kiyoyu lubi na nyaŋɛ to kebinyɛnbi na to ga n fiɛ to m ba lar ŋ ka mo n nase fanɛ ebuni nɛ basa na be bedamta kaŋɛ fanɛ: “E wu.”

²⁷ Ama Yesu pɛ kebinyɛnbi na be enɔ to n chɛ mo to nɛ e niŋi to ŋ koso n yili.

²⁸ Kumo be kaman nɛ Yesu luri laŋ ko to nɛ mbe bebɛsopo na ŋana m bishi mo: “Manɛ e ba nɛ anyi ere maŋ tiŋ n ju kiyoyu lubi na?”

²⁹ Nɛ Yesu kaŋɛ bumo: “Sheŋ shɛŋ maaŋ tiŋ n ju le be kiyoyu ere bre ama bebɛsopo na baŋ kule Ebɔrɛ nna.”

Yesu naŋ malga mbe luwu be asheŋ

³⁰ Ndoŋ nna nɛ b shi ndoŋ m bɔla Galili to a yɔ, ama Yesu daa maa sha ekama ka pin kakpa nɛ e wɔ.

³¹ Ŋkpal manɛ so, e daa ŋini mbe bebɛsopo nna a kaŋɛ: “Baaŋ ta ma, Nyiŋgbasa Pibinyɛn m bɔɔ basa enɔ nɛ b mɔ ma, ama b kaŋ mɔ ma be nchɛ asa to meeŋ tiŋi luwu na to.”

³² B daa maŋ pin mbe kamalga na to, ama b daa maŋ bishi mo shɛŋ ŋkpal kufu so.

Emo nɛ e chɔ ekama be asheŋ

³³ B ka ba Kapɛɛniam m ba luri laŋ ko to nɛ Yesu bishi mbe bebɛsopo na: “Manɛ be emɔrɔ nɛ menyi daa ji ekpa to na?”

³⁴ Nɛ b la to, ŋkpal manɛ so, b daa wɔ ekpa na to nna a ji emɔrɔ a fin bumo to be emo nɛ e chɔ ekama.

³⁵ Nɛ Yesu chena nseŋ tre bebɛsopo kuduanyɔ na m ba kaŋɛ bumo: “Ekama nɛ e bee sha kejuŋkpar, e yɛr mbe kumu ekama be kaman nseŋ ki ekama be kayɛrbi.”

³⁶ Ndoŋ nna nɛ e shin nɛ kebia ko ba yili bumo be anishito nɛ e gberge kebia na m mata mbe kumu nseŋ kaŋɛ bumo:

³⁷ “Esa kama nɛ e sɔ le be kebia ere ŋkpal ma so, sɔ ma nna na nɛ ekama nɛ e sɔ ma, e maŋ sɔ ma nawule, ama emo nɛ e shuŋi ma na gba nɛ e sɔ.”

Ekama nɛ e maŋ la an doŋ la an teri nna be asheŋ

³⁸ Kachako Jɔn kaŋɛ Yesu: “Eŋinipo, an wu kanyɛn ko ka kɔ fo ketre a ju mbuibi lubi nɛ an kaŋɛ mo e yige, ŋkpal manɛ so, mannɛ anyi to be eko e la mo.”

³⁹ Nɛ Yesu kaŋɛ: “Men sa maa fin keju mo, ŋkpal manɛ so, ekama nɛ e ta ma ketre a wora emamachisheŋ, maaŋ tiŋ ŋ kilgi epul na to m malga alubi ŋ gbiti ma.

⁴⁰ Ŋkpal manɛ so, ekama nɛ e maŋ la an doŋ la an teri nna.

⁴¹ Ma e kaŋɛ menyi kashenteŋto na fanɛ abaanaaworasheŋ, ekama nɛ e sa menyi nchu nuuso ŋkpal men ka la Kristo peya na so so, e beeŋ nya kumo be tɔnɔ.”

Kechɔ n wɔtɔ kulubi to be asheŋ

⁴² Ndoŋ nna nɛ e naŋ kaŋɛ: “Ekama nɛ e shin nɛ mbibi nɛ b yirda ma ere be eko wora kulubi, kusɔ nɛ k beeŋ nya amodoŋwura na beeŋ lubi a chɔ b ka ta kuboo gboŋgboŋi n shiga mbe kubɔ to nseŋ ta mo n lɛ n wɔtɔ teku to nɛ e ji nchu.

⁴³ Amoso, nɛ fo enɔ bee shin nɛ fee luri alubi to, fo ku kumo n lɛ, ŋkpal manɛ so, fo ka dulgi nseŋ luri ŋkpa to e bɔ fo so a chɔ fo ka ta enɔ anyɔ n luri Setani be edɛ nɛ b maaŋ tiŋ n duŋ kikɛ na to.

⁴⁴ [Ndoŋ basa be ashushombi maa wu kikɛ nɛ edɛ na malɛ maa duŋ kikɛ.]

⁴⁵ Nɛ fo keya bee shin nɛ fee luri alubi to, fo ku kumo n lɛ, ŋkpal manɛ so, fo ka la bobi nseŋ luri ŋkpa to e bɔ fo so a chɔ fo ka kɔ aya anyɔ nɛ b ta fo n lɛ Setani be edɛ to.

⁴⁶ [Ndoŋ basa be ashushombi maa wu kikɛ nɛ edɛ na malɛ maa duŋ kikɛ.]

⁴⁷ Nɛ fo kenishi malɛ bee shin nɛ fee luri alubi to, fo chule kumo n lɛ, ŋkpal manɛ so, fo ka ta kenishi koŋwule n luri Ebɔrɛ be kuwura na to e bɔ fo so a chɔ fo ka kɔ anishi anyɔ nɛ b ta fo n lɛ Setani be edɛ to.

⁴⁸ Ndoŋ basa be ashushombi maa wu kikɛ nɛ edɛ na malɛ maa duŋ kikɛ.”

Nfɔl be kela be asheŋ

⁴⁹ Baaŋ ta edɛ be kayurnyaŋ n wora ekama ŋ keni nɛ e ki esa cheembi fanɛ kananɛ baa kɔr nfɔl a wɔtɔ ajibi to nɛ a maa jija manaŋ manaŋ na.

⁵⁰ “Nfɔl walɛ, ama nɛ fanɛ amo be ebel baŋ lar amo to, nuso nɛ baaŋ naŋ tiŋ n wora amo ebel? Men shin nɛ men be asheŋ e baa wɔ ebel nɛ menyi nɛ men braana na e baa wɔtɔ nɛ kagbenewushi.”