Jɛremaya 1 - EBƆRƐ BE KAWƆL

¹ Jɛremaya nɛ e la Hilkiya pibinyɛn nseŋ shi bɔrɛmatapoana be kanaŋ to ashi kade nɛ baa tre Anatɔf nɛ k wɔ Bɛnjamin be yiri to ebi be kasawule so na be mmalga nɛ e wɔ kawɔl ere to nde.

² Josaya nɛ e la Ammɔn pibinyɛn ka daa ji Juda be efuli so be kuwura na be kafɛ kuduasasopo to nɛ Enyɛnpe Ebɔrɛ na malga Jɛremaya kutɔ.

³ Kumo be kaman nɛ Ebɔrɛ naŋ malga n sa mo jemanɛ nɛ Josaya wu nɛ mo pibinyɛn nɛ baa tre Jehowakim na sɔ mo so a ji kuwura na. Enyɛnpe Ebɔrɛ na kraŋ naŋ malga Jɛremaya kutɔ ale damta, hale n ya fo Josaya pibinyɛn nɛ baa tre Zɛdikaya na be kuwurji be saŋɛ be kafɛ kudukakosopo to be kufɔl nusopo na to. Loŋ be kufɔl na to nɛ bedoŋ daŋ ba kɔ m pɛ Jerusalɛm to be basa n yɔ kenyaya to ashi efuli pɔtɛ wɔfɔ wɔfɔ so.

Enyɛnpe Ebɔrɛ na ka tre Jɛremaya be asheŋ

⁴ Enyɛnpe Ebɔrɛ na yɛ:

⁵ “Jɛremaya, pɔɛŋ nɛ n to fo n wɔtɔ fo nio be epun to nɛ e kurge fo, n lara fo nna n yili fanɛ ma anebi n sa efuliana so be basa.”

⁶ Ndoŋ nna ŋ nɛ kaŋɛ le: “Enyɛnpetale Ebɔrɛ, nuso nɛ meeŋ wora m pin fo mmalga to ŋ kaŋɛ basa? N la kebifɔlbi gbagba nna.”

⁷ Ama kusɔ nɛ Enyɛnpe Ebɔrɛ na kaŋɛ ma e la fanɛ: “Sa maŋ kaŋɛ fanɛ fo la kebifɔlbi gbagba nna, ama yɔ basa nɛ n shuŋi fo bumo kutɔ na n ya kaŋɛ bumo kusɔ kama nɛ ŋ kaŋɛ fo kenishipereso.

⁸ Sa maa ŋana bumo, ŋkpal manɛ so, meeŋ baa wɔ fo kutɔ nsaa kuŋ fo. Ma, Enyɛnpe Ebɔrɛ e kaŋɛ na!”

⁹ Kede be kaman nɛ Enyɛnpe Ebɔrɛ na teŋi mbe enɔ m beta ma kɔnɔpurbi nseŋ kaŋɛ ma le: “Nu nfe! Mee sa fo mmalga nɛ feeŋ baa malga nna na.

¹⁰ Kabre mee sa fo eleŋ nna nɛ fo tiŋ a kaŋɛ efuliana na be basa fanɛ meeŋ lara bumo ashi to nseŋ mur bumo nɛ b maaŋ naa wɔtɔ kuraa. Kumo be kaman nɛ n naŋ lɔŋɛ m pɔr bumo be efuliana na n yili.”

Ebɔrɛdare anyɔ be asheŋ

¹¹ Ade be kaman nɛ Enyɛnpe Ebɔrɛ na shin nɛ ŋ ku bɔrɛdare nɛ e bishi ma le: “Jɛremaya, manɛ nɛ fo wu?” Nɛ ŋ kaŋɛ mo le: “Kedibi nɛ baa tre amɔnd na be kesɔrso nɛ k bee bel a pere manaŋ nɛ n wu.”

¹² Ndoŋ nna nɛ Enyɛnpe Ebɔrɛ na kaŋɛ: “Kashenteŋ nɛ fo ji, ŋkpal manɛ so, mee keni ma mmalga ekpa nna nɛ e wora m bɔlɔ so kashenteŋto.”

¹³ Kede be kaman nɛ Enyɛnpe Ebɔrɛ na naŋ bishi ma le: “Manɛ nɛ fo naŋ wu n ti so?” Nɛ ŋ kaŋɛ mo le: “N wu nchu ka wɔ kapuliya to a bɛ edɛ so a falte ashi kelargato be esoso be kaba so. K gbɛto nna n shoŋi anyi be kaba so, a sha ketɔr nɛ shudɛ na e wurge.”

¹⁴ Ndoŋ nna nɛ Enyɛnpe Ebɔrɛ na kaŋɛ ma le: “K maaŋ chɛr nɛ kemur gboŋgboŋi e shi kelargato be esoso be kaba so m ba bekama nɛ b wɔ kasawule so.

¹⁵ Ŋkpal manɛ so, mee pla enɔ a tre efuli pɔtɛana be basa nɛ b wɔ kelargato be esoso be kaba so na nna fanɛ b ba. Baaŋ ba kɔ n suge Jerusalɛm nɛ Juda be ndeana kikɛ. Kumo be kaman nɛ bumo be bewuraana e nase bumo be nwɔl nɛ nwurputi ashi Jerusalɛm be mbunagboŋ ase n chena so.

¹⁶ Meeŋ gberge ma basa kusoe ŋkpal b ka kini ma n lɛ nsaa shuŋ agbir a lara esarga a sa amo so.

¹⁷ Jɛremaya, wora shiriya n ya kaŋɛ basa na kusɔ kama nɛ ŋ kaŋɛ fo kenishipereso na. Sa maa ŋana bumo, nɛ mannɛ aloŋ meeŋ shin nɛ kufu nɛ k chɔ loŋ a pɛ fo jemanɛ nɛ feeŋ baa wɔ bumo to na.

^18-19 Jɛremaya, nu nfe! Juda be bewura nɛ benimuana nɛ bɔrɛmatapoana nɛ basa na kikɛ beeŋ nya agbo a kɔ fo. Ama meeŋ wora fo eleŋ to kabre, nɛ fo tiŋ n yili to n tu bumo ŋ kɔ. Feeŋ baa du fanɛ kadegboŋ nɛ b pɔr egbal lempo ŋ kulti kumo ŋko kebɛlso tenteŋ ŋko danyaŋ peper be egbal nɛ b maaŋ tiŋ ŋ kɔ m pɔɔ fo so kikɛ. Ŋkpal manɛ so, meeŋ baa wɔ fo kutɔ a kuŋ fo. Ma, Enyɛnpe Ebɔrɛ e kaŋɛ na.”