Jɛnesis 11 - EBƆRƐ BE KAWƆL

Babel be ketempreŋ jeŋgreŋ na be asheŋ

¹ To, sososo na, durnya to be basa kikɛ daa kɔ ŋgbar koŋwule nna nsaa malga kamalga koŋwule.

² Basa daŋ sɔ epeŋipetekpa nna a yɔ nseŋ ya tu kaboŋ fultoso ko ashi Babilɔn be efuli so n ta ndoŋ ŋ ki bumo be kade.

³ Kumo be kaman nɛ b kaŋɛ abar: “Men shin nɛ an kuya ebirkesi n ta amo n tɔ edɛ to nɛ a ki kpakpa.” Amoso ebirkesi nɛ b daa ta a pɔr, mannɛ ajembu, nsaa ta kootal a pɛ amo a mata abar.

⁴ Kede be kaman nɛ b kaŋɛ le: “Naniere bre men shin nɛ an pɔr kadegboŋ n sa anyi be amu nseŋ pɔr ketempreŋ jeŋgreŋ n ya chute awɔlpa, saŋɛ na so, anyi be ketre beeŋ dii nɛ anyi maaŋ naŋ pesaŋ to a wɔ kasawule so kikɛ.”

⁵ Ndoŋ nna nɛ Enyɛnpe Ebɔrɛ ba wu kadegboŋ na nɛ ketempreŋ jeŋgreŋ nɛ basa na daa pɔr na

⁶ nseŋ kaŋɛ le: “Ŋkpal basa ere ka la basa koŋwule a gbar ŋgbar koŋwule nseŋ fara a wora kusɔ nɛ baa wora ere, kumo ere kusɔ kama nɛ baa fɛ kewora, baaŋ tiŋ n wora kumo.

⁷ Amoso men shin nɛ an yɔ n ya wea bumo be ŋgbar na to, saŋɛ na so b maaŋ naa nu abar be ŋgbar.”

⁸ Loŋ nɛ Enyɛnpe Ebɔrɛ na daŋ wora n shin nɛ b pesaŋ to n sɔ kasawule so kikɛ nseŋ yige kadegboŋ na nɛ ketempreŋ jeŋgreŋ nɛ b daa pɔr na be kepɔr.

⁹ Loŋ be kade na nɛ b daa tre Babilɔn, ŋkpal manɛ so, ndoŋ nɛ Enyɛnpe Ebɔrɛ na daŋ wea basa kikɛ be ŋgbar to nseŋ pesaŋ bumo to nɛ b sɔ kasawule so kikɛ.

Shɛm be kanaŋ to ebi be asheŋ

¹⁰ Kananɛ Shɛm be kanaŋ to ebi be asheŋ nite nde. Nchugboŋ nɛ a daŋ ji durnya na be nfɛ anyɔ be kaman nɛ Shɛm nya nfɛ kalfa. Amoafɛ malɛ nɛ mo nɛ mbe eche kurge ebinyɛn n nase mo Aafaksad.

¹¹ B ka kurge Aafaksad be kaman Shɛm daŋ naŋ ji nfɛ alfa anu durnya to nna. Loŋ be jemanɛ na so nɛ e nya bibinyɛn nɛ bibiche n ti so pɔɛŋ nseŋ wu.

¹² Aafaksad malɛ ka ji nfɛ adesa nɛ anu nɛ mo alɛ gba nɛ mbe eche kurge Shɛla.

¹³ B ka kurge Shɛla be kaman Aafaksad daŋ naŋ ji nfɛ alfa ana nɛ asa durnya to nna. Loŋ be jemanɛ na so nɛ e nya bibinyɛn nɛ bibiche n ti so pɔɛŋ nseŋ wu.

¹⁴ Shɛla malɛ ka ji nfɛ adesa nɛ mo alɛ nɛ mbe eche kurge Eber.

¹⁵ B ka kurge Eber be kaman nɛ Shɛla naŋ ji nfe alfa ana nɛ asa durnya to. Loŋ be jemanɛ na so nɛ e nya bibinyɛnsobi nɛ bibiche n ti so pɔɛŋ nseŋ wu.

¹⁶ Eber malɛ ka ji nfɛ adesa nɛ ana nɛ mo nɛ mbe eche kurge Pɛlɛg.

¹⁷ B ka kurge Pɛlɛg be kaman Eber daŋ naŋ ji nfɛ alfa ana nɛ adesa durnya to nna. Loŋ be jemanɛ na so nɛ e nya bibinyɛnsobi nɛ bibiche n ti so pɔɛŋ nseŋ wu.

¹⁸ Pɛlɛg malɛ ka ji nfɛ adesa nɛ mo nɛ mbe eche kurge Rehu.

¹⁹ Rehu be kaman nɛ Pɛlɛg naŋ ji nfɛ alfa anyɔ nɛ akpanu durnya to. Loŋ be jemanɛ na so nɛ e nya bibinyɛnsobi nɛ bibiche n ti so pɔɛŋ nseŋ wu.

²⁰ Rehu ka ji nfɛ adesa nɛ anyɔ nɛ mo nɛ mbe eche kurge Zeruk.

²¹ B ka kurge Zeruk be kaman Rehu daŋ naŋ ji nfɛ alfa anyɔ nɛ ashunu durnya to nna. Loŋ be jemanɛ na so nɛ e nya bibinyɛnsobi nɛ bibiche n ti so pɔɛŋ nseŋ wu.

²² Zeruk malɛ ka ji nfɛ adesa nɛ mo nɛ mbe eche kurge Nahɔɔ.

²³ B ka kurge Nahɔɔ be kaman Zeruk daŋ naŋ ji nfɛ alfa anyɔ durnya to nna. Loŋ be jemanɛ na so nɛ e nya bibinyɛnsobi nɛ bibiche n ti so pɔɛŋ nseŋ wu.

²⁴ Nahɔɔ malɛ ka ji nfɛ adunyɔ nɛ akpanu nɛ mo nɛ mbe eche kurge Tɛra.

²⁵ B ka kurge Tɛra be kaman Nahɔɔ daŋ naŋ ji nfɛ kalfa nɛ kuduakpanu durnya to nna. Loŋ be jemanɛ na so nɛ e nya bibinyɛnsobi nɛ bibiche n ti so pɔɛŋ nseŋ wu.

²⁶ Ndoŋ nna nɛ Tɛra malɛ ji nfɛ adushunu nɛ mo alɛ nɛ mbe eche kurge Eebram nɛ Nahɔɔ nɛ Haran.

²⁷ Tɛra be kanaŋ to ebi nde. Tɛra be mbia e daa la Eebram nɛ Nahɔɔ nɛ Haran. Haran e daŋ koso ŋ kurge Lɔt.

²⁸ Haran daŋ wu mbe kade to gbagba nna, ndoŋ nɛ baa tre Ur ashi Babilɔnia na. Kumo be saŋɛ nɛ mo tuto Tɛra bre kraa wɔtɔ.

²⁹ Eebram nɛ Nahɔɔ gba daŋ ta beche nna. Eebram be eche be ketre e daa la Sɛɛrai nɛ Nahɔɔ malɛ peya daa ji Milka. Milka nɛ Iska kikɛ bumo tuto e daa la Haran.

³⁰ Sɛɛrai malɛ daa maa kurge, e daa la egbentepo nna.

³¹ Nɛ Tɛra keta mo pibinyɛn Eebram nɛ mo nanabi Lɔt nɛ e daa la Haran pibinyɛn na nɛ mo shache Sɛɛrai, Eebram be eche, n ti mbe kumu so nɛ b lar Ur ashi Babilɔnia n yɔ Keenan be kasawule so. B ka bee yɔ Keenan n ya fo Haran nɛ b chena ndoŋ.

³² Tɛra daŋ ji nfɛ alfa anyɔ nɛ anu durnya ere to nna pɔɛŋ nseŋ wu ashi Haran.