Jɛnesis 50 - EBƆRƐ BE KAWƆL

¹ Ndoŋ nna nɛ Josɛf kilgi n tɔr mo tuto so n shu ga nseŋ lala mo so kashaso.

² Kumo be kaman nɛ Josɛf sa basa nɛ baa mɛa bubuni to a puli na ekpa fanɛ b gbiti mo tuto Jeekɔb be eyur kudur, nɛ k sa maŋ bɛ.

³ Loŋ malɛ be kesheŋ wora na daa ta nchɛ adena nna, amoso nchɛ adena na nɛ basa na daŋ ta n wora loŋ. Ndoŋ nna nɛ Ijiptebi na shu Jeekɔb be keeli nchɛ adushunu.

⁴ Keeliwora na be jemanɛ ka choŋ nɛ Josɛf kaŋɛ ewura Fɛɛro be benimu le: “Nɛ menyee sha ma asheŋ, men ta le be kubɔya ere n ya sa ewura n sa ma.

⁵ Men kaŋɛ mo fanɛ n tuto ka daa shin nɛ e wu, e daŋ shin nna nɛ n nase kɔnɔ n sa mo fanɛ nɛ e kaŋ wu, meeŋ ya puli mo nchaŋ nɛ e wora n nase Keenan na to. Amoso e jande, e sa ma ekpa nɛ n yɔ ndoŋ n ya puli mo nseŋ naa ba.”

⁶ Ndoŋ nna nɛ ewura Fɛɛro kaŋɛ mo: “Bɛ kɔnɔ nɛ fo nase na so n ya puli fo tuto.”

⁷ Ndoŋ nna nɛ Josɛf pɛ Keenan be ekpa nɛ e ya puli mo tuto. Mo nɛ Fɛɛro be benimu kikɛ nɛ mbe laŋ to be bejuŋkparpo kikɛ nɛ Ijipt be bejuŋkparpo kikɛ e daŋ yɔ.

⁸ Le be basa ere kikɛ be buushi, Josɛf be laŋ to ebi kikɛ nɛ mo daana kikɛ nɛ mo tuto be laŋ to be basa kikɛ gba daŋ yɔ nna. Bumo be mbia nɛ bumo be mbolpɔ nɛ mboe nɛ ana nawule e daŋ ka a wɔ Goshen.

⁹ Basa nɛ b daŋ tu mo n yɔ na to be beko daa wɔ egbaŋɛturko to nna nɛ bede dii egbaŋɛ. Kashenteŋto jimaŋ damta e daa la bumo.

¹⁰ B daŋ ta loŋ m ba fo Atad nɛ k wɔ Jɔɔdan be epeŋipetekpa be kugooro nɛ b daa bri asɔ ndoŋ na m ba shu awɔrso ndoŋ ga nɛ Josɛf ta bɔkwe n wora keeliwora be edaŋkaresheŋ ndoŋ.

¹¹ Keenanebi nɛ b daa wɔ Atad na ka wu basa na kikɛ ka wɔ Atad be kakpa chela asɔ na ka bee shu nɛ b kaŋɛ le: “Ijiptebi ere be keeli ere la keeligboŋ nna!” Amoso nɛ b daŋ nase ndoŋ ketre Ebel Mizrayim na.

¹² Ade kikɛ e daa ŋini fanɛ Jeekɔb be mbia na daŋ wora asɔ nɛ bumo tuto daŋ ŋini bumo na kikɛ nyam.

¹³ B daŋ sulɔ mbe kebuni nna n yɔ Keenan n ya puli kebeelaŋ nɛ k daa wɔ Makpɛla nɛ k mata Mamre nɛ Eebraham daŋ tɔ nɛ kudɔ nɛ k wɔ kumo to na ashi Hitebi be esa kutɔ fanɛ k baa la kakpa nɛ e beeŋ ba puli mbe bubuni na.

¹⁴ Josɛf ka ya puli mo tuto n loge nɛ mo daana na nɛ basa kama nyam nɛ mo nɛ bumo daŋ ya puli Jeekɔb na naŋ bɛta n yɔ Ijipt.

Josɛf ka naŋ laŋɛ n leŋ mo daana to be asheŋ

¹⁵ Jeekɔb be luwu na be kaman nɛ Josɛf mo daana na kaŋɛ abar le: “Shere an tuto ka wu ere, Josɛf beeŋ kishi anyi nseŋ wora anyi n tal alubi nɛ an daŋ wora mo na kikɛ nyam to.”

¹⁶ Amoso b daŋ shuŋi m mata Josɛf nna ŋ kaŋɛ mo le: “Pɔɛŋ nɛ an tuto wu na, le nɛ e kaŋɛ anyi:

¹⁷ ‘Men kaŋ wora, men kule Josɛf alubi be ketampaŋ ŋ kaŋɛ: Jande, ta fo daana be alubi nɛ b wora fo na kikɛ m paŋ bumo.’ Amoso, anyee kule fo nna fanɛ fo ta m paŋ anyi nɛ an la fo tuto be Ebɔrɛ be anya na.” Josɛf ka nu bumo be kubɔya na nɛ e shu.

¹⁸ Ama kubɔya na be kaman, mo daana na gba daŋ naŋ ba mo kutɔ nna m ba gbir mbe anishito ŋ kurgi amu n yuu to ŋ kaŋɛ mo: “Anyi, fo anya nde!”

¹⁹ Ndoŋ nna nɛ Josɛf kaŋɛ bumo: “Men sa maa lɔ kufu, mannɛ ma e la Ebɔrɛ.

²⁰ Menyi ere daŋ kre ma kulubi nna, ama Ebɔrɛ malɛ ta kumo ŋ ki kelela, saŋɛ na so e beeŋ sɔ basa damta nɛ b wɔ ŋkpa to kabre ere n yige ŋkpal kusɔ nɛ k daŋ wora na so.

²¹ Amoso, men sa maŋ shin nɛ kufu kama e baa kɔ menyi. Meeŋ baa keni menyi nɛ men be mbia so.” E daŋ leŋ bumo to nna m malga mmalga lela n sa bumo.

Josɛf be luwu be asheŋ

²² Josɛf nɛ mo tuto be basa na kikɛ daŋ shir a wɔ Ijipt nna. Josɛf daŋ ji nfɛ kalfa nɛ kudu nna pɔɛŋ nseŋ wu.

²³ E daŋ wu Efreim be mbia nɛ bumo alɛ be mbia nna pɔɛŋ nseŋ wu. E daŋ wu Manase pibinyɛn Makiir gba be mbia. B ka baŋ kurge bumo na nɛ e ta bumo n ti mbe kanaŋ so.

²⁴ Kachako nɛ e kaŋɛ mo daana na le: “To, k maaŋ naŋ chɛr ko nɛ n wu, ama abaanaaworasheŋ Ebɔrɛ maaŋ yige menyi n to, e beeŋ keni menyi so nseŋ juŋkpar menyi, n lara menyi kasawule ere so n ta menyi n yɔ kakpa nɛ e daŋ nase kɔnɔ n sa Eebraham nɛ Aizek nɛ Jeekɔb fanɛ e beeŋ sa na.”

²⁵ Kede be kaman nɛ Josɛf kaŋɛ mo daana na le: “Ama, men nase kɔnɔ n sa ma fanɛ ŋ kaŋ wu nɛ Ebɔrɛ lara menyi nfe, menyeeŋ ta ma eyur n ti so n yɔ.”

²⁶ Josɛf daŋ ji nfɛ kalfa nɛ kudu nna nseŋ wu ashi Ijipt nɛ b gbiti mbe eyur kudur nɛ e sa maŋ bɛ nseŋ ta kumo n wɔtɔ deka to ashi Ijipt.