Ezikɛl 45 - EBƆRƐ BE KAWƆL

Israɛl be kasawule na be kebarga to be asheŋ

¹ Nɛ menyi bee barga Israɛl be kasawule na to a sa eyiriana na, men ku kaba n nase n sa Enyɛnpe Ebɔrɛ na. Kumo be nteŋ to e baa la emayɛl ashunu nɛ mparto malɛ e baa la emayɛl ashe. Loŋ be kakpa na kikɛ beeŋ baa la kakpa cheembi nna.

² Men ku kaboŋ nɛ kumo be nteŋ to nɛ mparto kikɛ sa fanɛ ayadra alfa aburwa nɛ adena nɛ m pɔr bɔrɛlambu na n yili kumo so. A daga fanɛ kasawule nɛ kumo be mparto sa fanɛ ayadra aduburwa nɛ ana ka dese ŋ kulti kaboŋ na kikɛ.

³ Men ku kakpa cheembi na be bargato, nɛ kumo be nteŋ to fo emayɛl ashunu nɛ kumo be mparto malɛ fo emayɛl asa m pɔr bɔrɛlambu na n yili so. Ndoŋ beeŋ baa la kakpa cheembi na kikɛ be acheembiakpa.

⁴ Ndoŋ beeŋ baa la efuli na kikɛ be kakpa cheembi nɛ k dese n sa bɔrɛmatapoana nɛ baa shuŋ Enyɛnpe Ebɔrɛ ashi bɔrɛlambu na to na. Bumo be nwu beeŋ baa wɔ kumo be kaba nɛ bɔrɛlambu na malɛ e baa wɔ kumo be kaba.

⁵ Saŋɛ na so nɛ Enyɛnpe Ebɔrɛ na be kasawule na be kaba nɛ k ka na e baa dese n sa Livaiebi nɛ baa shuŋ ashi bɔrɛlambu na to na nɛ b pɔr bumo be ndeana n chena so.

⁶ Kede be kaman nɛ men naŋ ku kasawule nɛ kumo be nteŋ to fo emayɛl ashunu nɛ kumo be mparto malɛ fo mayɛl koŋwule nɛ bargato m bɛ kakpa cheembi na so nɛ b pɔr kadegboŋ nɛ Israɛl be esa kama beeŋ tiŋ n chena kumo to ashi kasawule na so.

Ewura be kasawule be asheŋ

⁷ A daga fanɛ men ku kasawule n nase n sa Israɛl be ewura nɛ k yili kakpa cheembi na be epeŋitɔrkpa be kaba so m ba choŋ Teku nɛ baa tre Mɛditerenia na be epeŋitɔrkpa be kaba so na; nseŋ naŋ yili kakpa cheembi na be epeŋilarkpa be kaba so m ba choŋ efuli na be gbaŋ nɛ k wɔ epeŋilarkpa be kaba so na, nɛ kumo be nteŋ to e fo fanɛ mboŋ nɛ menyeeŋ ku n sa Israɛl be eyiriana na be kekama na.

⁸ Kakpa nɛ esa nɛ e bee ji kuwura na beeŋ baa kɔ ashi Israɛl be kasawule so nna na, saŋɛ na so e maaŋ baa nyaŋ basa na, nseŋ shin nɛ efuli na be kasawule nɛ k ka na e baa la Israɛl be eyiriana na peya.

Mbraana nɛ a wɔtɔ n sa ewura na be asheŋ

⁹ Ade be kaman nɛ Enyɛnpetale Ebɔrɛ na naŋ kaŋɛ le: “Fo nɛ fee ji Israɛl so kuwura na wora alubi n chɛr pasaa! Yige fo kebagato nɛ kanyaŋ be asheŋ na nsaa wora kusɔ nɛ k daga nseŋ bɔla ekpa. A maŋ daga fanɛ fo naŋ ju ma basa n lar bumo be kasawule so kikɛ. Ma, Enyɛnpetale Ebɔrɛ na e naa kaŋɛ fo le na.

¹⁰ A maŋ daga fanɛ men baa ta kapuni be asɔ karga asɔ fanɛ ekurwa nɛ b wuse amo be afito nɛ ebɔtɛ wurbi a karga asɔ wɔlso nɛ ekɔlba wurbi nɛ egalɔn wurbi a karga asɔ nɛ a la fanɛ ŋku nɛ nchu a sa basa.

¹¹ Ekurwa nɛ ebɔtɛ nɛ ekɔlba nɛ egalɔn nɛ men kɔ a karga asɔ a fa na kikɛ maŋ daga fanɛ a baa la kapuni b kasɔkarga be asɔ. Amo kikɛ daga fanɛ a baa la asɔ nɛ ekama yirda fanɛ amo e la kashenteŋ be asɔ nɛ b kɔ a karga asɔ a fa nna.

¹² Kusɔ nɛ menyeeŋ baa ta asɔ be egbɛ a ber e la kadɛrbi. Kadɛrbi koŋwule malɛ la fanɛ kilo be bargato malɛ be bargato malɛ be bargato nna.

¹³ A daga fanɛ men barga men be ayu nɛ menyeeŋ teŋi to ntunshe nna nseŋ ta katuŋ koŋwule m ba sa ma fanɛ kakɛ lela.

¹⁴ Menyeeŋ barga men be ɔlifs be ŋku to ntuŋ kalfa, nseŋ ta katuŋ koŋwule m ba sa ma. Menyeeŋ baa karga amo ekɔlba nɛ egalɔn to nna. Galɔn koŋwule malɛ la ekɔlba ashunu nna.

¹⁵ Ade be kaman, a daga fanɛ men keni men be mbolpɔ alfa anyɔ kikɛ to n lara ekoŋwule n sa ma. Menyeeŋ ta ŋkɛana ere n lara ayu be esarga nɛ esarga chɔɔso nɛ kɔnɔkoŋwule be esarga n sa ma saŋɛ na so ma, Enyɛnpe Ebɔrɛ na be kagbene beeŋ fuli amo so nɛ n ta ma basa be alubi m paŋ bumo.

¹⁶ Basa nɛ b wɔ kasawule na so na kikɛ beeŋ lara esarga ere m ba sa Israɛl be ewura na.

¹⁷ Mo e daga fanɛ e yili Israɛl be efuli na kikɛ be katelamu n lara asɔbɔya nɛ baaŋ ta n lara esarga chɔɔso nɛ baaŋ ta n lara ayu be esarga nɛ yabra belbelso be esarga na kikɛ jemanɛ nɛ baa ji Kufɔl Popɔr be Kachɛgboŋ nɛ Kewushiachɛ na nɛ nchɛgboŋ nɛ a ka na kikɛ na. Mo koŋwule na e daga fanɛ e lara asɔbɔya nɛ b ta n lara alubi nɛ ayu nɛ sarga chɔɔso nɛ kɔnɔkoŋwule be esarga nɛ e kpra Israɛl be basa be alubi.”

Nchɛgboŋana na be asheŋ

¹⁸ Ade kikɛ be kaman, nɛ Enyɛnpetale Ebɔrɛ na naŋ kaŋɛ le: “Menyeeŋ ta gbolu nɛ doro kikɛ maŋ wɔ kumo so n lara sarga n lɔŋɛ bɔrɛlambu na so kufɔl juŋkparso na be kachɛ sososo na.

¹⁹ Bɔrɛmatapowura na beeŋ suse kulubi be sarga be kusɔbɔya na be ŋklaŋ na be ako ŋ gbiti bɔrɛlambu na be akuloŋ be ndibi na nɛ bɔrɛsure na be mba ana na nɛ epunto be kelɔnɛ be akuloŋ be ndibi na.

²⁰ Kumo be kaman nɛ men naŋ wora loŋ gbagba kufɔl na be kachɛ shunusopo na, saŋɛ na so nɛ esa ko nɛ e maŋ kute ŋko e maŋ nyi nseŋ wora kulubi beeŋ nya mbe alubi be ketampaŋ. Kananɛ menyeeŋ wora nɛ ma bɔrɛlambu e baa du cheembi nna na.

²¹ Kufɔl juŋkparso na be kachɛ kuduanasopo na nɛ menyeeŋ fara Kebansonchoŋ be Kejigboŋ na be kesheŋ wora. Nchɛnshunu nɛ ekama beeŋ ta n ji bodobodo nɛ a maŋ kɔ yisi.

²² Ewura na beeŋ mɔ gbolu n lara mo gbagba nɛ basa na kikɛ be alubi be sarga kejigboŋ na be kachɛ sososo na.

²³ Karechɛ kama, ewura na beeŋ baa mɔ egbolu ashunu nɛ ekpakpa ashunu nɛ e maŋ kɔ doro kikɛ a lara sarga chɔɔso n ya fo nchɛ kachɛ shunusopo nɛ baaŋ ji kejigboŋ na n loge na. Mo alɛ beeŋ naa mɔ kaboenyɛn a lara alubi be sarga karechɛ kikɛ.

²⁴ E beeŋ ta ayu cheenshigboŋ be bargato nɛ ɔlifs be ŋku galɔn koŋwule n ti gbolu kama nɛ kpakpa kama nɛ e beeŋ mɔ n lara sarga na so n lara sarga.

²⁵ Abuu to be kebaawɔ be Kejigboŋ na bee fara kufɔl shunusopo na be kachɛ kuduanusopo na nseŋ keta loŋ n ya fo nchɛnshunu. Kananɛ ewura na baaŋ lara asɔbɔya nɛ ayu nɛ ɔlifs be ŋku karechɛ kikɛ jemanɛ nɛ b daa ji Kebansonchoŋ be Kejigboŋ na, aloŋ nɛ e beeŋ naŋ lara amo kede gba to.”