Maak 14 - EBƆRƐ BE KAWƆL

B ka kre Yesu be kemɔ be nia be asheŋ

¹ A daŋ ka nchɛnnyɔ nna, nɛ Kebansonchoŋ be kejigboŋ, kumo e la bodobodo nɛ a maŋ kɔ yiisi be Kejigboŋ na be jemanɛ e fo. Bɔrɛmatapowuraana nɛ mbraŋinipoana daa fin kananɛ baaŋ ŋana m pɛ Yesu m mɔ.

² Ama le nɛ b daŋ kaŋɛ bumo be amu: “Men sa maŋ shin nɛ an wora loŋ Kejigboŋ ere be saŋɛ ere to, nɛ mannɛ aloŋ, basa beeŋ koso m bar kebagato.”

B ka chulgi tulale n wurge Yesu so be asheŋ

³ Yesu ka daa wɔ Bɛtani a tase Saimɔn botipo pe a ji nɛ kache ko keta amansherbi damta be tulale dufɛso ko be kɔlba lelabi m ba luri. Ndoŋ nna nɛ e bure kɔlbabi na n chulgi tulale na n wurge Yesu be kumu so.

⁴ Ndoŋ nna nɛ basa na be beko be ŋgbene kaa nɛ b bishi abar: “Tulale ere be kejija be kifito e la nuso?

⁵ B daa beeŋ tiŋ n ta tulale ere n fa n nya a chɔ pɔŋ alfa asa n ta amansherbi na n sa betirpo.” Nɛ b malga kache na ga.

⁶ Ama Yesu kaŋɛ bumo: “Men yige mo. Manɛ e ba nɛ menyee tɔrɔ mo? Kusɔ lela nɛ e wora ma na.

⁷ Saŋkama menyi nɛ betirpo e naaŋ baa la, nɛ saŋkama nɛ menyee sha, menyeeŋ tiŋ n chɛ bumo to, ama ma ere nɛ menyi maaŋ baa la saŋkama.

⁸ Kusɔ nɛ e beeŋ tiŋ nɛ e wora na. E chulgi tulale na nna n wurge ma eyur so nɛ e lɔŋɛ kumo n yili kepuliachɛ.

⁹ Ma e kaŋɛ menyi kashenteŋto na fanɛ, kaplɛkama nɛ b bɔ baru lela na durnya ere kikɛ to, baaŋ malga kusɔ nɛ e wora ere be asheŋ n nyiŋi mo.”

Judas ka shuli kedebɔr Yesu be asheŋ

¹⁰ Ndoŋ nna nɛ Judas Iskareɔt, bebɛsopo kuduanyɔ na to be eko yɔ bɔrɛmatapowuraana kutɔ nɛ e ya debɔr Yesu n sa bumo.

¹¹ B ka nu loŋ na nɛ bumo be ŋgbene fuli bumo ga, nɛ b nase kɔnɔ fanɛ baaŋ sa mo amansherbi. Nɛ Judas fara a fin ekpa nɛ e beeŋ bɔla so n debɔr Yesu.

Yesu nɛ mbe bebɛsopo ka ji Kebansonchoŋ be ajibi be asheŋ

¹² Kachɛ nɛ b fara bodobodo nɛ a maŋ kɔ yiisi be Kejigboŋ na, kachɛ nɛ baa mɔ Kebansonchoŋ be kpakpafɔlbi a lara sarga na nɛ Yesu be bebɛsopo ba bishi mo: “Nnɛ nɛ fee sha fanɛ an ya bela ase n yili fo nɛ fo ba ji Kebansonchoŋ be ajibi na?”

¹³ Nɛ Yesu ta le be kubɔya n shuŋi bumo to be benyɔ ŋ kaŋɛ: “Men yɔ kade to. Kanyɛn ko ka sulɔ kapuya nɛ nchu beeŋ shɛr menyi to.

¹⁴ Men bɛ mo so n ya luri laŋ kama to nɛ e beeŋ luri na to nseŋ ya kaŋɛ laŋ na wura: ‘Eŋinipo na yɛ: Befɔ be ebu nɛ ma nɛ ma bebɛsopo beeŋ chena n ji Kebansonchoŋ be ajibi na wɔ nnɛ?’

¹⁵ E beeŋ ŋini menyi esoso be ebu gboŋgboŋi ko nɛ b bela ase n yili na. Men wora ajibi na n yili anyi ndoŋ.”

¹⁶ Nɛ bebɛsopo na lar n yɔ kade to n ya tu asɔ kananɛ Yesu daŋ baŋ malga na chap nseŋ ya wora Kebansonchoŋ be ajibi na n yili.

¹⁷ Kanyɛ ka biri nɛ Yesu nɛ mbe bebɛsopo kuduanyɔ na ba.

¹⁸ B ka ba kaa tase ejikpa a ji na nɛ Yesu kaŋɛ: “Kashenteŋto nɛ mee kaŋɛ menyi na fanɛ menyi to be eko beeŋ debɔr ma, mo alɛ e tase ma kutɔ ejikpa nfe a ji na.”

¹⁹ Nɛ bumo be ŋgbene jija bumo ga nɛ b fara a bishi mo kukoko to: “M baa nyi fo ka maŋ de ma ŋko?”

²⁰ Nɛ Yesu kaŋɛ: “K la menyi kuduanyɔ ere to be eko nna, emo nɛ ma nɛ mo bee ta bodobodo a bɔ enɔ a wɔtɔ kawie koŋwule to a ji ere.

²¹ Ma, Nyiŋgbasa Pibinyɛn beeŋ yɔ luwu to fanɛ kananɛ b sibɛ n nase abɔrɛsibɛ na to na, ama asheŋ maaŋ nyalɛ n sa emo nɛ e beeŋ debɔr ma, Nyiŋgbasa Pibinyɛn na kikɛ. Nɛ b daa maŋ kurge loŋ be esa gba, k daa beeŋ baa bɔ mo so.”

Enyɛnpe be daŋkarejibi be asheŋ

²² B ka bee ji na nɛ Yesu ta bodobodo na n nɛfa kumo nseŋ bu kumo to n ta n sa mbe bebɛsopo nseŋ kaŋɛ: “Men ta n we, ma eyur nna na.”

²³ Nɛ e ta kawiebi nɛ asɔnuuso n chɔrɔ Ebɔrɛ n loge nseŋ ta kumo n sa bumo nɛ bumo kikɛ nuu kumo to.

²⁴ Nɛ Yesu kaŋɛ bumo: “Ma ŋklaŋ nɛ a lar a sa basa damta na nde. Amo e naa ti Ebɔrɛ nɛ dimɛdi be kɔnɔkoŋwule be ŋkre na so.

²⁵ Ma e kaŋɛ menyi kashenteŋto na fanɛ m maaŋ naŋ nuu le be waindibi be yabra kikɛ hale n ya fo kachɛ nɛ meeŋ nuu yabra popɔr ashi Ebɔrɛ be kuwura na to na.”

²⁶ Kede be kaman nɛ b boŋ kashɛ n lar n yɔ Ɔlif be kebee so.

Yesu ka wu ŋ kaŋɛ Pita ka beeŋ lar mo kaman be asheŋ

²⁷ Nɛ Yesu kaŋɛ bumo: “Menyi kikɛ beeŋ shile ŋ ŋana ŋ ka ma, ŋkpal manɛ so, abɔrɛsibɛ na bee kaŋɛ fanɛ Ebɔrɛ kaŋɛ: ‘Meeŋ mɔ mbolpɔkpapo na nɛ mbe mbolpɔ na kikɛ e yeŋ to m pesaŋ to.’

²⁸ Ama ŋ kaŋ tiŋi luwu na to, meeŋ juŋkpar menyi n yɔ Galili.”

²⁹ Ndoŋ nna nɛ Pita kaŋɛ mo le: “Nɛ ekama shile ŋ ŋana ŋ ka fo gba, ma ere maaŋ shile fo kikɛ.”

³⁰ Nɛ Yesu kaŋɛ mo le: “Kashenteŋ nɛ mee kaŋɛ fo na fanɛ pɔɛŋ nɛ koshinyɛn e boŋ ale anyɔ kanyɛ ere, feeŋ chɛ ale asa ŋ kaŋɛ fanɛ fo maŋ nyi ma.”

³¹ Nɛ Pita naŋ kaŋɛ kenyɛnso: “Hale nɛ ma nɛ fo beeŋ wu gba, m maa ba nɛ m ba kaŋɛ fanɛ m maŋ nyi fo.” Loŋ koŋwule na nɛ bumo kikɛ malɛ gba daŋ kaŋɛ.

Kananɛ Yesu kule Ebɔrɛ ashi Gɛtsɛmani be asheŋ

³² Asheŋ ere be kaman nɛ Yesu nɛ mbe bebɛsopo na yɔ kakpa nɛ baa tre Gɛtsɛmani na nɛ e ya kaŋɛ bumo le: “Men chena nfe nɛ n ya kule Ebɔrɛ.”

³³ Ndoŋ nna nɛ e keta Pita nɛ Jeems nɛ Jɔn n ti mbe kumu so n yɔ nɛ kagbenejija nɛ kafɔŋ tɔr mo so ga.

³⁴ Nɛ e kaŋɛ bumo le: “Kagbenejija nɛ k wɔ ma to shi ga, hale a sha keburi ma to m mɔ. Men shir a wɔ nfe a de so.”

³⁵ Ndoŋ nna nɛ e yɔ anishito gbrɛbi n ya gbir kasawule nseŋ kule Ebɔrɛ fanɛ, nɛ ekpa wɔtɔ, Ebɔrɛ e ta awurfoŋ na ashi mo so.

³⁶ E yɛ: “Etuto, n Tuto, feeŋ tiŋ n wora kusɔ kama, ta awurfoŋ ere ashi ma so. Ama mannɛ ma keparso, shin nɛ k baa la feya.”

³⁷ Nɛ e bɛta m ba tu bebɛsopo asa na nɛ baa di nɛ e kaŋɛ Pita: “Saimɔn, menyee di na a? Men maaŋ tiŋ n chena a de so awa koŋwule gba a?

³⁸ Men baa da so a kule Ebɔrɛ fanɛ men maaŋ luri kechɔŋkeni to. Kiyoyu na bre bee sha, eyur na e maŋ kɔ eleŋ.”

³⁹ Nɛ e naŋ bɛta n yɔ n ya kule loŋ be kabɔrɛkule koŋwule na.

⁴⁰ E ka naŋ bɛta m ba bebɛsopo asa na kutɔ nɛ b naa di, ŋkpal manɛ so, bumo be anishi daŋ wora bumo egbɛ nna ga, amoso, b daa maŋ pin kusɔ nɛ baaŋ naŋ kaŋɛ mo.

⁴¹ E ka naŋ bɛta m ba kela sasopo to nɛ e bishi bumo le: “Men kraa di nna a wushi a? A kukwe, saŋɛ na fo nɛ b debɔr ma, Nyiŋgbasa Pibinyɛn na n ta ma m bɔɔ alubiworapoana enɔ.

⁴² Men koso nɛ an yɔ. Men keni emo nɛ e debɔr ma na nde.”

Kananɛ b pɛ Yesu be asheŋ

⁴³ E kraa malga nna nɛ bebɛsopo kuduanyɔ na to be emo nɛ baa tre Judas na ba ndoŋ epul na to. Nɛ jimaŋ ko keta etokobi nɛ mprɛ m bɛ mo so. Bɔrɛmatapowuraana na nɛ mbraŋinipoana na nɛ benimuana na e daŋ shuŋi bumo.

⁴⁴ Pɔɛŋ nɛ b ba ndoŋ le nɛ edebɔrpo na daŋ ŋini bumo: “Emo nɛ meeŋ ba pipe mbe kegbuŋ kechɔrɔso na e la kanyɛn nɛ menyee sha na. Men pɛ mo ŋ keni mo so a yɔ.”

⁴⁵ B ka fo ndoŋ nɛ Judas yɔ Yesu kutɔ epul na to n ya kaŋɛ mo le: “Eŋinipo!” Nseŋ pipe Yesu be kegbuŋ kechɔrɔso.

⁴⁶ Nɛ b nyaŋ Yesu m pɛ mo.

⁴⁷ Ndoŋ nna nɛ bumo nɛ b daa yil na be eko pe mbe tokobi ŋ ŋe bɔrɛmatapo nimuso be kenya ko be kusoe n chuge.

⁴⁸ Nɛ Yesu malga ŋ kaŋɛ bumo: “Men ta etokobi nɛ mprɛ nna m ba nɛ men ba pɛ ma fanɛ eyu a? Ma nɛ menyi e daa la bɔrɛlambu na to kachɛ kama nɛ mee ŋini abɔrɛsheŋ, ama men maŋ pɛ ma.

⁴⁹ Ama a daga fanɛ abɔrɛsibɛ na ka bɔla.”

⁵⁰ Nɛ bebɛsopo na kikɛ shile ŋ ka mo.

⁵¹ Kabrantiɛbia ko daŋ buu wajɛ nawule a bɛ mo so. Nɛ basa na daa sha kepɛ mo nseŋ nya mbe wajɛ

⁵² nɛ e lɛ kumo n delge so n shile.

B ka bar Yesu demujikpa be asheŋ

⁵³ Nɛ basa na keta Yesu n yɔ bɔrɛmatapo nimuso na pe. Ndoŋ nɛ bɔrɛmatapowuraana na nɛ benimuana na nɛ mbraŋinipoana na daŋ ya shɛr.

⁵⁴ Saŋɛ na so nɛ Pita malɛ bɛ mo so a wɔ kaman kufɔ n ya luri bɔrɛmatapo nimuso na be laŋ be epunto. Ndoŋ nɛ mo nɛ nyɛrbi na chena a wɔl edɛ.

⁵⁵ Bɔrɛmatapowuraana na nɛ Sanhedrinebi na kikɛ daa fin eshɛdajipo nɛ baaŋ malga ŋ gbiti Yesu nɛ b tiŋ n nya mo m mɔ nna.

⁵⁶ Ama b daa maŋ nya shɛŋ nɛ b yili so, ŋkpal manɛ so, eshɛdajipo damta daŋ ba ku efɛ n deŋi Yesu, ama bumo be eshɛdaana na daa maŋ bɛ abar so.

⁵⁷ Nɛ basa ko koso ŋ ku le be efɛ n deŋi Yesu. B yɛ:

⁵⁸ “An nu e ka kaŋɛ fanɛ: ‘Meeŋ bure bɔrɛlambu nɛ nyiŋgbasa pɔr ere n lɛ nɛ kumo be nchɛ asa to nɛ m pɔr kumo nɛ enyiŋgbasa kikɛ maaŋ tiŋ m pɔr.’ ”

⁵⁹ Ama bumo alɛ gba be mmalga daa maŋ bɛ abar so.

⁶⁰ Nɛ bɔrɛmatapo nimuso na yili basa na kikɛ be anishito m bishi Yesu le: “Fo maa tuge asheŋ nɛ baa malga a gbiti fo ere nna a?”

⁶¹ Ama Yesu daŋ la to nna a yil a maa tuge shɛŋ. Nɛ bɔrɛmatapo nimuso na naŋ bishi mo: “Fo e la Kristo, Ebɔrɛ Ewurgboŋ nɛ b nɛfa na Pibinyɛn na a?”

⁶² Nɛ Yesu kaŋɛ: “Ma nna. Menyi alɛ beeŋ wu ma, Nyiŋgbasa Pibinyɛn ka tase Elempo na be jisoso nseŋ naŋ wu ŋ ka shi awɔlpa to a ba.”

⁶³ Nɛ bɔrɛmatapo nimuso na kpɛa mbe asɔbuuso to nseŋ kaŋɛ le:

⁶⁴ “Men nu kananɛ e malga ŋ gbiti Ebɔrɛ nna na. An naa sha eshɛda ko nna n ti so a? Manɛ nɛ men wu kumo to?” Nɛ bumo kikɛ kaŋɛ fanɛ e wora alubi n daga luwu.

⁶⁵ Nɛ bumo be beko fara a tuu echɔl a fea Yesu n wora mo kebuumbuuanishi nsaa ŋmɛa mo a kaŋɛ: “Pin esa nɛ e ŋmɛa fo ere.” Nɛ bekumpo na pɛ mo ŋ kpa mo etaŋ.

Pita ka chɛ fanɛ e maŋ nyi Yesu be asheŋ

⁶⁶ Pita ka daa wɔ laŋ na be epunto na, nɛ bɔrɛmatapo nimuso na be mbita be eko ba ndoŋ.

⁶⁷ E ka wu Pita ka bee wɔl edɛ nɛ e pɛshɛ mo nɛnɛ nseŋ kaŋɛ: “Fo alɛ gba nɛ Nazarɛt be Yesu na e daa la.”

⁶⁸ Nɛ Pita chɛ kumo ŋ kaŋɛ: “Ma ere maŋ nyi ŋko m pin fo kamalga ere be kifito.” Kumo be kaman nɛ e koso n yɔ laŋ na be kabuna to. Epul na to nɛ koshi boŋ.

⁶⁹ Ndoŋ nna nɛ kebita na naŋ wu mo ndoŋ nseŋ naŋ fara a kaŋɛ bumo nɛ b yil ndoŋ na: “Kanyɛn ere la bumo be eko nna.”

⁷⁰ Nɛ Pita naŋ chɛ kumo. K maŋ chɛr ko nɛ basa nɛ b yil ndoŋ na naŋ kaŋɛ Pita: “K baŋ fuli nna fanɛ fo ka la basa ere to be eko, ŋkpal manɛ so, Galili be esa e la fo.”

⁷¹ Ndoŋ nna nɛ Pita bɔ ntaŋ n deŋi mbe kumu nseŋ kaŋɛ: “M maŋ nyi kanyɛn mo nɛ menyee malga mbe asheŋ ere kuraa.”

⁷² Epul na to nɛ koshinyɛn boŋ kela nyɔsopo. Ndoŋ nna nɛ Pita nyiŋi kusɔ nɛ Yesu kaŋɛ fanɛ: “Pɔɛŋ nɛ koshinyɛn e boŋ ale anyɔ, feeŋ chɛ ale asa ŋ kaŋɛ fanɛ fo maŋ nyi ma na.” Nɛ e fara a shu.