Ezikɛl 47 - EBƆRƐ BE KAWƆL

Kabombi nɛ k shi bɔrɛlambu na to a shile na be asheŋ

¹ Ade kikɛ be kaman nɛ kanyɛn na bɛta ma n yɔ bɔrɛlambu na to, ndoŋ nɛ n wu kabombi ko ka bee shile kabuna na be kaseto a yɔ epeŋitɔrkpa be kaba so. K fara bɔrɛlambu na be kelargato be esoso na nna a shile m ba bɔla bɔrɛsure na ase m baŋɛ kelɔnɛ na to a yɔ epeŋilarkpa be kaba so.

² Ndoŋ nna nɛ kanyɛn na naŋ keta ma m bɔla kelargato be esoso be kabunagboŋ na to n lar bɔrɛlambu na to nseŋ juŋkpar ma ŋ kulti n ya fo kabunagboŋ nɛ k bee shoŋi epeŋilarkpa na. Ndoŋ nɛ n wu kabombi ko ka bee shile kabunagboŋ na be kelargato be kaseto be kaba so na.

³ Nɛ kanyɛn na ta mbe efɔl karga asɔ ŋ karga ateŋgreŋ alfa anu nɛ adeshe m bɛ kabombi na so ŋ gbelge to a yɔ epeŋilarkpa be kaba so nseŋ kaŋɛ ma fanɛ n luri nchu na to a nite to ndoŋ. Nchu na daa fo ma anaŋgbeltobi to nna.

⁴ Ndoŋ nna nɛ e naŋ yili ndoŋ ŋ karga ateŋgreŋ alfa anu nɛ adeshe m bɛ kabombi na so a gbelge to nɛ nchu na dii m ba ma amuli to. Nɛ e naŋ yili ndoŋ ŋ karga ateŋgreŋ alfa anu nɛ adeshe n chuge so, nɛ nchu na naŋ dii n fo ma kashɛr to.

⁵ Kumo be kaman, nɛ e naŋ yili ndoŋ ŋ karga ateŋgreŋ alfa anu nɛ adeshe n yɔ anishito. Ndoŋ bre be nchu na daa wɔ nchiŋ nna amoso, n daa maŋ tiŋ n nite amo to. Ŋkpal ndoŋ ka daa wɔ nchiŋ so esa daa maaŋ tiŋ n nite amo n dii ama e la nna.

⁶ Ndoŋ nna nɛ kanyɛn na kaŋɛ ma le: “Dimɛdi pibi, Ezikɛl, baa de asheŋ ere kikɛ so nɛnɛ.” Kumo be kaman nɛ e keta ma n laŋɛ n yɔ kabombi na be ekarso,

⁷ nɛ n ya wu fanɛ ndibi damta daa yil kabombi na be mba anyɔ na kikɛ so nna.

⁸ Ndoŋ nna nɛ e kaŋɛ ma le: “Nchu ere bɔla kasawule ere so nna n sɔ epeŋilarkpa be kaba so ŋ gbelge to m bɔla Jɔɔdan be ketaŋɛ to a yɔ Teku Wuso na to nna na. Kumo be nchu na baŋ luri Teku Wuso na to, Teku Wuso na be nchu nɛ a kɔ nfɔl na beeŋ kilgi nchu nɛ e walɛ kenuu.

⁹ Kaplɛkama nɛ nchu na beeŋ shile m bɔla, asɔbɔya nɛ ekɔrɔtɔ be yiri yiri beeŋ ba ndoŋ, ŋkpal manɛ so kabombi na beeŋ bar ŋkpa nɛ nchu nɛ e walɛ kenuu m ba wɔtɔ Teku Wuso na to.

¹⁰ Yili achubu nɛ baa tre Ɛngɛdi na hale n ya fo achubu nɛ baa tre Ɛneglem na, basa beeŋ baa pɛ ekɔrɔtɔ teku na to nsaa fata bumo be ashewu kumo be ekarso. Teku Wuso na beeŋ nya ekɔrɔtɔ be yiri yiri fanɛ kananɛ Mɛditerenia be Teku kɔ amo na.

¹¹ Ama apa nɛ a dese m mata teku na bre be nchu nɛ a kɔ nfɔl na bre be nfɔl maaŋ lar amo to, saŋɛ na so basa beeŋ baa nya nfɔl amo to a wora asheŋ.

¹² Ndibi be yiri yiri beeŋ kɔr a yil kabombi na be kaba kama so a sa kusɔ jiso. Amo be afantaŋ maa ba nɛ aba bolo, amo alɛ maaŋ yige kebaasɔr kikɛ. Kufɔl kikɛ a beeŋ baa kɔ asɔrso popɔr, ŋkpal manɛ so a bee nya nchu nɛ a bee shi bɔrɛlambu na to nna. Ndibi na be asɔrso beeŋ baa la ajibi nɛ amo be afantaŋ malɛ e baa chɛ basa alɔ.” Kasawule na be Egbaŋ ana be asheŋ

¹³ Ade kikɛ be kaman, nɛ Enyɛnpetale Ebɔrɛ na naŋ kaŋɛ Israɛl be basa na le: “Kananɛ kasawule nɛ menyeeŋ chige to n sa Israɛl be eyiri kudu anyɔ na be egbaŋ daga fanɛ a baa du nde. Josɛf be eyiri anyɔ nɛ baa tre Manase nɛ Efrayim na beeŋ nya mboŋ anyɔ.

¹⁴ N daŋ bɔ ntaŋ n nase kɔnɔ n sa menyi nananyɛnana fanɛ meeŋ sa bumo kasawule ere nɛ k baa la bumo peya; amoso men barga kumo to dede n sa abar.

¹⁵ Kumo be kelargato be esoso be ekar beeŋ fara Mɛditerenia be Teku na ase ŋ keta n ya bɔla epeŋilarkpa be kaba so be ndegboŋ nɛ baa tre Hiflɔn nɛ Lɛbo Hamaf na n ya fo kadegboŋ nɛ baa tre Zedad na.

¹⁶ Kumo alɛ beeŋ naŋ keta loŋ n ya fo ndegboŋ nɛ baa tre Bɛrota nɛ Sibreem nɛ a dese nwursawule anyɔ nɛ baa tre Damaskɔs nɛ Hamaf be nferinto na, hale n ya fo kadegboŋ nɛ baa tre Tikɔn nɛ k dese kebonfu nɛ baa tre Hawuran na be gbaŋ ase na.

¹⁷ Amoso kasawule na be kelargato be esoso be ekar yili Mɛditerenia be Teku na ase ŋ keta n sɔ epeŋilarkpa be kaba so n ya fo kadegboŋ nɛ baa tre Enɔn na nna, nɛ kumo nɛ Damaskɔs nɛ Hamaf be abonfu wora gbaŋ a laŋɛ kelargato be esoso be kaba so.

¹⁸ Epeŋilarkpa be gbaŋ na malɛ fara Damaskɔs nɛ Hawuran be abonfu anyɔ be nferinto nna ŋ keta n sɔ kelargato be kaseto, nɛ Jɔɔdan be Lɔr ki Israɛl be basa be kasawule ashi epeŋitɔrkpa be kaba so nɛ Giliad be kasawule ashi epeŋilarkpa be egbaŋ to, nseŋ keta loŋ n ya lar kade nɛ baa tre Tama nɛ k mata Teku Wuso na.

¹⁹ Kasawule na be kelargato be kaseto be ekar beeŋ fara Tama be kade na nna ŋ keta n ya fo Kadɛsh Mɛriba be achubu na ashi kelargato be kaseto be epeŋilarkpa be kaba so nseŋ naŋ ta n sɔ kelargato be epeŋitɔrkpa be kaba so a shi Ijipt be gbaŋ to n ta ya fo Mɛditerenia be Teku ase.

²⁰ Kumo be epeŋilarkpa be ekar malɛ beeŋ fara Mɛditerenia be Teku ase ŋ keta n sɔ kelargato be esoso n ya fo Lɛbo Hamaf be epeŋitɔrkpa be kaba so.

²¹ Kasawule nɛ menyeeŋ barga to n sa Israɛl be eyiriana na nna na.

²² K beeŋ baa la menyi be kapetɛ hale mbaanaayɔ. Nɛ menyi bee chige kasawule na to, befɔ kama nɛ menyi nɛ bumo wɔtɔ nɛ b kurge mbia nfe na gba daga fanɛ b nya bumo be kachige. A daga fanɛ men baa wora bumo fanɛ Israɛl be ndetobia nseŋ shin nɛ bumo alɛ gba e baa tu Israɛl be eyiriana na a to beri a nya kasawule na be kachige.

²³ Yiri kama to nɛ efɔ chena, daga fanɛ b chige bumo kasawule na nɛ efɔ na gba e nya mbe kachige. Ma, Enyɛnpetale Ebɔrɛ na e kaŋɛ.”